Shkollë tmerri në Sarandë

[Altin111]

Dëshmia tronditëse: "Mësuesit" ishin xhelatë, na hidhnin minj në fytyrë

Sarandjotët nuk ndihen më të sigurt. Dje pothuajse të gjithë fëmijët e shkollave nëntëvjeçare janë shoqëruar nga prindërit në mëngjes dhe në drekë. Kanë frikë se gruaja me paruke dhe djali fotograf ua marrin fëmijët e ua torturojnë. Duket një skenar i denjë për filma horror, por frika që ka pushtuar sarandjotët ka një bazë. Sado e çuditshme, ka një bazë, dhe për këtë janë vënë në lëvizje edhe organet e policisë dhe prokurorisë. Në qytet thonë se për 20 ditë radhazi, 20 nxënës nga dy shkollat 9-vjeçare të qytetit, "9 Tetori" e "Adem Sheme", janë detyruar me forma mashtruese nga persona ende të paidentifikuar të ikin nga oborret e shkollave dhe të mbyllen në një shtëpi të fshehtë përdhese, që gjendet poshtë rrugicave të spitalit të Sarandës. Prindi Sulo Sinani dhe fëmija i tij 8-vjeçar, Marjo Sinani, kanë qenë të parët që kanë bërë denoncimin në media dy ditë më parë, ndërkohë që kanë bërë denoncim dhe janë dëgjuar edhe në Komisariatin dhe në Prokurorinë e Sarandës. Prej tyre nuk është konfirmuar asnjë i identifikuar dhe kanë qenë të rezervuar në komunikimin me mediat, për të mos kompromentuar procesin e hetimit.

Ende pa dalë tërësisht nga gjendja e rëndë psikike nëpër të cilën ka kaluar, pas mbajtjes për gati tri javë rresht në shtëpinë sekrete, fëmija 8-vjeç, Marjo Sinani, atë që pas "gërmimeve" ua ka thënë prindërve, e ka treguar me çiltërsi duke riprodhuar skenat që është detyruar të përjetojë. "Isha duke luajtur ‘bam‘ me shokët në oborrin e shkollës, ka treguar ai, kur pashë që një grua flokëverdhë, e shëndoshë, që nuk e njihja, më kërkoi të veja tek ajo. Nuk e njihja për mësuese, por më tha se unë i pëlqeja si nxënës dhe për këtë duhej të veja në klasën e asaj. Më mori përdore një djalë i gjatë që e njija se vinte na bënte fotografi në shkollën tonë dhe më çoi në një shtëpi që nuk ishte larg nga shkolla ime ‘9 Tetori‘". Atje fëmija thotë se gjeti edhe nxënës të tjerë, më të vegjël dhe më të mëdhenj se ai, ndërkohë që bën fjalë edhe për një klasë tjetër ku bënin "mësim" djem e vajza të klasave të larta. Në riprodhimin e ngjarjes, fëmija Marjo kujton se puna e parë niste nga dorëzimi i lekëve që kishin marrë nga shtëpia në mëngjes, pastaj "mësuesja" me paruke u kërkonte të ngriheshin në dërrasën e vendosur në një faqe të murit të shtëpisë e të thoshin mësime të kaluara. Rrëfimi i fëmijës vazhdon duke thënë se gjatë tërë kohës i shoqëronte dhuna, edhe kur ndodhte të kthenin kokën anash apo mbrapa. "Një ditë më qëlloi fort ajo gruaja dhe unaza më nxori gjak", dëshmon fëmija. Fjalët e ndyra që ka turp t‘i përsëritë ashtu siç ia thoshin, ishin bërë një gjë e zakonshme për "mësuesen" enigmatike. Gjatë rrëfimit, shpesh Marjo në vend të emrit të panjohur të mësueses me paruke e quan atë "ajo kafsha". Kur e pyesim përse e quan kështu, ai thotë se sillej si xhelate me fëmijët. Pjesë e "mjeteve mësimore", që përdoreshin edhe si mjet terrorizimi, ishin minjtë e gjallë, që thuhet se u hidheshin në fytyrë fëmijëve. Marjo ka treguar se minjtë i mbanin në një kafaz dhe ata u përplaseshin për fytyre pa bërë asgjë. "Na nxirrnin vetëm një minutë jashtë në kohën e pushimit të madh në bahçen e shtëpisë, të mbuluar me pemë, dhe gjithë kohën e kalonim brenda në klasë", ka pohuar fëmija, duke pranuar se edhe mërziteshin edhe trembeshin. "Po ç‘të bënim?", pyet ai me naivitet fëmije.

Një ditë pas denoncimit, shtëpia e fshehtë ka ndërruar pamje. Policët e gjejnë bojën të njomë


Dyshohet për një sekt fetar, por policia nuk ka asnjë provë në dorë


Deri tani, nga dëshmitë e njërit prej fëmijëve mësohet se në "shkollën sekrete" është ushtruar dhunë verbale dhe fizike dhe "mësuesit" i kanë dhënë shumë rëndësi disiplinës.

Askush prej fëmijëve të rekrutuar për atë që midis tyre i thoshin "shkolla tjetër", nuk guxoi të mos vinte dhe të mungonte dhe një ditë të vetme. "As ajo gruaja dhe as ai fotografi që më çoi atje në fillim, nuk na porositën të mos tregonim ku vinim gjatë kohës së mësimit, por unë për vete kisha frikë të tregoja të vërtetën në shtëpi. Babai do të më zhdëpte në dru dhe unë kisha shumë frikë të tregoja", pranon fëmija Marjo. Ai thotë se "ne bënim sikur vinim në shkollën ku kishim shokët e fillimit të vitit, por futeshim në atë ‘shtëpinë tjetër‘, me dy klasa".

Policia tregohet e kujdesshme të mos hedhë hipoteza pa pasur ende në dorë fakte për ngjarjen. Megjithatë, një oficer i policisë gjyqësore, që po merret me këtë hetim, thotë se dyshimi kryesor lidhet me ndonjë sekt fetar që kërkon të rekrutojë fëmijë dhe së pari i mëson ata të jenë të disiplinuar.

Në përpjekje për të zbardhur të vërtetën, policët kanë shoqëruar dje Marjon 8 vjeç në atë shtëpinë me portën prej llamarine në ngjyrë hiri. Por djali thotë se çdo gjë tani është ndryshuar. "Është lyer, kanë hequr bankat dhe kanë vënë një lule mbi tavolinën që ishte", tregon Marjo. Ai thotë se edhe kur xhaxhi polici vuri gishtin në mur, i mbeti boja në dorë. Marjo ka qenë kurajoz dhe i zoti madje që të kundërshtojë edhe njerëzit që ka gjetur të banojnë tani në atë shtëpi, të cilët me sa duket kanë dashur ta ngatërrojnë me shtëpi të tjera përreth, për t‘i shpëtuar përgjegjësisë penale që i pret, në se vërtetohet se shtëpia e tyre është kthyer në bazë grumbullimi dhe terrorizimi të fëmijëve të mitur, me qëllime të errëta. Banorë të afërt me shtëpinë e dyshuar se përdorej si "shkolla tjetër", tregojnë se kanë dëgjuar të flitet për njerëz që aty përreth bënin organizime dhe veprime të dyshimta. "Kam dëgjuar se vinin në grupe dhe futeshin në një shtëpi njerëz që thoshin se ishin të një sekti fetar", shprehet një banor i këtij blloku.


Prindi që denoncoi: Më ofruan para për të heshtur


Sulo Sinani, prind i njërit prej fëmijëve të terrorizuar, është dy herë i vendosur për ta denoncuar ngjarjen e shëmtuar dhe kriminale që ndodhi me shkollarët e hequr nga shkolla për qëllime të errëta. "E para, thotë ai, se çdo gjë e keqe mund t‘i ndodhte tim biri e të tjerëve që ishin të mbyllur me të në shtëpinë e fshehtë". Por edhe më të vendosur e më jotolerant e ka bërë këto ditë një ofertë e ndyrë që i është propozuar. "Më erdhi një njeri që m‘u hoq si dashamirës e më bëri një pyetjen djallëzore, shprehet Sulua. Më pyeti: Sikur të të thonë sa lekë do që të mbyllet ajo që ndodhi"? Përgjigjja e tij ka qenë se edhe me 100 milionë lekë nuk ia prish njeri mendjen për t‘i shkuar problemit deri në zbulimin e autorëve të rrëmbimit dhe keqtrajtimit e terrorizimit të fëmijës. Filli i asaj që ishte duke ndodhur u zbulua kur mësuesi Neron Shehu i shkoi një ditë në lokalin privat që ka marrë me qira në agjencinë e udhëtarëve dhe i thotë: Ti kë nuk më fute mik që të ta merrja djalin në klasën time, tani si e bëre që e ke çuar djalin në shkollë private"? Prindin e ka shokuar kjo dhe i është përbetuar se ai e ka dërguar Marjon si zakonisht në shkollën "9 Tetori". Atëherë mësuesi Shehu i ka thënë se për tri javë djali nuk i ka ardhur në klasë. "Shiko, se diçka po ndodh me djalin, diku të shkon e dikush abuzon me të". Nga ai çast, Sulo ka bashkëbiseduar me djalin dhe ai i është rrëfyer me lot në sy e duke kërkuar të falur që nuk ka treguar të vërtetën. Sondazhet e prindit kanë shkuar deri në kontrollimin e detyrave të fëmijës në datat e munguara nga mësimi me mësuesin e vet. Dhe ka mbetur i befasuar kur sheh edhe detyra të bëra, edhe vlerësim me notë në fund të faqes. "I bëja vetë të gjitha edhe detyrat edhe notat, që të mos më kuptonit ju", ka treguar djali. Dje, kur sapo ishte marrë vesh se çfarë punonin me fëmijët disa njerëz në qytetin e Sarandës, duar të fshehta janë ngritur mbi mësuesin, Neron Shehu, me një eksperiencë 42-vjeçare në ciklin fillor. Ai është qëlluar në mënyrë provokuese, për ta implikuar në një sherr të llogaritur se do të shpërthente. Por ai ruajti përmbajtjen dhe qetësinë karakteristike, ndërkohë që gjendej në stadiumin e lojërave me dorë, ku organizohej dita finale e kampionatit të minifutbollit midis shkollave. Ndërkaq, krerët e shkollave tetëvjeçare të Sarandës janë thirrur në polici e prokurori për të dëshmuar mbi ngjarjen e pazakontë. Oborret e të dyja shkollave 9-vjeçare të Sarandës kanë qenë të mbushura dje jo vetëm me nxënës, por edhe me prindër që kishin shtuar kujdesin dhe merakun për fëmijët, duke i shoqëruar ata si në mëngjes, apo në drekë. Për ata të ciklit të ulët, edhe në marrjen e tyre nga shkolla. Kjo psikozë paniku dukej që nuk ishte vetëm pjesë e normalitetit të funksionimit të shkollës "9 Tetori". Drejtori Lefter Gjini reflektonte një ndjenjë shqetësimi për këtë klimë mosbesimi. Gjini thotë se mësuesi Neron Shehu dhe ai vetë, duke komunikuar me të, kanë qenë ndër kontribuuesit e parë të ndaljes dhe zbulimit të ndodhisë së shëmtuar. Ai thotë se me rastin po merren organet e specializuara. Drejtori Gjini thotë se deri tani ka rezultuar që vetëm një fëmijë është rekrutuar në shkollën e improvizuar për qëllime të panjohura. Ndërsa në shkollën tjetër, atë "Adem Sheme", zëvendësdrejtorja Valbona Lipe, që kontaktuam në mungesë të drejtorit Milto Anagnosti, na tha se nuk mund të shprehej, pasi "me këtë çështje është marrë vetë drejtori, i cili është thirrur edhe në prokurorinë e rrethit".

[Altin111]

Mungon ne shkolle, rrefimet e 10-vjecarit

E Premte, 09 Nentor 2007

Nje femije i klases se trete, me iniciale R.S., ka munguar tri jave ne shkolle, ndersa i ka treguar policise nje histori, gati te pabesueshme. Ai ka thene, se eshte derguar ne nje banese aty afer dhe eshte mbajtur, se bashku me femije te tjere, i kercenuar te mos tregonte. Gjithcka ka dale ne drite, kur femijes i eshte kerkuar se ku kishte kaluar ato tri jave, qe nuk kishte shkuar ne mesim. Policia beri te ditur dje, se po verifikohet cdo element i historise se treguar nga femija, i cili, sipas uniformave blu, ka pak gjasa qe te jete e vertete.

Gjithcka ka nisur, pasi mesuesi i djalit ka sinjalizuar prinderit per mungesat e 10-vjecarit. Insistimit te babait, djali i eshte pergjigjur se e kane kercenuar te mos tregoje, cka e ka detyruar prindin te paraqitet ne polici. Sipas drejtorit te policise se qarkut te Vlores, Vehbi Bushati, femija eshte marre ne pyetje ne prani te psikologut dhe prinderve. Ai ka treguar, se nuk shkonte ne shkolle, pasi bente mesim diku tjeter, ne nje shtepi perballe me shkollen, ne nje dhome me banka, tavolina e karrige. Sipas deklarimeve te bera prej tij, ai mesonte me mesuese Mozen, qe nga pershkrimi i femijes ishte e shendoshe dhe bionde. Ndersa te klasa e shtepise perballe ate e conte Koli, nje person qe rrinte gjithmone tek shkolla. Sipas femijes, ata aty benin mesim, shihnin shume femije dhe mesuese Moza i bertiste shpesh dhe iu fliste me fjale te pista, madje i kercenonte dhe i trembte me disa minj, qe i mbante ne kafaz. Drejtori Bushati thote, se policia dhe prokuroria e Sarandes kane nisur te bejne verifikimet perkatese. Femija eshte cuar te tregoje banesen, ku bente mesimin, dhe nga verifikimet e bera rezulton se ajo ne asnje dhome te saj nuk ka klasa me banka e karrige, por shtepia banohej nga nje i moshuar. Me pas femija ka treguar nje grua bionde te shendoshe, qe e ka njohur si mesuese Mozen, por ka rezultuar se ajo kishte nje emer tjeter. “Policia ka bere verifikime ne te gjitha shkollat e Sarandes, - tha Bushati, - dhe nuk rezultojne femije te tjere te jene pjese e klases se treguar nga femija R.S.

Nga verifikimet e bera deri tani dhe nga deklarimet e marra nga shume persona, deklarimet e femijes R.S. nuk perputhen me faktet”. Sipas policise, i vetmi fakt i sigurt eshte, qe femija ka munguar tri jave ne shkolle dhe per te zbardhur “arratine” e tij vazhdojne hetimet. Ornela Hila

[Altin111]

Sarandë, thellohet misteri i "shkollës"

Drejtoresha e jetimores i ndalon hyrjen në institucion jetimit që akuzohet

Ndërkohë që organet e specializuara veprojnë me maturi e duke i siguruar vetes qetësinë e nevojshme për vlerësimin e provave të grumbulluara lidhur me shkollën "ilegale" të denoncuar nga një prind dhe një fëmijë i përfshirë në të, jashtë kësaj sfere, në stafet pedagogjike dhe masën e nxënësve, është e dukshme rritja e kujdesit dhe e vëmendjes për fëmijët, shtimi i kontrollit për çdo lëvizje të tyre. Dukuria më e parë dhe më e dallueshme është shoqërimi i fëmijëve, si në çuarjen edhe në marrjen nga shkolla. Ndërkohë, fletoret e mësuesve me numrat e celularëve të prindërve të nxënësve shihen të rifreskohen dhe të hyjnë shumë më tepër në punë, duke përdorur kështu një element të rëndësishëm të komunikimit mes mësuesve dhe prindërve, që jashtë situatës së re ishin harruar e neglizhuar në jo pak raste. E keqja është se si në çdo rast kur ndodh diçka, teprohet me klimën e alarmit dhe ekstremizohet kujdesi që tregohet, gjë që sjell stres, sidomos te fëmijët e moshave të vogla.

Hetimet

Në Komisariatin e Policisë së Sarandës thonë se me t‘u marrë kallëzimi nga prindi dhe fëmija, specialistët e policisë kriminale kanë nisur hetimet. Madje, janë respektuar edhe të drejtat specifike të fëmijëve sipas konventave ndërkombëtare. Duke vlerësuar të veçantën e rastit dhe shkallën e tronditjes psikike të fëmijës që ka rrëfyer, në seancat e pyetjes së tij ka qenë i pranishëm edhe psikologu. Nga këto burime thuhet se deri tani janë verifikuar personat e përfshirë në ngjarje dhe pritet zbardhja e hetimeve nga prokuroria. Burime nga Prokuroria e Sarandës konfirmojnë se organi i akuzës ka marrë në dorëzim deponimin e Policisë së Sarandës për ngjarjen e ndodhur në shkollën mistike dhe tashmë sipas tyre, dosja dhe provat janë duke u hetuar për të provuar në se kemi të bëjmë me elemente të veprës penale apo jo.

Jetimorja

E vërteta është se në sipërfaqe nuk ka dalë një emër i dytë fëmije, që ashtu si 8-vjeçari Marjo Sinani, të jetë evidentuar si i rrëmbyer dhe i përfshirë në organizmin e "shkollës tjetër". Në shkollën e tij thonë se e kanë çuar klasë më klasë për të rinjohur shokët e pretenduar të shkollës misterioze. Por ai nuk ka vënë gisht diku, megjithëse përsërit se kanë qenë 20 djem e vajza në atë shtëpinë e fshehtë ku ka thënë se rriheshin, torturoheshin, grabiteshin dhe prisnin minj në fytyrë. Pranohet se mosorientimi i tij mund të vijë edhe nga tronditja që ka përjetuar, por gjithsesi nga drejtuesit e shkollës "9 Tetori" këmbëngulet se rasti i Marjo Sinanit është i vetmi dhe nuk ka të dytë. Me këtë logjikë, i bie që 19 nxënësit e tjerë të pretenduar të kenë qenë nga "shkolla lart", sikurse thuhet shpesh për "Adem Shemen". Madje nxënës të kontaktuar atje na thanë se ata janë nga radhët e "konviktorëve", duke parakuptuar me këtë fëmijët e Shtëpisë së Fëmijës, një institucion përballë, me rreth 50 fëmijë, ku të paktën 30 prej tyre ndjekin mësimet në shkollën "Adem Sheme". Por këtë mundësi e ka përjashtuar në mënyrë kategorike drejtorja Elida Vogli, e cila ka thënë dje për "Shqip" se çdo lëvizje e këtij kontingjenti fëmijësh është e kontrolluar në mënyrë të shumëfishtë. "I ndjekim lëvizjet e fëmijëve tanë si me kompjuter", - u shpreh Vogli, duke dhënë si argument të kësaj se edukatorë të institucionit dinë në çdo çast ku gjendet secili prej fëmijëve në 24 orë të ditës. "Ka ikur koha kur me ta spekulohej", tha ajo. Vogli ka thënë se pragu i këtij institucioni nuk kapërcehet pa leje dhe pa u evidentuar edhe për njerëz që janë rritur këtu, sikurse është edhe Sokol Jonuzi, një ndër personat e denoncuar me emër si i përfshirë në skandalin e fundit. "Kërkoi të vinte e të bënte dush këto ditë, por unë nuk e lejova, duke qenë se mbi të bien dyshime të tilla", u shpreh drejtorja Vogli.