Kurth erotik, deputetët shqiptarë kapen mat

[Erinaa]

Deputetët e Kuvendit të Shqipërisë i janë drejtuar si zakonisht sallës së seancave plenare, por kësaj të enjte, ata nuk e dinin se në hyrje do t’i priste një “kurth erotik”. Ndryshe nga herët e tjera, pranë traut të oborrit të Parlamentit priste një bjonde e gjatë dhe e veshur në mënyrë shumë provokuese, që vihej në lëvizje sa herë që vinin deputetë që do të futeshin në sallën e seancave plenare.

Në momentet kur afroheshin deputetët, raporton Portali Albeu, vajza seksi kalonte para tyre në mënyrë të shkujdesur, duke bërë sikur fliste në telefon, e ndjekur nga shikimet e gjata të disa prej deputetëve, ashtu edhe nga refuzimi për të shikuar i disa deputetëve të tjerë. Lëvizjet e vajzës dhe reagimet e deputetëve monitoroheshin nga 4 kamera që regjistronin gjithçka. Regjizori i këtij “kurthi” ka qenë vetë humoristi i njohur Koço Devole, që gjendej pranë ambienteve ku po realizoheshin regjistrimet që pritet të transmetohen në televizionin Top Channel, mbase në emisionin “Fiks Fare”.

Skena në fjalë ka shkaktuar jo pak interes edhe tek gazetarët, të cilët të grumbulluar në oborrin e Parlamentit, ndiqnin si spektatorë momentet kur kalonin deputetët dhe reagimet që këta të fundit bënin kur pranë tyre kalonte vajza. Një pjesë e mirë e deputetëve si Arben Malaj, Mark Marku apo Enkelejd Alibeaj nuk kanë reaguar fare në momentin kur pranë tyre ka kaluar vajza në fjalë, edhe pse kur u janë afruar gazetarëve, nuk e kanë lënë pa e kaluar me shaka “kurthin” që sapo kishin kapërcyer në hyrje të oborrit të parlamentit. “E kalove provën” i janë drejtuar gazetarët Alibeajt ndërsa ky i fundit është përgjigjur me shaka dhe me të qeshura: “Për atë gjënë e madhe e keni fjalën”.

Ndërkohë, deputeti Edi Paloka ka qenë i vetmi që jo vetëm e ka hedhur shikimin vajzës në fjalë, por edhe është ndalur duke biseduar me të, moment që është fiksuar nga kamerat. Kur iu është afruar gazetarëve që po qeshnin, Paloka i ka paraprirë komenteve dhe pyetjeve duke thënë :”Nuk rashë në kurth jo”. Një nga deputetët që ka rënë në kurth ka qenë S.L, deputet i Partisë Demokratike, në listën e qarkut të Tiranës. Ky i fundit e ka “përpirë” me sy vajzës seksi që po i kalonte pranë, moment ky i fiksuar nga kamerat dhe që pritet të transmetohet. Deputeti në fjalë e ka kuptuar kurthin, pasi kur është larguar vetëm pak metra nga vajza, është kthyer duke parë edhe kamerat që ishin vendosur. Në ato momente ai e ka kuptuar se bëhej fjalë për një kurth, megjithatë i është drejtuar sallës së Parlamentit, tek dera e së cilës është ndalur për disa minuta, duke shikuar i shqetësuar atë që ndodhte tek hyrja e oborrit të Parlamentit