Këshilla për të pasur një stil francez

[Erinaa]

Si të bëhesh franceze? Jo, jo, nuk e kemi fjalën për procedurat që nevojiten për të marrë nënshtetësinë apo se si të përfitosh një vizë që të çon drejt e në Francë. Çne që të merremi me gjëra të tilla aq të ftohta, që kanë lidhje me shkresurina?! Ne po flasim se si mund të arrish të kesh atë stil, atë sharm dhe atë natyrë të pangatërrueshme që kanë fatin ta kenë vetëm të lindurat në Paris. Ah, sa do doje të ishe një prej tyre... mund edhe të bëhesh. Revista “Jeta” të vjen si gjithmonë në ndihmë që, më shumë sesa një franceze, të jesh një femër mbi të gjitha elegante. Nuk lind dot e tillë, apo jo?






Ne e kemi ditur gjithmonë që francezet, ose më mirë ato fatlumet që kanë lindur në Paris, janë femra shumë sharmante, chic dhe dinë të joshin aq bukur pa u munduar fare. Dhe të mendosh që asnjëra prej tyre nuk bëhet copë të mbushë gardërobën me veshje markash të njohura që prodhohen në “maisons de mode” franceze, më të famshmet në botë. Çudi, por ja që ndodh, edhe pse ti mund të kesh ëndërruar gjithë jetën të kesh një fustan haute couture Christian Dior, nuk është ky kushti që do të të dhurojë pak stil Parisi. Sepse në fakt, ato të vërtetat rrethohen vërtet nga mitet e modës, por nuk i lakmojnë me çdo kusht. Epo atëherë si të jesh franceze? Le ta marrim punën shtruar dhe t’ia nisim një e nga një.

MOS U LLANGOS

Një gjë është e sigurt. Nëse do kesh fatin ndonjë ditë të shkelësh në rrugët e Parisit, nuk ke për të parë kurrë një vajzë franceze të llangosur me dy gisht krem pudër, me gjithfarë hijezuesish nëpër kapakët e syve, me qerpikë si erashkë, mollëza të skuqura dhe shkëlqyes që farfurit nën rrezet e diellit. Një parisiene trukohet pak. I mjafton një laps i zi për t’i dhënë pak formë syve, pak pluhur gri për të theksuar cepin e syrit dhe një shtresë fare e hollë rimeli. Por më së shumti, produkti i vetëm i makijazhit që përdorin është buzëkuqi (mundësisht i kuq), asgjë më tepër. U kuptuam?

MOS U NGARKO

Moda ikën e vjen. Madje lind pikërisht aty, në Paris, dhe të mëson se tendenca e pranverës është që të përdorësh varëse sa më të mëdha, me gurë e kristale. Modelet duken të adhurueshme teksa sfilojnë për stilistët e famshëm francezë, me bizhuteri të stërmëdha nëpër qafë, veshë dhe duar, ama ajo pamje thjesht shijohet dhe ngelet aty. Një parisiene nuk e tepron kurrë me bizhuteritë. Jo se nuk vendos kurrë të tilla, por gjithmonë pa e tepruar. Nëse në sirtar ke një komplet bizhuterish, mos i vër të gjitha: ose varësen, ose unazën, ose vathët. Nëse nuk janë të çmuara? Punë e madhe fort! Rëndësi ka stili. Komplimentet nuk do mungojnë, të jesh e sigurt.

PERSONALIZO

E thamë një herë: që të dukesh ose të bëhesh një parisiene, nuk do të thotë që të jesh e veshur kokë e këmbë me rroba të stiluara nga dizajnerët francezë dhe të blera medoemos nëpër sallonet me emër të Francës. Janë aq pak ato që i kanë të tilla mundësi! Dhe mos mendoni se edhe në Paris të gjitha vajzat munden të blejnë në dyqanet Lacroix, Chanel apo Gaultier. Ama ngelen gjithsesi vajza me stil dhe sharm. Po si? Duke veshur atë që iu shkon, duke personalizuar look-un me një aksesor të veçantë. Nuk do të thotë që të veshësh ditë e natë la petite robe noire. Mund të dukesh shumë bukur dhe me një palë xhinse, një triko dhe rrip. Nëse bluza rrëshqet paksa mbi shpatullën e zbuluar, i je afruar edhe më shumë look-ut parisien.

MËSO TË JOSHËSH

Të bësh sikur s’ta ka qejfi dhe të presësh që të të gjuajnë? Jo, jo, nuk është kjo këshilla më e mirë që do të merrje nga një vajzë Parisi. Të hidhesh pa duar dhe të llomotitësh me kë të të dalë përpara duke i bërë sytë e ëmbël dhe duke i çuçuritur në vesh? Në asnjë mënyrë! Duhet të dish të joshësh me karakterin tënd, duke folur dhe duke bërë gjeste të hijshme dhe të sigurta. Kështu po që nuk do dukesh seksi, as ndjellëse, as e humbur, as mendjemadhe. Do jesh thjesht sharmante. Pikërisht kjo të duhet.

SI ÇOKOLLATË
Nuk ka rëndësi nëse është dimër. Lëkura nuk duhet të jetë asnjëherë e bardhë borë, si nordiket, që s’kanë parë plazh me sy. Nëse lëkura ka pamje të zeshkët, do të thotë se ti je në gjendje të bësh pushime në çdo kohë, edhe në dimër. Si një franceze që ka përthithur rrezet e pakta të Bretanjës. Sallone që ofrojnë në çdo stinë dhomat e solarit, është fare e thjeshtë t’i gjesh.

AXHENDA E PASDITES

Kush tha që duhet të mbyllesh në shtëpi? Mund të dalësh çdo ditë të javës. Kurse të shtunën në darkë duhet të mbyllesh në kuzhinë dhe të gatuash për miqtë që ke ftuar për darkë, duke zgjedhur pjata të lehta, si për shembull soufle. Po e diela? Është e gjitha për familjen.

Ca zakone të përhershme

Një parisiene ulet në “Cafe de flore” në bulevardin “Saint Germain”. Po nëse jeton në Tiranë? Zgjidh restorante të vegjël dhe të qetë për të darkuar me miqtë. Qëndro larg atyre të zhurmshmëve me muzikë të lartë dhe tym cigaresh dhe sidomos mos frekuento ato ambiente që janë në modë për momentin dhe ku mund të shohësh të gjitha fytyrat e para. Ti duhet të zgjedhësh vende të veçanta dhe të pish shampanjë.

MOS FLI NË PARUKERI

Ti mund të kujdesesh që asnjë fije floku të mos rebelohet dhe që krehja të jetë perfekte në çdo çast, duke mallkuar erën që filloi të fryjë pikërisht në momentin kur sapo ke dalë nga parukeria. Epo, nëse kërkon të kesh stiline një parisieneje, nuk ke gjë në vijë. Sepse nuk është e thënë që flokët të jenë të shtrira, si të hekurosura. Duhet të dukesh paska si e sapozgjuar nga gjumi ose t’i kapësh flokët bisht kali. Gjatësia duhet të jetë mesatare dhe ngjyra gështenjë. Dhe duhet të fillosh urgjentisht të kesh alergji nga flokët e shtuar, kapjet dhe krehjet e ekzagjeruara. Ah, mos harrojmë edhe ngjyrën e verdhë, qëndroji kilometra larg! Një kukull e tillë në Paris do etiketohej thjesht si budallaqe! Ti nuk je e tillë, apo jo?

AXHENDA E PASDITES

Kush tha që duhet të mbyllesh në shtëpi? Mund të dalësh çdo ditë të javës. Kurse të shtunën në darkë duhet të mbyllesh në kuzhinë dhe të gatuash për miqtë që ke ftuar për darkë, duke zgjedhur pjata të lehta, si për shembull soufle. Po e diela? Është e gjitha për familjen.

[Ditixx]

stil francez??? apo thjesht "bon ton"??

ajo pika qe flet per nxirjen e lekures nuk me pelqen: sipas ketyre nje femer duhet te plaket para kohe(duke bere llampa cdo muaj) thjesht per tu dukur e abronzuar 12 muaj ne vit??
Normal qe lekura e nxire esht shum e bukur por ja vlen ta demtosh me rreze gjate gjith vitit???

[ReniX]

Stili me i thjeshte fiton gjithmon, por dhe pak klas duhet

[MAJDI]

PSe nuk jeni mir Shqiptare ?

[labja]

ce duam stilin francez kur kemi stilin ton .....po humbasim zakonet duke "imituar" te huajt ..po humbasim gjuhen duke perdorur emra (njerezisht , lokalesh , institucionesh, hotelesh etjj ) te huaj...tani dashkemi te humbasim dhe stilin e te veshturit & te te lyerit

[Ditixx]

rrofte patriotizmi! tani e tuttje pra do vishemi te gjith me takom shqiptar

[ReniX]

rrofte patriotizmi! tani e tuttje pra do vishemi te gjith me takom shqiptar

hahaha

[Ruthi]

mmmmm Me pelqen thjeshtesia dhe klasi ne te njejten kohe.