iPhone 4 i bardhë para iPhone 5?

[vaaldr1n]

Në informatën e fundit që e kemi dëgjuar sa i përket versionit të bardhë të iPhone 4, është thënë se ky model i shumë-kërkuar nga përdoruesit e Apple do të paraqitet në pranverën e vitit 2011, dhe kjo ishte deklarata zyrtare e kompanisë e cila është dhënë në muajin dhjetor të vitit të kaluar.

Prej asaj kohe, nuk është thënë apo dëgjuar shumë lidhur me iPhone 4 me ngjyrë të bardhë, mirëpo tani duket se kjo gjë është ri-aktualizuar pasi që ky model i telefonit është paraqitur në stoqet e operatorit mobil O2 në Gjermani.

Sistemi i inventarit të këtij operatori paraqet dy modelet e iPhone 4 me ngjyrë të bardhë, atë 16GB dhe 32GB, dhe kjo mund të thotë se ne së shpejti mund ta shohim këtë model të telefonit të mençur në tregun gjerman, fillimisht.

Mirëpo, në anën tjetër, kjo edhe mund të nënkuptojë se operatori gjerman është bërë gati për shitjen e telefonit, vetëm pasi që i njëjti të lansohet nga Apple, ndërsa nga kjo e fundit pritet që pasi që ta lëshojë në treg iPhone 4 të bardhë, të prezantojë edhe gjeneratën e re të iPhone, përkatësisht modelin e shumë përfolur iPhone 5.