Me pensionin që marrim, jetojnë nën minimumin jetik.

[Altin111]

Shpenzimet e një pensionisti: Drita, ujë, ilaçe, autobus dhe... bukë

"Me pensionin që marrim, jetojmë me kushtet nën minimumin jetik"

Pensionistët në Shqipëri janë një rast i veçantë. Janë një nga kategoritë e veçanta që jetojnë me të ardhura nën minimumin jetik. Dhe kjo, jo se s‘kanë punuar, por duke llogaritur punën e tyre, vjetërsinë apo kontributin, shteti ka vendosur t‘i shpërblejë vetëm me 10 mijë lekë të reja në muaj, për t‘i kthyer në këtë mënyrë, të paktën vlerën e sigurimeve, që kanë derdhur gjatë kohës së punës. Pagesa e pensionit me 10 mijë lekë të reja ndodh kur jeton në qytet, por nëse je në fshat, duhet të mjaftohesh vetëm me gjysmën e tyre, 5 mijë lekë të reja. Plot 10 mijë lekë në qytet ose 5 mijë lekë të reja në fshat është pensioni minimal, sepse sipas profesioneve dhe "fateve" ka edhe pagesa më të larta.

Por, vetë pensionistët dhe invalidët, një tjetër kategori e paguar pak, kanë përllogaritur shpenzimet e tyre gjatë një muaji dhe blerjet ose pagesat që nevojiten të kryhen çdo ditë. Këtë radhë, duke përfshirë edhe pagesat e urbanit, që tashmë nuk pranon asnjë dokument veç pagesës 20 lekë.

Secilit pensionist i duhet që të heqë veç nga 150 deri në 2 mijë ose në 3500 lekë çdo muaj, vetëm për ilaçet e përditshme, të nevojshme për të mbajtur zemrën nën kontroll, insulinën në diabet apo problemet e tjera kronike në këtë moshë. Po ashtu, ai duhet të paguajë 2500-3500 lekë të reja energji elektrike dhe deri në 500 lekë pagesa e shpenzimit të litrave të ujit.

Çdo ditë, i duhet të paguajë rreth 40 lekë të reja transport me autobus, 60 lekë për bukën e përditshme, 50 lekë kos, 50 lekë kafen e mëngjesit dhe në rastin më të mirë ndonjë kg mollë a portokall. Të gjitha këto nuk mund të blihen me 10 mijë lekë pension në muaj, por dy pensionistë në shtëpi arrijnë që të kullandrisen me pagesën e dytë për të blerë ndonjë miell, sheqer, oriz, patate, domate, e në raste festash edhe me ndonjë porcion të "familjes së mishit".

Pothuajse e njëjtë është edhe pagesa me të cilat shteti paguan invalidët. Sipas tyre, pagesa minimale te një invalid i plotë pune është 11300 lekë dhe shpenzimet më minimale mujore janë 22750 lekë në muaj. Me këto, invalidët paguajnë energji elektrike, 30 ditë bukë, ilaçe, telefon, ushqime të zakonshme për të mbijetuar. Pensioni mesatar mujor i më shumë se 19 mijë invalidëve të plotë është 11 300 lekë në muaj. Pensioni mesatar mujor i më shumë se 14 mijë invalidëve të pjesshëm është 5600 lekë në muaj. Pagesa mesatare mujore e rreth 3 mijë invalidëve të ish-kooperativave bujqësore është 2900 lekë në muaj. Mosha mesatare e tyre është 40.3 vjeç. Përbërja familjare e kësaj kategorie është 4.7 deri në 5.2 persona në familje. Rreth 88 për qind e këtyre invalidëve të punës janë kryefamiljarë. Mesatarisht 3 për qind e tyre janë burrë e grua invalidë. 5 për qind nuk janë kryefamiljarë dhe vetëm 4 për qind nuk kanë detyrime ndaj fëmijëve. Pas gjithë këtyre shpenzimeve, invalidëve u duhet të bëjnë edhe rrugë në këmbë, ose t‘i shtojnë listës së shpenzimeve edhe paratë për transportin urban, sepse privati tashmë nuk ua njeh më dokumentet, që tregojnë gjendjen e tyre fizike.

Të gjitha kërkesat e invalidëve janë dëgjuar dje përpara Kryeministrisë. Me parulla ata kanë protestuar, duke kujtuar edhe njëherë gjendjen e tyre të vështirë ekonomike. Ata kanë theksuar se veç gjendjes së vështirë ekonomike dhe mungesës së vendeve të punës, tashmë, zbriten edhe nga autobusi. Shoqata e Invalidëve i ka kërkuar Kryeministrit rritjen e pensionit dhe njëkohësisht edhe lehtësi, si marrja e kredive me interesa të ulëta. Shoqata e Invalidëve i ka lënë qeverisë 5 ditë afat për reflektim, në rast të kundërt do të nisin bllokimin e akseve rrugore.



Tabela 1



Menyja e pensionistit


Bukë 60 lekë

Kos 50 lekë

Fruta/perime 70 lekë

Kafe 50 lekë


Pagesa e autobusit 40 lekë


Ilaçe 150-2 mijë lekë

Energji elektrike 2500-3500 lekë

Ujë i pijshëm 400- 500 lekë


Tabela 2



Shpenzimet minimale mujore të një invalidi të punës së plotë


2800 lekë energji elektrike (sqarojmë se 94% e të gjithë invalidëve të punës paguajnë energjinë)


30 ditë x 3 bukë në ditë x 80 lekë = 7200 lekë bukë në muaj, 4700 lekë ilaçe në muaj, 650 lekë ujë në muaj, 400 lekë telefon në muaj, 7000 lekë ushqime në muaj


Pagesa minimale tek një invalid i plotë pune është 11300 lekë dhe shpenzimet më minimale mujore janë 22750 lekë në muaj

[anna]

eshte e vertete qe jetesa ne shqiperi eshte shume e veshtire si per pensionistet por ashtu edhe per pjesen tjter te popullsise. rrogat jane minimale dhe çmimet jane te larta te cilat jo shume familje arrijne te ushqehen rregullisht. por shpresojme qe do te behet ndonji gje per te ndihmuar gjithe shqiptaret ne shqiperi