Terri, shpiket kandili “shiringë”

[Altin111]

05/12/2007 - 09:36

DURRES -Kufizimet e stërzgjatura të energjisë elektrike kanë detyruar qytetarët të shpikin e sajojnë lloj-lloj mënyrash, për të pasur pak dritë në shtëpitë e tyre. Pas shpikjes së bërë verën e kaluar për ujin e pijshëm, kësaj radhe është sajuar një mënyrë krejt e veçantë dhe origjinale për energjinë. Një llambë ndriçimi me gaz, e përshtatur me një shiringë dhe age, i jep dritë një familjeje durrsake. Fëmijët mësojnë e bëjnë detyrat me ndriçimin e llambës së shpikur së fundmi. E njëjta gjë edhe me amvisat. Ato bëjnë punët e shtëpisë edhe gjatë darkës me ndihmën e kësaj llambe, e cila arrin të ndriçojë më së miri dhomën.

SHPIKJA
“Orët e gjata pa drita na kanë detyruar të sajojmë lloj-lloj mënyrash për të siguruar ndriçim, sidomos për fëmijët gjatë orëve kur ata përgatisin mësimet”, - thotë shpikësi i kësaj llambe, i cili nuk dëshiron të identifikohet. Një pjesë e mirë e familjeve, të cilat nuk kanë mundësi që të sigurojnë ndriçim me anë të gjeneratorëve apo të invertitorëve, pasi kanë kaluar provat e ndriçimit me qirinj, iu janë rikthyer bombolave të gazit. Por, meqenëse llambat me gaz harxhohen shpejt dhe nuk ndriçojnë si duhet për të mundësuar leximin apo shkrimin, një banor ka modifikuar me sukses llambën e ndriçimit me gaz. Në ndihmë të tij kanë ardhur edhe medikamentet që i shërbejnë mjekësisë. Ai ka hequr pjesën prej qelqi të këtij mjeti ndriçimi dhe në vend të saj ka vendosur një shiringë së bashku me agen. Me anë të manopulës, ai e ul ose e ngre nivelin e gazit sa të dojë, derisa të krijohet ndriçimi i mjaftueshëm për fëmijët, në mënyrë që këta të lexojnë dhe shkruajnë normalisht. Kjo metodë sjell ndriçim të mirë, por edhe kursen konsumin e shpejtë të gazit. Nëse një llambë me gaz harxhohet për 4 ose 5 ditë, pas këtij modifikimi ajo arrin 2 javë, duke qëndruar 5 deri 6 orë në ditë e ndezur.

ENERGJIA
Kufizimet e energjisë elektrike në Durrës janë shtuar; nga tre deri në katër orë që ka njoftuar zyrtarisht KESH-i, sot në Durrës dritat mungojnë 5 orë në zonën e qendrës urbane dhe 6 deri 8 orë në pjesën tjetër të periferisë. Në këtë zonë, energjia mungon 2 deri 3 orë gjatë mbrëmjes në kufijtë prej orës 18.00 deri në 21.00. Pikërisht një situatë e tillë i ka detyruar këta banorë të gjejnë mënyrat më efikase për të siguruar ndriçim me sa më pak shpenzime, duke bërë që ata të sajojnë shpikje nga më qesharaket, por që në thelb, efikase. Banorët janë ankuar disa herë për orët e stërzgjatura të kufizimeve, duke kujtuar njëherazi edhe orarin e deklaruar më parë nga ana e KESH-it. Mungesa e energjisë elektrike ka ndikuar në rritjen e çmimit të mjaft produkteve, duke nisur që nga buka. Biznesmenët ankohen se nuk mund të përballojnë punën me gjeneratorë, për shkak të rritjes së çmimit të naftës. Ata janë të detyruar të luajnë edhe me çmimin e produkteve që prodhojnë, duke ndikuar në mënyrë të drejtpërdrejtë në xhepat e konsumatorëve.