Të sëmurët mendorë, në sulm

[Altin111]

Një grua me probleme psikike sulmon një fëmijë. Një burrë i hap kokën fqinjit

Policia e Fierit është alarmuar dje në mesditë, si shkak i ngjarjeve të rënda, që kanë pasur për protagonistë dy të sëmurë mendorë: një grua që vuante nga skizofrenia dhe një burrë, me zhvillim të mangët mendor, diagnoza e të cilit është oligofreni.

Nga burimet zyrtare të policisë së Fierit mësohet se një fëmijë 10 vjeç është rrezikuar me mbytje nga 52-vjeçarja Drita Shtëmbari, e cila, më pas, qëlloi me mjete të forta një polic, që ndërhyri për të shpëtuar vogëlushin. Disa orë më vonë, 50-vjeçari Pandi Mishtaku, një person me zhvillim mendor të vonuar, ka qëlluar me sëpatë një 70-vjeçar, duke i shkaktuar atij plagë të rënda në fytyrë.

Ngjarja e parë ka ndodhur rreth orës 10.30 të paradites së djeshme, kur Drita Shtëmbari, me banim në fshatin Daullas të rrethit të Fierit, i ka bërë pritë në një nga rrugicat e fshatit 10-vjeçarit Dritan G.

Gruaja e sëmurë mendore ka tentuar ta vrasë vogëlushin, duke e mbytur me duar. Në këtë moment, në ndihmë të fëmijës ka ndërhyrë një punonjës policie i Komisariatit të Fierit, i cili kalonte rastësisht në këtë rrugicë fshati, pasi kthehej nga puna.

Sipas deklaratës së policit, ai ka mundur të heqë fëmijën nga kthetrat e 52-vjeçares Drita Shtëmbari. Më pas, ai ka vijuar rrugën për t‘u larguar, por gruaja e ka qëlluar me mjete të forta, duke e plagosur rëndë. "Një mori tullash dhe një copë hekuri kanë fluturuar mbi kokën time, duke më plagosur mjaft rëndë. Unë u rrëzova dhe për disa momente nuk mbaj mend asgjë. Më kanë dërguar në spital, ku dhe u kthjellova për atë që më ndodhi", tha dje polici Vladimir Xega.

Pas marrjes së dëshmisë së punonjësit të policisë, si dhe shoqërimit të vogëlushit të rrezikuar, një furgon i grupit të gatshëm të policisë ka shkuar në fshatin Daullas, ku ka kryer arrestimin e 52-vjeçares Drita Shtëmbari.

Sipas burimeve policore, mësohet se Drita Shtëmbari njihet si person me probleme të mëdha mendore. Edhe herë të tjera ajo ka sjellë shqetësime për banorët e zonës, si dhe familjarët e saj. Ndërkohë që ajo është izoluar në dhomat e paraburgimit të Komisariatit të Policisë Fier, nuk ka reshtur së kërcënuari edhe rojet e burgut. Këta të fundit kanë kërkuar përforcime, si shkak i agresivitetit të Drita Shtëmbarit.

Vetëm tri orë pas kësaj ngjarjeje, një tjetër episod i ngjashëm ka ngjarë në Komunën e Libofshës në rrethin e Fierit. Sipas burimeve zyrtare të policisë, 50-vjeçari Pandi Mishtaku ka qëlluar fqinjin e tij 70 vjeç, Kadri Lalaj. Burimet e policisë së Fierit tregojnë se Mishtaku njihet si person me zhvillim të vonuar mendor, por ai nuk kishte pasur kurrë sjellje të dhunshme më parë. Mësohet se Mishtaku ka rrëmbyer sëpatën dhe ka qëlluar 70-vjeçarin, kur mes këtij fundit dhe familjarëve të të sëmurit mendor kishte plasur një debat i ashpër për çështje pronësie. I sëmuri e ka qëlluar në fytyrë dhe në dorë fqinjin 70-vjeçar, i cili është dërguar në gjendje të rëndë në spitalin e Fierit. Pas pak minutash, policia ka arrestuar agresorin, i cili, sipas familjarëve, vuan nga një prapambetje e thellë mendore dhe nuk flet prej 25 vjetësh.

Pandi Mishtaku njihet nga të gjithë në rrethin e Fierit si "maratonomaku", pasi ai, me ditë të tëra shëtit në këmbë duke përshkuar distanca të largëta drejt qyteteve fqinje me Fierin. Madje, njëherë ai ka shkuar deri në Elbasan në këmbë dhe është rikthyer po në këmbë në shtëpi.

Pandi Mishtaku do të përgjigjet tashmë për veprën penale të "vrasjes së mbetur në tentativë", ndërsa 52-vjeçarja Drita Shtëmbari do të përgjigjet për dy vepra penale: "vrasje e mbetur në tentativë" dhe "goditje për shkak të detyrës".

Në fillim të javës së ardhshme të dy duhet të dalin përpara Gjykatës së Shkallës së Parë në Fier për vlerësimin e masës së sigurisë. Nisur nga shëndeti i rënduar mendor, avokatët e dy të akuzuarve mund të kërkojnë lirimin e tyre, por ka pak shanse që gjykata të vendosë ndjekjen në gjendje të lirë, në një kohë kur krimi monstruoz i Peshkopisë është ende i freskët në kujtesën kolektive.

Në fund të muajit tetor, Shpëtim Ziza, 19 vjeç, i cili sipas mjekëve vuante nga oligofrenia, përdhunoi dhe vrau një fëmijë 10 vjeç në Peshkopi. Pas krimit u zbulua se vrasësi kishte qenë disa herë i arrestuar, por ishte lënë i lirë për shkak të sëmundjes së tij mendore.

Kjo ngjarje ka vënë në pikëpyetje procedurat e ndjekura deri më sot nga drejtësia shqiptare, në rastet kur të akuzuar kanë qenë njerëz me probleme mendore. Këshilli i Lartë i Drejtësisë, me propozim të Presidentit të Republikës, ka nisur shqyrtimin e dosjes së Shpëtim Zizës, për të nxjerrë përgjegjësinë e gjykatave në rastin e tij. Pas kësaj, pritet që të ketë ndryshime edhe në ligj, për të parandaluar krimet që mund të kryhen nga të sëmurë mendorë.