Çmimi i bukës në Tiranë, 1 euro

[Altin111]

Vëzhgimi i "Fiks Fare" në Tiranë: Si po e shkelin ligjin prodhuesit dhe shitësit e bukës

Çmimi i bukës masive në Tiranë arrin në 1 euro. Kaq rezulton të jetë, nëse llogaritet pesha e bukës, e cila është zvogëluar me 400 gramë, ndërsa çmimi u rrit në 80 lekë. Prej disa kohësh, bukëpjekësit janë ndeshur me rritjen e çmimit të grurit në tregun me shumicë, me rritjen e çmimit të karburantit, me të cilin vënë në punë gjeneratorët. Ende pa u rritur çmimi i energjisë, ai i bukës ka arritur afërsisht në 1 euro.

Nga ana tjetër, asnjë gjemb nuk u ka hyrë në këmbë tregtarëve, të cilët, me iniciativë të lirë rrisin çmimin e bukës dhe ulin peshën e saj. Ata kanë shkelur disa pika të ligjit të konsumatorit, d.m.th gjithkush mund të shesë bukë me peshe të ndryshme, por ajo (pasha) duhet të jetë e shënuar në etiketë. "Fiks Fare" bleu bukë pothuajse në të gjitha dyqanet ku shitet ajo në kryeqytet. Në shumë pak dyqane, pesha e bukës masive ishte 850 gramë, në të shumtën e rasteve ajo peshonte 650 gramë. Në një kohë kur buka duhet të peshojë 1 kg. Nëse bëhet një llogari e thjeshtë me çmimin e shitjes së një buke (bëhet fjalë për bukën masive) dhe peshës së saj, rezulton që 1 kg bukë tashmë kushton 1 euro.

Sipas drejtorit të Drejtorisë së Supervizionit Metrologjik dhe Kalibrimit, z. Adrian Patusha, vetë prodhuesit e bukës kanë për detyrë të vendosin peshën e mallit që nxjerrin në treg. Por kjo peshë për bukën nuk duhet të jetë poshtë limitit prej 850 gramë. Po të studiohet tregu, nëse ke një peshore me vete, konstaton që shumica e bukëve që shiten me çmimin 80 lekë janë nën këtë kufi të lejuar. Zoti Patusha deklaron se nëse ata si drejtori konstatojnë raste të tilla marrin masa. Sipas tij, janë marrë edhe masa ndëshkimore, por shifra të sakta nuk jep. Ndërkohë, të gjitha dyqanet dhe furrat e bukës duhet të kenë të afishuar, gjithmonë sipas ligjit, çmimet e bukës dhe peshën e tyre. Por në asnjë dyqan nuk gjen diçka të tillë. Çmimin e bukës e mëson nga vetë shitësit.

Madje, vetë Drejtoria e Metrologjisë dhe Kalibrimit nxori një urdhëresë kohët e fundit, të cilën ua dërgoi të gjithë prodhuesve dhe tregtarëve të bukës. Në bazë të saj, të gjithë subjektet prodhues dhe tregtues të bukës duhet të plotësojnë detyrimet ligjore në fushën e metrologjisë si vijon:

- Të bëhet deklarimi i peshës së bukës dhe çmimi përkatës i saj, duke i afishuar në vend të dukshëm për blerësin pranë çdo lloj buke;

- Pesha reale e bukës duhet të përputhet me peshën e deklaruar për llojin përkatës. Lejohet një shmangie negative nga pesha e deklaruar, për bukët e prodhuara 2 deri 4 orë pas daljes nga furra, si më poshtë:

- 6% për bukët me peshë 300 deri 500 gramë;
- 30 gramë për bukët me peshë 500 deri 1000 gramë.

Në rastet e kësaj shkeljeje parashikohen edhe masa ndëshkimore në bazë të ligjit Nr. 9135, datë 11.09.2003 "Për mbrojtjen e konsumatorëve". Kjo gjobë varion nga 10 deri në 500 mijë lekë.



LIGJI


Neni 4

Të drejtat e konsumatorëve

Të drejtat bazë të konsumatorëve janë:

a) e drejta e mbrojtjes së shëndetit, mjedisit dhe sigurisë së jetës;

b) e drejta e mbrojtjes së interesave ekonomikë;

c) e drejta e ankimit;

ç) e drejta për dëmshpërblim;

d) e drejta e edukimit;

dh) e drejta e njoftimit;

e) e drejta e përdorimit të shërbimeve publike;

ë) e drejta e mbrojtjes ligjore;

f) e drejta e organizimit në shoqata ose bashkime për mbrojtjen e interesave të konsumatorit dhe e drejta e përfaqësimit në organet e tyre vendimmarrëse.


Neni 8

Detyrimi për njoftim

1. Prodhuesit, shitësit dhe ofruesit e shërbimeve janë të detyruar, në kufijtë e veprimtarive përkatëse, t‘i japin konsumatorit të dhëna të plota për blerjen ose përdorimin e mallrave a të shërbimeve ekzistuese në treg.

2. Të dhënat duhet të jenë të vërteta, të sakta, të qarta për të gjitha karakteristikat e mallrave ose të shërbimeve dhe për kushtet e tregtimit të tyre. Këto të dhëna duhet të përmbajnë:

a) natyrën, identitetin e prodhuesit, çmimin, cilësinë, sasinë, dobinë, origjinën, afatin e përdorimit, mënyrën e prodhimit dhe të përdorimit, mënyrën e mirëmbajtjes dhe garancinë e mallrave dhe të shërbimeve;

b) rrezikun e mallit ose të shërbimit, kur rreziqet nuk janë të kuptueshme pa paralajmërimin përkatës.


Neni 14

Treguesi i çmimeve

1. Të gjitha mallrat që i ofrohen konsumatorit duhet të kenë të shënuar çmimin e shitjes:

a) për mallrat e paketuara duhet të jepen çmimi për sasinë e paketuar dhe çmimi për njësi;

b) për mallrat që nuk janë të paketuara dhe maten në prani të konsumatorit jepet vetëm çmimi për njësi;

c) në rastet kur çmimi i mallit për njësi është i njëjtë me çmimin e shitjes, është e mjaftueshme vendosja e çmimit të shitjes.

2. Për të gjitha shërbimet që i ofrohen konsumatorit është i detyrueshëm shënimi i çmimit përfundimtar. Nëse shërbimi përbëhet nga disa pjesë të ndryshme e të veçanta, jepen çmimi i secilës prej tyre dhe çmimi përfundimtar. Nëse në çastin e lidhjes së kontratës nuk është dhënë çmimi përfundimtar, ofruesi i shërbimit është i detyruar të tregojë metodën e përllogaritjes së tij.

3. Treguesit e çmimit të mallit ose shërbimit të ofruar duhet të jenë të qartë, të dallueshëm dhe të lexueshëm.

4. Çmimi i shitjes së mallit ose shërbimit të ofruar jepet në lekë edhe në rastet kur është i shprehur në një monedhë tjetër.

5. Pikat e këtij neni, me përjashtim të pikës 4, nuk zbatohen për mallra ose shërbime të përftuara nëpërmjet ankandit.

[ReniX]

po rritet buka me shume se jashte shtetit