Bashkëfshatarët i dëgjonin rënkimet, por nuk e preknin

[Altin111]

Vajza e vrarë në Lurë, orët në agoni duke kërkuar ndihmë

Bashkëfshatarët i dëgjonin rënkimet, por nuk e preknin

Nazife Buci, vajza 20-vjeçare, vrarë nga tre vëllezërit e saj, luftoi plot 4 orë me vdekjen, por nuk mundi të shpëtojë nga thonjtë e saj të pamëshirshëm. Plagët që mori nga plumbat e kallashnikovit të lëshuar në trupin e saj nga tre vëllezërit, ishin tepër të rënda dhe në mungesë edhe të dhënies së ndihmës së nevojshme mjekësore, ajo ka dhënë shpirt krejt e vetme, pa u prekur me dorë prej askujt. Ndërsa i dashuri i saj, Granit Gjoçi, 19 vjeç, ka vdekur në vend nga plumbat e marrë dhe kufoma është marrë e dërguar në shtëpi nga familja dhe të afërmit e tij. Nazife Buci, përkundrazi, nuk ka gjetur vdekjen e menjëhershme, duke u rezistuar plagëve të marra për 4 orë rresht. Edhe pse ngjarja e tmerrshme ka ndodhur në qendër të fshatit, përpara një lokali, askush nuk është afruar, qoftë edhe për të dëgjuar një fjalë të vetme prej saj, apo për t‘i dhënë një pikë ujë për të njomur buzët e thara nga dhimbjet e padurueshme të plagëve të marra. Vetëm pas 4 orësh, tregojnë dëshmitarët okularë në vendngjarje, ajo ka dhënë shpirt, pasi nuk janë dëgjuar më rënkimet dhe ofshamat e saj. Kështu, Nazife Buci ka përballuar krejt e vetme 4 orët e fundit të jetës së saj fare të shkurtër, vetëm prej 20 vitesh, duke luftuar me plagët e marra dhe të ftohtin kallkan të maleve të Lurës.

Burime nga Drejtoria e Policisë Dibër saktësuan për "Shqip" se kanë qenë forcat e kësaj policie që kanë dërguar pranë familjes së saj trupin e pajetë dhe të ngrirë nga të ftohtit, të 20 vjeçares, që u vra nga vëllezërit e saj. Edhe e ëma e viktimës nuk është parë pranë vajzës në ato katër orë tragjike të fundit të jetës së saj, kur luftonte me vdekjen.

Trupi i pajetë i vajzës është marrë vetëm kur ka rënë mbrëmja, sepse, sipas mendësisë së zonës, një vajzë që turpëron familjen nuk bën të respektohet as e vdekur. Burrat e fisit Buci nuk morën pjesë në varrim të nesërmen, jo vetëm nga frika e hakmarrjes, por edhe nga turpi.

Kështu, ekzekutimi mizor nga tre vëllezërit nuk ishte kulmi i kafshërisë së kësaj historie. Njësoj pa ndjenja u treguan të gjithë në Lurën mes malesh, përfshirë nënën e Nazifes.



Rrëfimi


Shoqja e shkollës kujton: Ishte lidhur që fëmijë me Granitin


"Nazifja ëndërronte të bëhej mësuese"


Me ceremoninë e varrimit është mbyllur përfundimisht historia e 20-vjeçares Nazife Buci, së bashku me ëndrrat e saj. Ja si e kujton atë një bashkëfshatare dhe nxënëse me të në shkollën 8-vjeçare të Fushë-Lurës. M. Aldede, nga ky fshat, që aktualisht studion në qytetin e Peshkopisë, në shkollën e mesme ekonomike, viti i katërt, ndërsa flet i përloten sytë. Thotë se në kujtesën e saj, Nazifja do të mbesë si një vajzë tepër e zgjuar, nxënëse në tetëvjeçare, me rezultate shumë të mira, ezmere, me sy të zinj, gjatësi mesatare, tepër e shoqërueshme dhe mjaft simpatike.

"Edhe ajo, vazhdon të tregojë shoqja e saj, si gjithë ne të tjerat kishte ëndrrat e saj për jetën. Mbaj mend mirë se kishte dëshirë të madhe për t‘u bërë mësuese, si gjithë ne vajzat e tjera nga Lura, që më së shumti dëshirojmë të bëhemi mësuese. Ndërsa loja e preferuar e saj ka qenë ajo e volejbollit. Luanim shpesh në shkollë, si në orët e fizkulturës, ashtu edhe në kohën e lirë". Vajza nga Lura tregon se ka qenë vetëm 2 vjet më e vogël nga Nazifja dhe se e mban mend mirë se dashuria mes dy të rinjve, që ishin edhe fqinj, ka filluar herët, që në klasë të shtatë. Por gjithsesi, nuk dihen mirëfilli shkaqet që çuan në një konfliktualitet të tillë, i cili duhej të zgjidhej tragjikisht me grykën e armës.


Ekzekutimi


Vrasje në mes të fshatit


Nazife Buci dhe i dashuri i saj, Granit Gjoçi, u ekzekutuan me armë zjarri mesditën e të mërkurës, më 5 dhjetor 2007. Tre vëllezërit e Nazifes, pasi kishin mësuar për lidhjen e saj me Granitin, kishin kërkuar nga familja e këtij të fundit që çështja të mbyllej me martesën e të rinjve. Por Graniti, më i vogël se vajza që dashuronte, kishte mohuar lidhjen. Dy familjet, që kishin lidhje miqësie të vjetra me njëra-tjetrën, kishin rënë dakord ta zgjidhnin me pleqësi këtë çështje. Madje babai i Granitit kishte shkuar në Rrëshen të mërkurën, që të thërriste Shehun e Rrëshenit për të gjykuar, siç e do tradita e lashtë e atyre anëve. Por ende pa u mbledhur "pleqësia", Selman, Urim dhe Ylli Buci gjetën Granitin në një lokal në qendër të fshatit dhe pasi ai refuzoi të shkonte me ta, e qëlluan me armë. Pak minuta më pas plumbat u zbrazën mbi motrën, Nazifen, disa dhjetëra hapa larg vendit ku u vra Graniti. Sehirxhinjtë ishin të shumtë dhe të ftohtë, si ata që përshkruan Kazanzaqis te "Zorba" i famshëm. Vrasësit u larguan të pashqetësuar nga fshati dhe policia mbërriti vetëm kur të dy të rinjtë kishin sosur.

[carolina]

o zot... shume e dhimbshme...

[zoopie]

ca bohet keshtu ,nuk arij te kuptoj si mund te vrasesh motren tende
KJO ESHTE CMENDURI