Durrës, një në dhjetë nxënës merr drogë.

[Altin111]

Sondazhi i PNUD-it alarmon policinë. Shtohen shërbimet pranë shkollave

Lëndët narkotike tregtohen gjerësisht pranë shkollave të Durrësit. Kohët e fundit në pranga kanë rënë gjashtë shpërndarës droge, ndërsa Drejtoria e Policisë së Qarkut, duke pranuar fenomenin, pohon se shërbimet e saj kanë intensifikuar përpjekjet për goditjen e rasteve të tregtimit të lëndëve narkotike, veçanërisht nga moshat e reja. Ndërkaq, në shkollat e mesme të Durrësit nxënësit pohojnë se një pjesë e mirë e tyre, kryesisht djemtë, e kanë provuar drogën të paktën njëherë. Ndërkaq, nga një sondazh i realizuar pak kohë më parë në kuadrin e projektit të PNUD-it, në mbështetje të sigurisë në shkolla, rezultoi se rreth 10 për qind e nxënësve kanë provuar lëndë narkotike, ndërsa 47 për qind e tyre pranojnë praninë e përdoruesve të rregullt të drogës në shkollat e tyre. Fatkeqësisht, droga, sidomos hashashi, kanë gjetur një përdorim të gjerë në shkolla, ndonëse mësuesit dhe drejtuesit e arsimit, apo dhe vetë nxënësit nuk e pranojnë hapur këtë realitet. Po për strukturat antidrogë dhe inspektorët e policisë në terren ky realitet njihet dhe janë vënë në shënjestër të gjithë ata që e shpërndajnë drogën te mosha shkollore. Nxënësit tregojnë se droga futet në shkolla në mënyra të ndryshme, kryesisht e maskuar në kaushët e farave të lulediellit, në qeska të vogla të mbështjella me letër për të shmangur dyshimet, po dhe nëpërmjet futjes së dozës së saj apo cigares së hashashit në xhep, shkarazi. Kryesisht, droga depërton në ambientet e shkollës nga nxënës që e konsumojnë atë për t‘u shpërndarë mes shokësh. Ajo blihet në ambientet jashtë shkollës për t‘u futur brenda dyerve të saj të ruajtura nga roja nga vetë nxënësit. Elementë të pranuar nga gjimnazistët për futjen e drogës në shkolla janë dhe nxënës që e kanë mbaruar shkollën apo janë përjashtuar prej saj për arsye të ndryshme. Megjithatë, nxënësit pohojnë se gjithçka bëhet në mënyrë të fshehtë për të mos u diktuar nga mësuesit dhe nxënësit që njihen si "spiunë".

Më i përdorur në shkolla është hashashi, po nuk përjashtohet dhe konsumi i dozave jo të pastra të heroinës. Këtë e vërteton dhe gjetja e mallit te shpërndarësit e arrestuar nga forcat e policisë në Durrës. Nga kontaktet me nxënësit rezulton dhe përdorimi i tabletave ekstazi. Sipas burimeve zyrtare të policisë së Durrësit, mosha e shpërndarësve të drogës është e re. Ajo varijon nga 14-23 vjeç. Fenomeni që ka shtrirë përmasat e tij në shkollat e Durrësit, ka bërë që prania e uniformave blu në shkollat e Durrësit të rritet, po kështu dhe kontaktet e tyre me nxënësit dhe veçanërisht me senatorët e shkollave për të identifikuar problemet dhe ndërhyrë në gjetjen e nxënësve përdorues për të mbërritur te shpërndarësit e drogave te moshat shkollore.