Felix Baumgartner u hodh nga lartësia prej afro 39 kilometrave (video)

[vaaldr1n]

Roswell, 14 tetor - Pikërisht në orën 20:08 minuta sipas kohës sonë, austriaku Felix Baumgartner kërceu nga kapsula e tij e ngritur në stratosferë me balon dhe u hodh në ajër në drejtim të Tokës. Pas 4 minutave e 22 sekondave, gjatë të cilave ai pati rënie të lirë me shpejtësi të zërit, diku rreth 1 300 km në orë, Felixi e aktivizoi parashutën dhe në orën 20:17 minuta aterroi me sukses në sipërfaqen e tokës, njoftoi rrjeti CNN, i cili* përcolli për së gjalli me transmetim televiziv këtë përpjekje për thyerjen e rekordit botëror të hedhjes nga lartësia mbi sipërfaqen e planetit tonë. Para se të kërcente u thye edhe rekordi tjetër botëror, ai i lartësisë që e arriti balona me të cilin u ngjit në kufirin ndërmjet atmosferës së Tokës dhe vakuumit të gjithësisë.

Sipas raporteve të para, balona arriti në 39 kilometra lartësi në orën 19.59 sipas kohës sonë, dhe nga kjo lartësi u hodh pastaj edhe Baumgartner. Me këtë austriaku 43-vjeçar theu rekordin botëror, të vendosur nga Joe Kittinger para 52 vjetëve, i cili atëbotë kishte kërcyer nga lartësia prej 31.3 kilometrave. Mirëpo, rekordisti i ri nuk ia doli ta thyejë rekordin e para 52 vjetëve sa i përket rënies së lirë pa parashutë.