Shtetrrethim në Qytetin Studenti

[Altin111]

Urdhri: "Studentët, leje për të qarkulluar pas orës 23.00. Lokalet të mbyllen në këtë orë"

Dhjetëra uniforma blu të policisë së Tiranës dhe bashkisë kanë "pushtuar" në orët e para të ditës së djeshme Qytetin Studenti, ku kanë kryer një sërë kontrollesh. Bilanci ka qenë: dhjetëra të shoqëruar, që qarkullonin pa mjet identifikues pas orës 23.00, si dhe gjoba të majme për lokalet që vazhdonin të kryenin aktivitetin pas kësaj ore. Operacioni ka vazhduar deri në agim, ku të gjithë kalimtarët janë ndaluar nga policia për verifikime të rastit. Disa furgonë të policisë kryenin transportimin e të rinjve në drejtim të postës së policisë në Qytetin Studenti, ku, pas verifikimeve, liheshin të lirë me paralajmërimin se "herë tjetër të kenë një mjet identifikues". Madje, në verifikimet kanë marrë pjesë edhe zyrtarë të lartë të drejtorisë së Qytezës, që strehon studentët e rretheve.

Shoqërohen studentet

Posta e Policisë në Qytetin Studenti është "vizituar" dy net më parë nga dhjetëra studente, të cilat janë shoqëruar nga agjentët e policisë. Mësohet se motivi i shoqërimit ishte mospasja e një mjeti identifikues, çka ka sjellë sorollatjen në mjediset e policisë. Zyrtarë të Drejtorisë së Qytetit Studenti konfirmuan për gazetën "Shqip", se operacioni filloi rreth orës 23.00 të ditës së mërkurë dhe mbaroi rreth orës 04.00 të së enjtes, ndërsa udhëhiqej nga Policia e Tiranës në bashkëpunim me bashkinë e kryeqytetit. Këta të fundit, mësohet se kanë vendosur disa gjoba të majme ndaj subjekteve private që kryenin aktivitetin pas orës 23.00, ndërsa janë paralajmëruar se "nëse do të vazhdonin të kryenin aktivitete pas kësaj ore, rrezikonin mbylljen". Kontrollet në lokalet e zonës kanë vazhduar për ligjin antiduhan, ku pothuajse të gjitha lokalet në Qytezë nuk e respektojnë. Kudo mbizotëron smogu dhe tymi i duhanit, ku përqindja e konsumimit është nga më të lartat në Tiranë. Kjo, për shkak se banorët janë të rinj.

Kontrolle të imtësishme

Përgjatë gjashtë orëve, policia e kryeqytetit ka "krehur" zonën e Qytetit Studenti për elementë kriminalë. Dyshimet se në këtë vend fshiheshin të kërkuar, ka detyruar inspektorët e zonës, të ndihmuar nga agjentë të shumtë, të kryenin kontrolle dhe shoqërime të shumta të të dyshuarve. Mësohet se rreth 20 të rinj janë shoqëruar në ambientet e postës së policisë, ku kanë pritur agimin për të shkuar në shtëpitë e tyre. Në polici kanë përfunduar edhe "vizitorët" e Qytetit Studenti, të cilët nuk kanë pasur mjet identifikues dhe për pasojë e kanë parë veten e tyre në birucat e postës policore. Gjatë gjashtë orëve të operacionit gjendja ka qenë alarmante, ku dhjetëra studentë debatonin me forcat policore, ku këta të fundit dilnin gjithmonë fitimtarë. Duke përfituar nga ligjet e shtetit shqiptar, studentët ishin të detyruar të kalonin natën në "dhomat" policore