Vodafone dhe AMC: Ja si të mbroni celularët tuaj nga viruset

**Altin111** · 07-11-2007, 07:43 AM

Programi "Spiun" që gazeta ka arritur të zbulojë nuk është i vetmi që qarkullon e që mund të përgjojë telefonat celularë me anë të

"Bluetoothit", ekzistojnë me dhjetëra "Hackera" të kësaj natyre në botë e përpos kësaj, me dhjetëra viruse të tjerë që mund të dëmtojnë telefonin kur dërgohen nga persona dashakeqës. Në adresë të kompanive Vodafone dhe AMC kanë ardhur një sërë ankesash sidomos për ato viruse që bllokojnë telefonin, të cilat janë marrë edhe me anë të MMS-ve. Këtë pohojnë burime të sigurta nga të dyja kompanitë. Për këta persona është dhënë asistenca përkatëse nga teknikët në dyqanet e kompanive. Kjo për rastet kur viruset nuk kanë qenë me pasoja "fatale" dhe teknikët kanë ditur të sjellin telefonin në gjendjen e mëparshme. Ndërkaq prej Vodafone dhe AMC ofrohen një sërë këshillash në mënyrë që abonentët të mos bëhen pre e këtyre problemeve. Kështu, sipas specialistëve, për t'u mbrojtur ndaj viruseve apo programeve spiune, këshillohet mbajtja e "Bluetoothit" fikur, mospranimi i mesazheve që vijnë nëpërmjet "Bluetoothit" ose mms nga persona që nuk i njohin. Veç kësaj teknikët këshillojnë edhe mosinstalimin e file*.sis nga persona që nuk i dihet origjina. "Nëse abonentët zbatojnë këto këshilla ata nuk mund të marrin asnjë prej viruseve të rrezikshme që dëmtojnë telefonin dhe mund të çojnë deri në prishjen e plotë të tij. Nga ana tjetër atyre nuk mund t'u përgjohet celulari nga programe të posaçme që qarkullojnë", sqarojnë burimet e sigurta pranë dy kompanive. Më të qetët në të gjithë situatën e krijuar janë ata persona që celularin e kanë model të vjetër e që nuk ka opsionet e avancuara. Përveçse mund t'u përgjohet me një urdhër gjykate, ata janë rehat prej mënyrave të tilla "Spiune" që u përgjojnë celularin. Mesa duket të kesh një celular të shtrenjtë ka koston e vet. Kosto kjo që në rastin konkret është jo e vogël për personin që mund të bëhet viktimë e të tilla gjërave që cenojnë rëndë privatësinë e intimitetin. E sidomos në vendin tonë, ku pak duhet që më të tilla forma aspak diskrete t'i shkatërrohet imazhi, familja e pse jo edhe e gjithë jeta personave të ndryshëm. Bërja publike e mesazheve komprometuese do të ishte forma më e mirë për të nxjerrë inate e për hakmarrje personale.