Aktorët e famshëm kur interpretojnë njerëz të famshëm

[ardona]

Në Holivud asnjëherë nuk kanë ndaluar magjepsja me personalitetet e famshme. Shkrimtarë, politikanë, aktorë, këngëtarë, boksierë, vrasës, mbretër e mbretëresha. Për secilin prej tyre janë xhiruar dhjetëra filma. “Kleopatra”, “Gandi”, “Demi i tërbuar”, “Boni dhe Klajd”, “Amadeus”, “Lista e Shindlerit”, “Erin Brokoviç”, lista është tepër e gjatë.

Vetëm vitin e kaluar janë xhiruar më shumë se 20 filma biografikë prej të cilëve më së shumti do të mbahen në mend “Rrjeti social” për Mark Cukerberg, “Fjalimi i mbretit” për mbretin Xhorxh VI dhe “Mundësi” për boksierin Miki Vard. Magjepsja për personalitetet e famshme ka ekzistuar që moti. Uilliam Shekspir shkruante për mbretin Magbet, Riçardi II, Henri V, Mbreti Lir. Por, me paraqitjen e fotografive lëvizëse, kjo magjepsje u bart në ekranin e madh. Filmat biografikë na bëjnë më të qartë rreth personaliteteve që na magjepsin, na inspirojnë, e në disa prej tyre edhe marrim shembuj.

Prandaj edhe duam të kuptojmë diçka më shumë rreth tyre. Por, kuptohet, rol të madh ka edhe fakti se ne, si publik, në vend se të hapim librin e të lexojmë diçka më tepër për personalitet e famshme në filmat biografik, informacionet i fitojmë të përpunuara përmes skenarit. Sa është i besueshëm skenari varet nga talenti i skenaristit, por edhe nga ajo se sa dramatik duhet të jetë filmi. Për shembull, para dhjetë vjetësh, kur Anxhelina Xholi dhe Vinona Rajder luanin në filmin biografik për Suzan Kejsen “Vajza e ndërprerë”, shkrimtarja u ankua se një pjesë e madhe nga jeta e saj është paraqitur në mënyrë joreale me qëllim që filmi të bëhet më dramatik.

Arsyeja e dytë pse xhirohen filma biografikë është për të marrë vesh më shumë për personalitetet që nuk janë edhe aq të njohur për publikun si për shembull filmi “127 orë” për alpinistin Aron Ralston, i cili vetë kishte amputuar dorën pasi i ishte zënë nën shkëmb. Edhe një arsye për xhirimin e filmave biografik është që njerëzit të rikujtojnë një periudhë të caktuar të historisë përmes filmit për një personalitet të famshëm. Për shembull, në “Frost/Nikson” bëhet fjalë për periudhën pas dorëheqjes së presidentit Riçard Nikson pas skandalit “Uotërgejt” apo, për shembull filmat e Elizabetës së Parë, një nga periudhat më të mira për Anglinë kur ajo u bë superfuqi.