Emigracioni, të ardhurat që mbajnë “frymën” e Shqipërisë !

[EMAUS]

Emigracioni, të ardhurat që mbajnë “frymën” e Shqipërisë !


Shqiptarët, pa përjashtim, edhe në zonat më periferike të vendit janë njohës të shkëlqyer të valutave, imazhit dhe vlerës së tyre. Dollari, euro dhe
paundi janë po aq familjarë, sa edhe leku për familjet shqiptare, e kjo, për shkakun se, të ardhurat kryesore të buxheteve të tyre janë nga emigrantët.

Kjo shtresë ka sjellë në vendin tonë, të paktën mbas viteve 1990, një vlerë të përafërt, që përkon me 15 miliardë dollarë.
Për shumë familje, emigracioni është burimi i vetëm i të ardhurave dhe vit pas viti është shndërruar në një nga themelet, ku po mbështetet ekonomia shqiptare.

Sipas matjeve që kanë bërë institucionet e financave në vend shifra rekord, që arrin deri në 1.028 milion euro dhe që pasqyron rreth 13.7 për qind të Prodhimit të Brendshëm Bruto
(PBB) - që i korrespondon vitit 2004 - i bën dërgesat e emigrantëve të jenë një faktor kryesor për mbijetesën financiare të vendit. Të ardhurat nga emigracioni janë më shumë se dyfishi i hyrjeve valutore në Shqipëri nga eksportet e mallrave.

Po, në fakt, një burim kaq madhor për ekonominë e vendit tonë akoma nuk po gjen një mbështetje konkrete të strukturave të shtetit. Ndërsa bankat dhe agjencitë e transfertave
në shumë raste ofrojnë shërbime abuzive dhe me mjaft kosto për transferimin e parave nga jashtë brenda vendit.
Në një kohë kur shumica e emigrantëve përdorin shërbimet bankare në vendet ku jetojnë, rreth 77 % e emigrantëve shqiptarë preferojnë të dërgojnë paratë e tyre nëpërmjet rrugëve
informale - kryesisht të transportuar dorazi- dhe më pak ato formale, ndërsa sistemi bankar mbetet më pak i preferuari.

Parashikimet tregojnë se cikli i emigracionit dhe fluksi i dërgesave të emigrantëve ka hyrë në një fazë pjekurie.
Kur krahasohen me vitet e fillimit të emigracionit, migrantët shqiptarë duken se janë më mirë, për sa i përket punësimit dhe të ardhurave në vendet pritëse. Për më tepër, në të shumtën e rasteve, ata janë ribashkuar me familjet e tyre, duke nënkuptuar njëfarë sigurie të situatës në vendin ku janë vendosur.

Si pjesë e këtij procesi, pas bashkimit të familjes dhe integrimit në vendet pritëse, mendohet se migrantët do të dërgojnë më pak para, megjithëse, në të njëjtën kohë, niveli i tyre i të ardhurave mund të rritet. Dërguesit dhe marrësit deklarojnë se përdorimi kryesor i dërgesave është mbulimi i nevojave tëfamiljes. Më pas vjen ndërtimi, rregullimi
dhe mobilimi i shtëpive dhe më pas investimet në prona të patundshme, si kategoria tjetër parësore.

Megjithëse është, pa dyshim, i rëndësishëm për zbutjen e varfërisë, ky fakt nënkupton që ato kanë një rol shumë të kufizuar në nxitjen e punësimit.

Nga Blerina Hoxha