ARM fiton betejën me Atomët për TV-të

[gjendar]

Inteli ka bërë të ditur se do të mbyllë grupimin e vet Digital Home brenda të cilit janë zhvilluar prodhime për shfrytëzim në pajisje shtëpiake, si TV-të. Kjo vjen si befasi, pasi që kjo kompani kishte plane të mëdha për zgjerim në këtë treg gjithnjë e më të rëndësishëm, por si duket të gjithë kanë të drejtë të ëndërrojnë.

Produkti më i rëndësishëm i këtij grupi ishte procesori Atom CE4100, i cili ishte bazë e produkteve D-Link Boxee Box dhe Google TV (të cilët pohojnë që lajmi nuk i prek aq shumë, sepse ka mjaft alternativa), por duke pasur parasysh shitjen e tyre goxha të dobët dhe konkurrencën e madhe që ka pasur kjo kompani në formë të produkteve të ndryshme të bazuara në ARM, Inteli i madh nuk ka parë edhe aq shumë shanse për fitim.

Kështu, ky treg tani i mbetet ARM-së, dhe nuk duhet nënçmuar kur kemi parasysh propagandimin gjithnjë më të madh të të ashtuquajturve “TV të mençura” me lidhje Interneti dhe mundësinë e ekzekutimit të aplikacioneve të cilat do të kërkojnë fuqi gjithnjë më të madhe procesorike.