Arta Dobroshi, triumfon në Irlandë

[Erinaa]

Festivali irlandez i Filmit të Shkurtër, këtë vit ka shënuar edicionin e tij të 55-të, ndërsa Arta Dobroshi është vlerësuar për performancën në filmin, “Baby”.

Aktorja shqiptare Arta Dobroshi, ka arritur sërish të magjeps botën. “Baby” është filmi i radhës në të cilin Dobroshi luan një nga rolet kryesore përkrah aktorit anglez, Daniel Kaluuya. Një realizim i regjisorit të njohur anglez, Danile Mulloy, i njohur në fushën e krijimeve të filmave të metrazhit të shkurtër.

Ndërkaq në festivalin ndërkombëtar të filmit të metrazhit të shkurtër, që zhvillohet çdo vit në Kork të Irlandës, treshja Mulloy-Dobroshi-Kaluuya, ka arritur të vlerësohet me çmimin filmi më i mirë ndërkombëtar. Dobroshi është vlerësuar nga juria profesionale e festivalit për lojën saj të mrekullueshme në rolin e një vajze, e cila rastësisht shndërrohet në një dëshmitare të një situate të pakëndshme. Si rrjedhojë ajo bëhet personi më i kërkuar nga dikush që ka interes të veçantë. Një femër e cila jeton me të ëmën, niset për një udhëtim në Londër.

Në një përpjekje të dështuar për të ndaluar një plaçkitje, një prej keqbërësve fillon të interesohet më shumë për viktimën. Ai e përcjellë deri në vendin ku jeton dhe kundër aktgjykimit të mirë të të gjithë shikuesve të filmit, ajo e fton atë brenda. “Baby” është realizuar me një shkathtësi, të ndërtuar mbi atë që publiku dëshiron ta shoh, me një fotografi të pastër shoqëruar nga një editim i ngadalshëm dhe melodik. Regjisori ka ndërtuar me kujdes tensionin, me kohë merr thellimin në mendimin e karaktereve dhe pikat tona të favorshme janë zgjedhur me kujdes për të arritur në shkallën maksimale të emocioneve. Nga ana tjetër intimiteti fizik ka një ndjenjë të çuditshme dhe e pazakontë.

Performanca e aktorëve është e mrekullueshme, ku në fillim çdo gjë duket e pakapshme për syrin e publikut, por me kalimin e minutave shohim një përfundim krejtësisht të ndryshëm që na dërgon në një çarmatim ndaj imazheve të shfaqura ën ekran. Ndryshe “Corona Cork Film Festival”, është një prej ngjarjeve më të rëndësishme në sferën e kulturës në Irlandë. I themeluar në vitin 1956, festivali ka mbërritur majat e suksesit dhe famës duke zgjuar kështu kërshërinë e mediave dhe artistëve në mbarë globin. Organizohet në disa nivele të fushës kinematografike, atë lokale, kombëtare dhe ndërkombëtare.

Ndërsa programi i festivalit përfshinë një larmi krijimesh, që i përkasin fushave të ndryshme si ajo e fotografisë, krijimeve të pavarura në kinematografi, dokumentareve dhe filmave të shkurtër, të cilët marrin pjesë nga mbarë bota. Festivali i Korkit, konsiderohet si ngjarja më madhore në produksionin dhe zhvillimin e filmit irlandez. Përveç, filmit “Baby”, çmimet tjera më të rëndësishme i rrëmbyen “Pentecost”, për filmin e shkurtër irlandez, “Dreaming the quiet man” për dokumentarin më të mirë, ndërsa filmi i Sofia Kopolës, “Somewhere”, përmbylli edicionin e 55-të të këtij eventi.