Mozilla edhe në Kosovë

[vaaldr1n]

Shoqata për Softuer të Lirë dhe të Hapur e Kosovës e cila është energjia shtytëse prapa aktiviteteve të ndërlidhua me promovimin e softuerit të lirë dhe të hapur në Kosovë, këtë të shtunë planifikon të organizojë ngjarjen e radhës në Gjakovë, e cila mban emrin “Mozilla Day në Gjakovë”.

Mozilla Day nga zyrtarët e FLOSSK është komentuar si një projekt që do të ketë si synim edukimin dhe njoftimin e komunitetit rreth produkteve të ndërlidhura me Mozilla-në, kompaninë që qëndron prapa shfletuesit të popullarizuar Firefox, debate rreth projektit të përhapjes së Firefox apo më mirë thënë rreth projektit SpreadFirefox, pastaj Mozilla Camp Reps, përkthimi i Firefox, etj.

Sipas njoftimit të bërë, temë e diskutimit do të jetë edhe Thunderbird në Shqip, shtojcat për Firefox, lokalizimi dhe avancimi i tij, etj.

Vlen të theksohet se një ngjarje e tillë mbahet për herë të parë në Kosovë dhe se për mbajtjen e saj ka pasur edhe përkrahje zyrtare nga ana e vetë përfaqësuesve të Mozilla-së.

Eventi do të mbahet me 16 tetor në bibliotekën e Gjakovës “Ibrahim Rugova”, dhe duke filluar nga ora 10:00 do të diskutohen çdo gjë rreth asaj që u tha më lartë.

Gjithashtu duhet theksuar se së shpejti do të themelohet edhe komuniteti i Kosovës për Mozilla, i cili do të ketë përkrahjen e degës së Mozilla-së për Ballkan ose ndryshe që njihet edhe si Mozilla Balkans. Përfaqësues të FLOSSK pritet të jenë gjithashtu të pranishëm në një takim zyrtar që do të mbahet me 3 dhjetor të këtij viti në Lubjanë të Sllovenisë, me përfaqësuesit e Mozilla-së, dhe temë e diskutimi pritet që të jetë edhe themelimi dhe zhvillimi i komunitetit të Mozilla-së për Kosovë./pcworld.al