Revoltë në Lezhë, policia shpëton arbitrin e ndeshjes.

[Altin111]

Reagimi i dhunshëm, pas humbjes minimale 0-1 me penallti

Lezha është bërë arena e radhës për dhunën në stadiumet e Kategorisë Superiore, duke përsëritur pamjet e fillimit të kampionatit në Korçë. Tifozeria ka rrethuar stadiumin, duke kërkuar "kokën" e gjyqtarit Abeshi, fajtor se ka dhënë një 11-metërsh në minutën e 85-të të ndeshjes, që rezultoi deçiziv në fitoren 1-0 të Elbasanit përballë Besëlidhjes vendase. Është dashur ndërhyrja e policisë jo vetëm për të shoqëruar jashtë stadiumit treshen e gjyqtarëve, por edhe për të boshatisur sheshin para stadiumit, ku tifozeria thërriste në kor kundër "xhaketave të zeza". Vetëm pas arrestimit të një prej "ultrasve" lezhjanë, turma është shpërndarë nga ambienti rrotull stadiumit dhe situata është normalizuar.

Gjatë takimit të djeshëm mes Besëlidhjes dhe Elbasanit në Lezhë, gjithçka ka rrjedhur qetësisht deri në minutat e fundit të pjesës së dytë. Dy skuadrat po i drejtoheshin një barazimi pa gola, pavarësisht rasteve të shumta të krijuara para portave respektive. Por në minutën e 85-të të ndeshjes, gjyqtari Leonard Abeshi akordon një 11-metërsh për një faull ndaj Fjodor Zhafës në zonën lezhjane. Protesta e futbollistëve vendas pasohet nga ajo në shkallët e stadiumit, ku tifozeria fillon thirrjet në kor kundër gjyqtarit. Pavarësisht kontestimeve, nga pika e bardhë gjuan Bejzade, që shënon lehtësisht duke i dhënë tri pikët skuadrës së tij. Por situata në stadium nuk qetësohet dhe "ultrasit" lezhjanë nuk kursejnë as hedhjen e sendeve në fushën e lojës në formë proteste ndaj vendimit të gjyqtarit. Me vërshëllimën përfundimtare të Abeshit, shumë forca policore detyrohen të hyjnë në fushë për të rrethuar gjyqtarët, në mënyrë që të mos sulmohen nga turma. Por tifozët zhvendosin protestën e tyre jashtë stadiumit, duke rrethuar impiantin dhe duke kërkuar shpagim për gjykimin e Abeshit. Ky i fundit mbetet për disa minuta brenda stadiumit, ndërsa tifozeria fillon përplasjet edhe me forcat policore. Ndërhyrja e forcave të rendit për shpërndarjen e turmës dhe arrestimi i një prej tifozëve më të flaktë të Besëlidhjes, bëri që situata të qetësohej dhe të bëhej i mundur largimi i treshes së gjyqtarëve dhe skuadrës mike të Elbasanit. Më pas, Abeshi dhe asistentët e tij, Zhuli e Mustafaraj, u shoqëruan jashtë qytetit të Lezhës nën eskortën policore, që të garantohej se ata nuk do të sulmoheshin më pas nga tifozë "të tërbuar" për humbjen e takimit.

Situata e krijuar në Lezhë është e njëjtë me atë të shfaqur në stadiumin e Korçës, pas ndeshjes Skënderbeu-Besa. Edhe në këtë rast, vendimet e gjyqtarit ishin ato që sollën revoltën popullore, ndërsa dëshira për vetëgjyqësi shtyu tifozët të rrethonin stadiumin, duke kërkuar "linçimin" e gjyqtarit. Në atë rast, FSHF dënoi me dy ndeshje pa tifozë stadiumin korçar, ndërsa i vuri një gjobë të majme skuadrës. E njëjta masë pritet të merret edhe ndaj Besëlidhjes, e cila rrezikon të penalizohet ndjeshëm gjatë fazës së dytë, ku mund të luajë disa takime radhazi pa praninë e tifozerisë së saj.