Nata e Bardhë, këngë partizane dhe përqafime publike

[Altin111]

Kryeqyteti, sot i përfshirë nga tingujt prej orës 18.00 deri në mesnatë

Katër kukulla super të mëdha "SkyDancer" do të jenë të fiksuara në bulevard dhe tre të tjera gjigante të komanduara nga njerëz do ecin përkrah njerëzve. Është Nata e Bardhë.

Pas një dite të qetë pushimi, qytetarët do të kenë mundësi sonte të festojnë një natë me të gjithë. Një natë në rrugë. Bashkia e Tiranës e cila organizon festën e madhe me rastin e 29 Nëntorit, ditës së Çlirimit, ka planifikuar dhjetëra aktivitete që startojnë në orën 18.00 e përfundojnë në mesnatë. Axhenda përfshin aktivitete për fëmijë, adoleshentë, të rritur dhe të moshuar.

Për më të vegjlit festa nis me një teatër marionetash nga artistë bullgarë dhe dekor të teatrit tradicional të kukullave. Dy balerinë do të shoqërojnë lëvizjet e marionetave, për të bërë gjithçka më të ngrohtë e më të kuptueshme për spektatorët e vegjël. Sipas organizatores së aktivitetit, Belinda Balluku, Nata e Bardhë do të ofrojë surpriza. "Të lindur për të lexuar" është një projekt që nis në dy nga parqet e gjelbra në kryeqytet. Te lulishtja pas monumentit të Skënderbeut dhe tek ajo pranë Galerisë së Arteve. Animatorë të specializuar do të lexojnë në prani të fëmijëve libra të njohur të literaturës për të vegjël. Dekori që do të shoqërojë këto aktivitete do të jetë i magjishëm. Flluskat e sapunit do të mbushin gjatë gjithë kohës atmosferën dhe kukulla të stërmëdha do të bëjnë të dukshëm nga larg folenë e lexuesve të vegjël.

Në trotuarin para bashkisë një personazh tjetër i njohur, xhaxhi Piktori, do të krijojë grupet e piktorëve të vegjël, të cilët do të konkurrojnë për aftësitë e tyre. Gjithashtu, xhaxhi Piktori do të përdorë Face Painting (lyerjen e fytyrave) që pëlqehet shumë nga fëmijët. Materialet që do të përdoren do të krijojnë figura me tullumbace, me dru, gozhdë, vida, tela, lego, pastela, etj.

Nga fëmijët te të moshuarit, Nata e Bardhë sjell të tjera aktivitete. Ekspozita tematike "90 vjet kinema në Tiranë" do të mbledhë veteranët për të parë pamjet që tregojnë se mbas pavarësisë trupat austriake hynë Tiranë gjatë luftës së parë botërore. Më tej në përkujtim të 29 Nëntorit do të çelet një ekspozitë me foto "artistët në role patriotësh dhe partizanësh" dhe si gjithnjë në fund një formacion me këngë partizane.

Për herë të parë këtë vit romët do të kenë hapësirën e tyre. Në bulevardin Zogu i Parë, grupe të këtij komuniteti do të shpalosin para një publiku të gjerë talentin e tyre të njohur artistik.

Por pa koncertet e mëdha në sheshet kryesore Nata e Bardhë nuk do të kishte famën që e karakterizon dhe popullaritetin e madh.

Ndaj muzika klasike, ajo moderne, turbofolk do të përcillet live nga artistë vendas dhe të huaj. Koncerti i madh do të zhvillohet në sheshin "Skënderbej" në orën 21.30 minuta.

Përpos aktiviteteve argëtuese do të ketë edhe evenimente sociale, si projekti FREE HUGS. Kjo është një lëvizja e re botërore kundër mbylljes së individit, vetmisë e harresës që lançohet në Tiranë me rastin e Natës së Bardhë, me qëllim mbledhjen e fondeve për bamirësi. Djem e vajza me bluzat e dedikuara të këtij projekti do të përshkojnë bulevardin "Zogu i Parë" duke dhuruar atë që sot mungon, ngrohtësinë njerëzore.

Ky është viti i katërt që kryeqytetasit, por jo vetëm, më 29 Nëntor dalin në rrugë për të festuar. Mijëra qytetarë që vijnë edhe nga rrethe të tjera si dhe Kosova argëtohen deri në orët e vona. Karakteristikë e kësaj feste janë xhirot në trotuare, lokalet e tejmbushura dhe grupimet apo duartrokitjet para grupeve artistike. Gjithsesi, nuk duhet harruar se sot dilet pa makinë, ose ajo parkohet larg rrugëve kryesore. Janë totalisht të pakalueshme nga automjetet dy bulevardet kryesore, si dhe rrugët që lidhin qendrën e Tiranës me Unazën. "Zemra" e kryeqytetit Natën e Bardhë është vetëm e qytetarëve.


Axhenda


Pas orës 18.00


Nuk lëvizin automjetet në:

Bulevardin Dëshmorët e Kombit

Bulevardin "Zogu i Parë"

Rrugën e Durrësit

Rrugën e Shallvareve

Rrugën "Dëshmorët e 4 Shkurtit"



Nata e Bardhë


Axhenda e aktiviteteve festive


ora 18:00 Banda e qytetit nis festimet nga Rruga e Durrësit deri te sheshi "Nënë Tereza"


ora 18:30 Projekti "Të lindur për të lexuar" te lulishtja "Skënderbej" dhe Galeria e Arteve


ora 19:00 Vizita, Bashkia e Tiranës hap dyert për qytetarët


ora 19:00 Këndi i veteranëve te lulishtja "Vëllezërit Frashëri"


ora 19:30 Teatri i kukullave bullgare rruga pedonale pas Bashkisë së Tiranës


ora 19:30 Krijojmë me xhaxhi Piktorin në trotuarin para Bashkisë së Tiranës


ora 20:00 Koncert i organizuar nga Universiteti UFO në bulevardin "Zogu i Parë"


ora 20:00 Projekti "Free Hugs, Përqafomë!" nga bulevardi "Zogu i Parë" dhe vijon në drejtim të ish-bllokut


ora 20:00 Koncert klasik "Harqe" tek Ura e Madhe mbi lumin Lanë


ora 20:30 Nata rome në bulevardin "Zogu i Parë"


ora 21:00 Koncert pop-rock te rruga "Dëshmorët e 4 Shkurtit"


ora 21:00 Koncert nga Radio +2 te Rruga pas Tajvanit


ora 21:30 Koncerti i madh në sheshin "Skënderbej"


ora 21:30 Koncerti "What‘s up" i kompanisë AMC te sheshi "Nënë Tereza"