Ndryshimet për chkdsk në Windows 8

[vaaldr1n]

Nëse mund t’i besohet blogut zyrtar të Microsoftit, Windowsi i ri do të jetë shumë më i suksesshëm në manipulimin automatik, dhe që është shumë më e rëndësishme për shfrytëzuesin, atë praktik, me gabimet në disk, të cilat do të zgjidhen online në prapavijë, pa pasur nevojë të ndërpresim atë që jemi duke bërë aktualisht, përveç në rastet ekstreme kur kemi ndonjë avari totale të diskut.

Sipas Microsoftit, ndryshimet janë bërë edhe në nivelin e fajll sistemit edhe në nivel të chkdsk utility. Sipas skemës së funksionimit të NTFS-së në Tetësh, risia më e rëndësishme është vetëriparimi, gjegjësisht “self-healing” siç e quan këtë Microsofti. Është rritur numri i gjërave të cilat NTFS mund t’i riparojë dhe përmirësojë vetë, pa pasur nevojë për ndërprerje dhe startim të chkdsk utility. Risi është edhe SVS – Spot Verification Service, të cilin e starton driveri i fajll sistemit dhe i cili konfirmon që me të vërtetë bëhet fjalë për kurruptim të të dhënave në disk para se të vazhdohet tutje me “shërimin” e problemit. Ky servis i ri punon në prapavijë dhe në asnjë mënyrë nuk e ngadalëson punën normale të kompjuterit, ndërsa aktivizohet vetëm kur driveri i fajll sistemit e thërret për të konfirmuar korruptimin e të dhënave.

Sipas nevojës disku mund të shkyçet nga sistemi, të vendoset në modin e punës off-line, ndërsa Microsofti këtë operacion e quan Spotifix, dhe thuhet se zgjatë vetëm disa sekonda në kompjuter të rëndomtë, ndërsa në serverë me fusha disqesh dhe disqe publike nuk ka madje as këtë bezdi. Me sistemin e ri të përmirësimeve të diskut koha e startimit të chkdsk-së është proporcionale me numrin e defekteve në disk. Pra, nuk kontrollohet krejt disku por vetëm një sektor i prishur, gjegjësisht jo të gjithë fajllat në të siç bëhet tani.

Po ashtu, tani “shëndeti” i diskut është në sistemin e ndarë në katër statuse. I pari është “Online and Healthy”, pason “Online spot verification needed” ku kërkohet nga SVS-ja që të konfirmojë korruptimin e të dhënave në disk, pastaj vjen “Online scan needed” kur SVS tashmë ka konfirmuar problemet me të dhënat dhe i katërti është “Spot fix needed”, i cili, siç mund të kuptohet nga blogu, kërkon ristartimin e kompjuterit për të rregulluar të gjitha problemet e konstatuara më herët. Thuhet që restarti dhe startimi i chkdsk ia shton vetëm disa sekonda kohës së nevojshme për ngritjen e sistemit, ndërsa tek sistemet serverike nuk ka fare nevojë për restartim. /Koha.net