7 tatimorë me diploma false.

[Altin111]

Drejtoria e Tatim-Taksave denoncon në prokurori skandalin

Shtatë punonjës të Drejtorisë së Përgjithshme të Tatim-Taksave rezultojnë me diploma false. Denoncimi vjen nga tatimet, që kanë depozituar një kallëzim penal në Prokurorinë e Tiranës. Kjo e fundit ka regjistruar kallëzimin, ndërsa ka nisur një hetim të plotë rreth këtij skandali. Hetues të çështjes i kanë kërkuar Drejtorisë së Përgjithshme të Tatim-Taksave dosjet e të gjithë punonjësve për verifikime të rastit. Nga të dhënat e para ka rezultuar se shtatë prej tyre kanë marrë diploma false, çka ka detyruar grupin hetimor të fillojë një hetim të plotë.

Diplomat false

Nga verifikimet e rastit, ka rezultuar se shtatë tatimorët i kanë siguruar diplomat në Universitetin Bujqësor në Kamzë. Pritet që në ditët në vazhdim, hetuesit e çështjet të shkojnë në fakultet për verifikime të rastit. Burimet pohojnë se "protagonistët" do të thirren për shpjegime në prokurori dhe më pas do të vendoset nëse ndaj tyre do të merret ose jo masë ligjore. Hetuesit konfirmojnë se ndaj kallëzimit të Drejtorisë së Përgjithshme të Tatim-Taksave ka filluar procedimi penal, pasi në dokumentet e servirura nga prokurori ka pasur elemente të veprës penale. Por, personat e denoncuar nuk mund të merren të pandehur, pasi hetimi nuk është i plotë. Për këtë nevojiten dëshmi nga të akuzuarit dhe akuzuesit, si dhe të dhëna nga Universiteti Bujqësor i Kamzës. Hetuesit e çështjes thanë se u kanë kërkuar tatimeve dokumente të tjera, çka do të vërtetojnë kallëzimin e tyre.

Dosjet e tatimorëve

Prokuroria e Tiranës ka sekuestruar dhjetëra dosje të punonjësve të Drejtorisë së Përgjithshme të Tatimeve për verifikime të diplomave dhe të dhënave që kanë paraqitur për të ‘fituar" vendin e punës. Hetuesit thanë dje se kanë evidentuar vetëm shtatë raste me diploma false, ndërsa pritet që numri të shtohet. Administrata tatimore rezulton një nga institucionet më të goditura nga reformat. Drejtoria e Përgjithshme e Tatim-Taksave ka qenë një prej institucioneve që e ka pësuar më shumë nga fenomeni i shkarkimeve në masë të punonjësve të saj apo të denoncimeve që kanë kryer vetë tatimet. Madje, në disa raste janë kryer edhe shkarkime. Shumë ish-punonjës të tatim-taksave i janë drejtuar organit të Komisionit të Shërbimit Civil, ku kanë depozituar ankimimet e tyre për shkarkimet e padrejta të tyre nga puna. Vetëm për vitin 2007, numri i ish-punonjësve tatimorë që kanë bërë ankesa pranë KSHC-së ka arritur shifrën 135. Numri i ankesave për vitin 2007 pranë KSHC pritet të rritet në muajt në vazhdim, duke qenë se procesi i shkarkimeve në masë të punonjësve tatimorë vazhdon të jetë i pafrenueshëm.