Durrës, 83 për qind e grave dhunohen nga partneri.

[Altin111]

Sipas anketimeve, 6 për qind pranojnë edhe dhunën seksuale

Dhuna dhe krimet në familje që kanë tronditur opinionin durrsak kanë nxitur aktorë të shoqërisë civile të kërkojnë në njohjen e këtij realiteti të dhimbshëm, që po godet gjithnjë e më shumë. Vrasja e tri grave nga bashkëshortët brenda një harku të shkurtër kohor, si dhe masakra që ndodhi në një gjykatë italiane mes një çifti emigrantësh nga Sukthi i Durrësit, kanë rikthyer vëmendjen mbi dhunën e vazhdueshme brenda familjes shqiptare, që frikshëm po shndërrohet në krim të rëndë kundër personit dhe shkatërrim të plotë të familjes. Dhuna në familje është pranuar gjerësisht në qytet dhe fshat, ndonëse shpesh ajo mbetet e paraportuar. Një studim i Shoqatës së Grave me Probleme Sociale dhe Qendrës së Gruas, ndër të tjera ka konstatuar se dhuna është fenomen prezent në familjet durrsake dhe një në dy persona pohon se është ndjerë i dhunuar brenda familjes. Rritja e dhunës, në bazë të studimit të realizuar pas anketimit të 850 personave, rezulton ta ketë origjinën e saj te niveli ekonomik dhe ai arsimor, si dhe te papunësia dhe një komunikim i varfër mes pjesëtarëve të familjes. Veset e shumta, si alkooli, bixhozi dhe droga, që po shtohen me shpejtësi te meshkujt, për shkak të një shoqërie patriarkale në zhvillim, janë të tjerë faktorë që favorizojnë dhunën në shtëpi.

Në shoqërinë shqiptare gruaja shihet si objekt dhe jo si partnere, që në familjen e sotme mbetet një fakt që dikton marrëdhëniet mes bashkëshortëve, duke ndikuar frikshëm dhe në jetën e fëmijëve. Të dhëna interesante janë mbledhur veçanërisht për sa i përket dhunës në familje, ku shumica e të anketuarve kanë pohuar praninë e formave të ndryshme të saj. Sipas kryetares së Shoqatës së Grave, Bajana Çeveli, të pranuarit e vetes si objekt i dhunës është i vështirë dhe nga të anketuarit, pasi ata që dhunohen nuk pëlqejnë ta raportojnë dhunën e provuar. Kështu, 83 për qind e personave kanë pohuar se dhunohen, por kryesisht emocionalisht dhe ekonomikisht. Vetëm 20 për qind e tyre kanë pranuar se janë dhunuar fizikisht dhe 6 për qind pohojnë se mbi to është ushtruar dhunë seksuale nga partneri. Dhuna brenda familjes ka gjithnjë një emër, që për shumicën e atyre që e kanë provuar atë është bashkëshorti, por edhe vjehrra e kunetërit. Për të pamartuarit dhuna ushtrohet nga prindërit dhe vëllezërit më të mëdhenj. Qytetarët pohojnë se pasoja të dhunës janë plagët e ndryshme, kërcënimet e vazhdueshme, si dhe konfliktet që mbysin harmoninë e kërkuar brenda familjes. Në shoqëri pranohet dhuna e burrave e ushtruar ndaj grave, por nuk mungojnë as ata që do të pëlqenin një përmbysje raportesh, duke deklaruar se do ta toleronin më shumë dhunën e grave ndaj burrave. Për këtë qëllim dhe problemet gjinore në tërësi, u realizua në Durrës një seminar i zgjeruar me pjesëmarrjen e aktorëve të ndryshëm socialë dhe politikë. Angazhime konkrete morën dhe drejtuesit e pushtetit vendor në qytet e qark, përkatësisht Vangjush Dako dhe Seid Kërtusha. I pranishëm ishte dhe prefekti i qarkut, Klodian Pajuni, i cili vazhdimisht mbështet aktivitetet në mbështetje të një pozicioni më të mirë të gruas në shoqëri dhe vendimmarrje, ndonëse partia që ai përfaqëson gjatë zgjedhjeve të fundit lokale pati paraqitjen më të dobët të grave në këshillat bashkiakë dhe komunalë.

Në fillim të vitit të ardhshëm, në Bashkinë e Durrësit pritet të çelet zyra për çështjet gjinore si pjesë e nismës së një grupi grash intelektuale durrsake, mbështetur nga kryebashkiaku Dako. Në këtë zyrë do të adresohen të gjitha problemet dhe shqetësimet e vajzave e grave, si dhe do të zotërohet informacioni i plotë për situatën e tyre në qytet. Sipas kryetares së Shoqatës së Grave me probleme sociale në Durrës, Bajana Çeveli, duke u nisur nga fakti se përkatësia gjinore nuk është një çështje vetëm e grave, por një çështje e përbashkët e të dyja gjinive, pasi të dy, burri dhe gruaja, e krijojnë botën në të cilën jetojmë, subjekte të anketimit kanë qenë burra dhe gra për të marrë një informacion më të plotë rreth marrëdhënieve mes tyre në familje, shoqëri, politikë e në strukturat drejtuese. Studimi i bërë pasqyron një realitet që ofron pak për gratë dhe vajzat jo vetëm brenda familjes, por dhe jashtë saj. Ndonëse rezulton se familja dhe shoqëria është çliruar nga disa tabu mbi femrën, por nuk i ka flakur tej paragjykimet të cilat përcillen në familje e shoqëri dhe veçanërisht në edukimin e brezit të ri shpeshherë nga vetë gruaja.