Himni i Kosovës bëhet me tekst

**lovee** · 28-02-2011, 04:53 PM

Prishtinë 28 shkurt- Himni i Kosovës tashmë e ka edhe tekstin dhe po shpërndahet nëpër internet, saktësisht përmes faqes youtube, hap ky i ndërmarrë nga vetë kompozitori, pavarësisht refuzimit nga ana e komunitetit ndërkombëtar për tu pajtuar me tekstin e himnit shtetëror.

Teksti është i shkruar nga vetë kompozitori, Mendi Mengjiqi, tri vjet më parë, një javë para shpalljes së pavarësisë së Kosovës, më 17 shkurt, 2008.

Himni pa tekst është miratuar nga parlamenti i Kosovës më 11 qershor, 2008 dhe është përqafuar nga SHBA-të dhe 22 vendet e BE-së që kanë njohur pavarësinë e shtetit të ri.

Ky himn është përzgjedhur për shkak se nuk i referohet ndonjë grupi specifik etnik. Në Kuvendin e Kosovës, himni u votua nga 72 parlamentarë, pesëmbëdhjetë ishin kundër, ndërkaq pesë preh tyre abstenuan.

Mirëpo, kompozitori Mengjiqi ka vendosur ta sfidojë komunitetin ndërkombëtar duke e shkruar vetë tekstin dhe duke e kompletuar himnin në mënyrë që të përdoret nga kosovarët në versionin normal.

Në një bisedë për portalin ‘Dtt-net.com, që ritransmeton Zëri, ai ka thënë se ka vendosur ta shuajë heshtjen tre-vjeçare dhe ta publikojë versionin komplet të himnit.

Versioni komplet i himnit të nënshkruar nga një këngëtar australian, është vendosur në youtube javën e kaluar dhe tashmë ka nisur të përdoret nëpër ceremoni private nga shqiptarët e Kosovës.