Problemet me frymëmarrjen, meshkujt vuajnë më shumë se femra

[EMAUS]

Problemet me frymëmarrjen, meshkujt vuajnë më shumë se femrat



Me kalimin e viteve, rastet nga tumoret malinje në rritje, shfaqen në moshë të madhe




Më shumë se femrat janë meshkujt që vuajnë nga problemet respiratore, nga sëmundjet e mushkërive dhe nga shqetësimet respiratore. Mbrapa nuk mbeten edhe fermat, në mënyrë të veçantë ato që konsumojnë duhanin. Një studim i spitalit universitar të sëmundjeve të mushkërive "Shefqet Ndroqi" me qëllim krijimin e të dhënave mbi pacientët që vuajnë nga sëmundjet e aparatit respirator kohët e fundit.

Studimi është kryer duke analizuar të dhënat e të sëmurëve që kanë marrë ndihmë shëndetësore në spitalin "Shefqet Ndroqi": për një periudhë dyvjeçare. Një nga përfundimet kryesore të studimit është se numri i femrave të prekura nga tumori malinj pulmonar është në rritje, por numri i meshkujve të prekur nga këto tumore është 4 herë më i lartë krahasuar me femrat.

Studimi

Janë studiuar 7223 të sëmurë nga të cilët 4648 meshkuj dhe 2575 femra. Pacientët janë ndarë në bazë të seksit, moshës dhe tipit të pneumonisë. Meshkujt kanë rezultuar më të shumtë se femrat në të gjitha grupmoshat, por diferenca midis tyre është më e dukshme në rritje të moshës.

Duke marrë në konsideratë të gjitha rastet, vihet re një shtim progresiv i shtrimeve me rritjen e moshës. Një pjesë e madhe e të shtruarve, 25 për qind përfaqësohet nga mosha 55-64 vjeç, si dhe një pjesë tjetër mbi moshën 65. "Duke analizuar pneumopatitë e veçanta vihet re incidenca e madhe e tumoreve malinje pulmonare midis burrave kundrejt grave 4 herë më shumë në vlera absolute", sqaron studimi.

Duke raportuar në përqindje pneumopatitë, sëmundjet respiratore, në të dy sekset vihet re incidenca më e madhe e tumoreve malinje pulmonare te meshkujt. Sipas statistikave të studimit, rastet e tumoreve përfaqësojnë 7 për qind dhe 20 për qind të atyre mashkullore.

"Ky është një fakt i njohur, por dihet që edhe në seksin femër kanceri bronkial tenton të shtohet", sqaron studimi. Nga viti 1998 deri në 2005 tumoret malinje pulmonare në seksin femër janë dyfishuar. Nuk vihet re i njëjti fenomen për sëmundjet kronike të mushkërive, zë 29 për qind të shtrimeve te meshkujt dhe 27 për qind te femrat.

Të dyja këto patologji janë të lidhura me duhanin. Duke ndarë patologjitë pulmonare në grupmosha shihet që pjesa më e madhe e problemeve vihet re në pacientë të moshave të rritura. Bëjnë përjashtim këtu, tuberkulozi dhe astma bronkiale.

Përfundime

Sipas studimit të spitalit universitar të mushkërive, pavarësisht studimeve që kryhen në këtë spital, ka mungesë të theksuar të të dhënave për disa sëmundje, siç është insuficienca respiratore, ka mungesa për të sëmurët me fibrozë cistike, jetëgjatësia e të cilëve është shtuar shumë vitet e fundit.

Numri i lartë i shtrimeve me sëmundje kronike respiratore kërkon nevojën e krijimit të rrjeteve të përshtatshme të asistencës në shtëpi që do të lejonte të reduktohej në mënyrë të ndjeshme numrin e shtrimeve dhe ditëqëndrimit në spital.