Fisi ngujohet "për një fjalë goje"

[Altin111]

Vëzhgimi i "Fiks Fare": Peshkopi, pas vrasjes së 10-vjeçarit Bekim Çenga, ngujohet familja e "vrasësit"

Kundërshton familja e viktimës: Ne ia kemi lënë drejtësisë

Një fis i tërë ngujohet vetëm me një fjalë, të dëgjuar në një televizion. Ky është ngujimi i fundit në qytetin e Peshkopisë, pas vrasjes së 10-vjeçarit Bekim Çenga.

Familja Ziza, nëna, babai dhe vëllai i të arrestuarit Shpëtim Zisa, janë ngujuar pas një fjale, që e kanë dëgjuar në një ekran televiziv se, familja e viktimës do të marrë hak, si dhe pas fjalës së policisë, ditën kur u arrestua Shpëtimi, e cila u tha të afërmve të tij të gjenin një strehë tjetër, jo shtëpinë e tyre për t‘u fshehur, sepse familja e viktimës ishte e nxehur. Që nga ajo ditë, ata janë mbyllur në shtëpi.

Prindërit e viktimës, babai Ylli Çenga dhe e ëma Etleva, këmbëngulin në kërkesën e tyre që shteti të zbardhë ngjarjen. Por kur i pyesim se përse është ngujuar familja Zisa, ata ngrenë supet dhe thonë se nuk i kanë dërguar fjalë askujt që të ngujohet.

Kjo është historia e një prej ngujimeve të fundit në Shqipëri, ku familje të tëra mbyllen në shtëpi nga frika e hakmarrjes nga ana e familjarëve të viktimës. "Kemi një muaj e gjysmë të ngujuar, të mbyllur këtu në shtëpi, që nga data 27 tetor 2007, kur erdhi policia, e cila kontrolloi shtëpinë. Policia na tha: Nuk keni punë në shtëpi. Ndërsa shefi i krimeve na tha: Në shtëpi nuk keni punë të shkoni. Ata (d.m.th. familja e viktimës) është shumë e acaruar), mund t‘ju vrasin, - tregon Melita Ziza, nëna e të arrestuarit si autor i krimit.

Të njëjtën gjë tregon edhe i ati i të arrestuarit për këtë ngjarje. "Më thanë: E bëri çuni. Derisa të zbardhet kjo çështje, do të rrimë të mbyllur, pra derisa ta zbardhë shteti këtë punë. Jam i bindur që djali im nuk e ka bërë vetë", thotë ai. Përmes të tjerëve, -shton ai, - kam dëgjuar që familja e viktimës do të vrasë çunin më të mirë. E kam parë në televizor.

Familja e viktimës e mohon kategorikisht këtë fakt. "Ne nuk i kemi çuar fjalë askujt të ngujohet. Presim nga shteti të zbardhë të vërtetën", thonë ata para kamerës së "Fiks Fare". "Nuk kemi kërcënuar njeri. Këto janë thashetheme", thonë nëna dhe babai i viktimës 10-vjeçare, Bekim Çenga.

Askush nuk e di se nga ka dalë fjala që ka ngujuar disa familje në Peshkopi. Edhe vetë kryetari i Bashkisë së Peshkopisë, Ilir Krosi, tregon se ka dijeni për mbylljen në shtëpi të familjes Ziza. Madje, nëna e të pandehurit Shpëtim Ziza, Melita, i ka shkuar në zyrë për t‘i kërkuar ndihmë ekonomike, pasi në këtë familje askush nuk punon dhe të gjithë janë ngujuar.

Frika e gjakmarrjes ka ngujuar rreth 15 familje të tjera në këtë qytet. E vetmja shpresë e kësaj familjeje që t‘i rikthehet jetës normale është që drejtësia shqiptare të zbardhë të vërtetën. Rreth 20 pjesëtarë të familjeve të ngujuara kanë fëmijët e tyre në shkollë fillore, 9-vjeçare dhe të mesme. Të gjithë këta fëmijë kanë lënë shkollën dhe janë të detyruar të qëndrojnë të izoluar për sa kohë që të mos jenë të rrezikuar nga gjakësit.