Fier, viktima e parë nga gripi

[Altin111]

Policia dyshoi për vetëvrasje. Ekspertiza: Gripi, shkak i vdekjes

Një vajzë 25 vjeçe nga fshati Vajkan i Fierit ka gjetur vdekjen për shkak të virozës së gripit, e cila e kishte mbërthyer pesë ditë më parë. Vajza nuk kishte marrë asnjë kurim dhe dje paradite, në gjendje tepër të rëndë, ishte nisur për në spitalin e Fierit, por, sipas mjekëve, kishte ndërruar jetë që rrugës.

Aurora Grëmi quhet vajza që humbi jetën prej gripit. Ajo ka mbërritur dje rreth orës 09.00 në urgjencën e spitalit rajonal të Fierit, me një automjet të rastit, e shoqëruar nga nëna dhe motra. Mjekët që kanë dashur t‘i japin ndihmën e parë, kanë evidentuar se 25-vjeçarja kishte vdekur. Menjëherë është ngritur një ekip mjekësh, mes të cilëve kardiologë, kirurgë, patologë dhe gjinekologë, të cilët janë munduar të gjejnë arsyen e vdekjes së vajzës së re. Trupi i pajetë i Aurora Grëmit është hequr menjëherë nga dhoma e urgjencës dhe është izoluar në një dhomë tjetër, ku përveç mjekëve janë lejuar të hyjnë vetëm ekspertët e policisë, të cilët kanë bërë verifikimet përkatëse.

Rreth mesditës, trupi i 25-vjeçares është dërguar në morgun e spitalit, ku i është nënshtruar autopsisë. Mjeku ligjor, së bashku me një grup ekspertësh të policisë, pas kryerjes së autopsisë kanë deklaruar se në trupin e 25-vjeçares Aurora Grëmi nuk është gjendur asnjë shenjë dhune dhe asnjë përmbajtje toksike, çka përforcon mendimin se vdekja ka ardhur për shkak të virozës së pamjekuar.

Ndërsa mjekët përpiqeshin për të konstatuar shkakun e vdekjes së Aurora Grëmit, motra dhe nëna e saj treguan për gazetën se Aurora ishte e pafuqishme prej disa ditësh. "Ajo kishte grip, por nuk kishte marrë asnjë mjekim", thotë motra më e vogël.

Sipas nënës, 25-vjeçarja ka qëndruar pesë ditë në shtrat dhe vetëm dje në mëngjes ishte ngritur në këmbë dhe i kishte kërkuar të motrës ta çonin në spital. "Unë lajmërova infermieren e lagjes, por ajo u vonua dhe duke pritur atë, vajza ra pa ndjenja në mes të shtëpisë", tregon nëna, Hava Grëmi.

Familjarët kanë shpjeguar edhe për mjekët se në këto pesë ditët e fundit, kur shëndeti i Aurorës ishte përkeqësuar, ajo nuk kishte përdorur asnjë medikament.

Në përfundim të akteve të ekspertimit, policia e Fierit deklaroi se Aurora Grëmi vdiq nga gripi. "Autopsia e kryer në mesditë ka vërtetuar se 25-vjeçarja nuk ka përdorur asnjë lëndë toksike, duke hedhur poshtë mundësinë e vetëflijimit me anën e helmimit. Një mostër nga trupi i saj është dërguar drejt Institutit të Kriminalistikës dhe përgjigjja eksperte e këtij instituti do të mbërrijë pas 3 javësh. Por, nga pyetja e familjarëve dhe deklaratat e mjekut ligjor është vërtetuar se shkak i vdekjes ka qenë gripi", tha një oficer i policisë kriminale, që u mor me çështjen.

Aurora Grëmi ishte vajza e dytë e familjes Grëmi, që jeton në fshatin Vajkan, 10 km larg Fierit. Ajo kishte një vit e divorcuar nga bashkëshorti, me të cilin kishte bashkëjetuar vetëm 2 muaj. Kjo rrethanë e bëri policinë të dyshonte fillimisht për një vetëvrasje. Banorët e fshatit thonë se vajza nuk kishte shfaqur ndonjëherë probleme dhe ishte riintegruar në familje pas martesës së shkurtër.