Finlandë, 18-vjeçari masakër në shkollë.

[Altin111]

Nxënësi hap zjarr, tetë viktima. Katastrofa ishte lajmëruar në YouTube

Të paktën tetë persona janë vrarë dhe disa të tjerë janë plagosur në një shkollë në jug të Finlandës, pasi një person hapi zjarr. Bilanci i viktimave vjen nga zyrtarët e spitalit të Tuusula-s, qytet ku ndodhi incidenti, 50 kilometra në veri të kryeqytetit Helsinki. Mediat finlandeze raportojnë se zjarri është hapur nga një 18-vjeçar në shkollën e mesme "Jokela" të qytetit. Godina e shkollës u evakuua menjëherë dhe inspektori i policisë, Tero Haapala, tha se situata tani është nën kontroll. Ai theksoi se nuk ka më asnjë rrezik, por pa komentuar lajmet për fatin e 18-vjeçarit të armatosur. Eero Hirvensalo, shefi i ekipit mjekësor që u angazhua për t‘u përballur me situatën, tha se shtatë persona kanë vdekur si pasojë e të shtënave, por numri i të vdekurve mund të rritet më tej. Ai tha se të paktën një person ishte i plagosur rëndë dhe se 10 të tjerë kishin plagë më të lehta. Ndërkohë, burime anonime nga policia finlandeze bënë të ditur se edhe personi i armatosur gjendej në spital, pasi pas masakrës kishte qëlluar veten. Një nga të qëlluarit thuhet se është edhe drejtori i shkollës. Zëdhënësi i Bashkisë së Tuusula-s tha se 18-vjeçari kishte hapur zjarr në një orë mësimi në shkollën e mesme, që numëron plot 400 nxënës të moshës 12-18 vjeç. Nxënësit dhe stafi i shkollës ishin përfshirë menjëherë nga paniku dhe një numër policësh të armatosur rëndë u panë më pas të mbushnin skenën. Kim Kiuru, një mësues në "Jokela", tha se kujdestari i shkollës kishte njoftuar nëpërmjet sistemit të lajmërimit të shkollës se të gjithë nxënësit duhet të qëndronin në klasat e tyre. "Unë dola në korridor dhe po dëgjoja instruksionet e mëtejshme", tha ai për radion finlandeze. "Më pas pashë një person të armatosur që po vraponte dhe më duket se kishte në dorë një armë të kalibrit të vogël. Po vraponte drejt meje në korridor, por vetëm kaq pashë, pasi u largova me të shpejtë nëpër shkallë dhe vrapova në një drejtim të kundërt. Nuk mund ta besoja, një nxënës të cilit unë i kisha dhënë mësim, po vraponte drejt meje, duke bërtitur dhe me një pistoletë në dorën e tij". Ai rrëfen më pas se kishte parë trupin e një gruaje të shtrirë në dysheme, ndërsa menjëherë më pas u kishte thënë nxënësve të dilnin nga ndërtesa duke u hedhur nga dritaret. Ende nuk është e qartë ndërkohë nëse 18-vjeçari që ka qëlluar është mes të vdekurve apo jo. Sipas raporteve, një video e titulluar "Masakra e shkollës së mesme Jokela, 11/7/2007", ishte postuar në YouTube nga një 18-vjeçar, gjatë dy javëve të shkuara. Videoja tregon pamjen e një godine që shikonte nga një liqen dhe dy foto të një të riu që mbante në dorë një pistoletë. Personi që e kishte postuar këtë video e quante veten një "Darvinist social", i cili do të eliminonte të gjithë të dobëtit. Ai përdorte në internet emrin "Sturmgeist89", që do të thotë në gjermanisht "shpirti i stuhisë". Videoja tani nuk gjendet më në internet dhe policia ende nuk ka dhënë komente rreth saj. Pavarësisht se Finlanda ka nivelin më të lartë të pronësisë së armëve të zjarrit në botë, incidentet e dhunshme janë shumë të rralla në shkollat finlandeze. Sipas mediave vendase ka pasur katër therje në shkolla që nga 1999-ta. Asnjë prej tyre nuk ka rezultuar fatale. Ndërkohë, ngjarja më e zhurmshme në vend ka ndodhur në 2002-shin, kur një i ri vrau gjashtë persona, e më pas edhe veten në një shpërthim në supermarket në Helsinki.