Gjakmarrja, vriten nënë e bir

[Altin111]

Age dhe Platin Filipi janë vrarë në fshatin Ças nga fqinji i tyre Arjan Zefi. Policia arreston autorin 30 minuta më pas

SHKODER- Një grua 55- vjeçare dhe i biri i saj 20 vjeç janë ekzekutuar mesditën e djeshme për një konflikt të lindur dy vite më parë në fshatin Ças të Velipojës. Viktimat janë Age Filipi, 55 vjeçe, me profesion mësuese ne fshatin Luarzë të komunës Velipojë në Shkodër dhe djali i saj Platin (Rafael) Filipi 20 vjeç, i ardhur pak ditë më parë nga Italia për pushime. Autori i vrasjes, Arjan Zefi, është arrestuar rreth 30 minuta pas ngjarjes nga policia lokale. Vrasja e radhës në Shkodër mund të ishte parandaluar sikur të zbatoheshin ligjet e shtetit dhe jo Kanuni. Vetë viktimat ishin në pritje të sulmit nga ana e fqinjit të tyre dhe për këtë gjë ata udhëtonin të armatosur. Pas vrasjes, policia gjeti edhe dy pistoletat e tyre në makinë.

Vrasja

Rreth orës 13.20 të paradites së djeshme Age Filipi, 55 vjeçe, me profesion mësuese ne fshatin Luarzë të komunës Velipojë në Shkodër dhe djali i saj Platin Filipi, 20 vjeç, i ardhur pak ditë më parë nga Italia, po udhëtonin me mjetin e tyre tip "Fiat" ngjyrë gri, me targa "SH 2016 D". Nënë e bir ktheheshin në banesën e tyre, pasi kishin dalë për të bërë blerjet e rastit për festën e Krishtlindjeve. Ata kanë hyrë qetësisht në fshatin Ças të Velipojës dhe po kalonin në rrugën e brendshme të fshati kur pas një kthese të vogël kanë rënë në pritë. Vrasësi kishte zënë pozicion pikërisht pas kthesës duke shfrytëzuar faktin që të dyja anët e rrugës ishin të mbuluara nga shkurret. Arjan Zefi, 28 vjeç, fqinji i tyre i cili jeton rreth 100 metra larg banesës së familjes Filipi, ka dalë në mes të rrugës me një kallashnikov në dorë. Sapo e kanë parë, Platini ka nxjerrë një armë tip pistoletë që e kishte me vete por nuk ka mundur të qëllojë ndaj agresorit. Të shtënat e shpejta të pushkës 20-she, gjysmë automatike kanë goditur fuqishëm makinën e vogël me të cilin udhëtonin nënë e bir. Platin Filipi ka gjetur vdekjen e menjëhershme pasi ka marrë plagë në kokë. Ai ka mbetur me pistoletën në dorë por pa mundur të qëllojë. Ndërkohë nëna e tij, ka mundur që të mbijetojë edhe disa minuta por edhe ajo ka vdekur më pas.

Arrestimi

Pasi është siguruar se objektivat e atentatit të tij kishin vdekur, agresori Arjan Zefi, ka dalë nga shkurret dhe tepër qetësisht është nisur në këmbë drejt banesës së tij. Krismat e armës janë dëgjuar nga banorët e zonës, të cilët kanë njoftuar menjëherë policinë lokale. Kjo e fundit ka shkuar në vendin e ngjarjes dhe pasi ka parë viktimat është nisur drejt banesës së autorit të ngjarjes. Vetëm 30 minuta më pas, rreth orës 14.10 ka kryer arrestimin e Arjan Zefit. Nga hetimet e para të policisë është zbuluar se konflikti ka nisur pas një sherri për tokën. Age Filipi ishte dhe kryetare e PS-së për komunën e Velipojës. Sipas policisë, Arjan Zefi e ka pranuar në komisariat se është autori i vrasjes ndërkohë që hetuesit kanë sekuestruar edhe armën e krimit, një pushkë gjysmë automatike mod 56. Trupat e viktimave kanë qëndrua rreth një orë në vendin e ngjarjes deri sa policia ka kryer të gjitha veprimet.

Një vrasje e paralajmëruar prej vitesh

SHKODËR- Krimi i ndodhur mesditën e djeshme në Velipojë ka tronditur opinionin lokal por edhe të gjithë Shqipërinë. Kjo është vrasja e 11-te e këtij viti në qarkun e Shkodrës, me 12 viktima, ndër të cilat tre kanë qenë gra. Edhe këtë herë vrasja ka ndodhur pas një hakmarrjeje të vjetër, e cila mund të ishte parandaluar shumë kohë më parë. Pas vrasjes së djeshme, autori i krimit, Arjan Zefi, ka dalë tepër i qetë nga prita që kishte organizuar dhe ka shkuar në shtëpinë e tij duke pritur të mbërrinte policia. Madje dëshmitarët okularë kanë pohuar në polici se kanë parë Zefin që mbante armën në sup i pa shqetësuar. "Kur ka dalë përpara hyrjes së banesës së tij, Arjan Zefi ka ngritur armën në ajër dhe ka qëlluar tre herë. Këtë e ka bërë për të treguar në të gjithë fshatin se ai kishte marrë hak për atë që kishte ndodhur. Në derën e shtëpisë së tij janë gjetur tre gëzhojat e pushkës, ndërkohë në vendin e ngjarjes janë gjetur edhe 16 gëzhoja të tjera",- thanë dje hetuesit e çështjes. Sipas tyre, edhe vetë viktimat ishin të armatosur por në asnjë rast nuk kishin mundësi të reagonin përpara gjakësit.

Rama: Krimi në Velipojë, pasojë e pafuqisë së shtetit

Kryetari i Partisë Socialiste, Edi Rama, i është bashkuar dhimbjes së familjes Preka për tragjedinë e djeshme ku mbetën të vrarë Age dhe Platin Preka. Në një deklaratë për mediat kreu socialist, duke shprehur dhimbjen për viktimat e kësaj ngjarjeje ka dhënë alarmin për nivelin në rritje të krimit në vend. "Kjo tragjedi ku humbi jeta e nënës dhe e birit të saj, ka tronditur thellë opinionin publik, që tanimë gjendet sistematikisht përpara viktimave të një barbarie kriminale në rritje", - shprehet Rama në deklaratën e tij. Në emër të të gjithë socialistëve Edi Rama u shpreh të afërmëve të viktimave ngushëllimet më të sinqerta. Gjithashtu ai nënvizon se kjo kronikë e një ngjarjeje të paralajmëruar është vetëm një hallkë në zinxhirin e gjatë të veprave kriminale të kësaj natyre, të cilat reflektojnë pafuqinë e shtetit ligjor në garantimin e jetës e të sigurisë së qytetarëve. "Politika e re e PSSH-së në qeverisje do ta nxjerri shoqërinë nga kjo klimë mesjetare dëshpërimi social e instikti hakmarrës, ku e mbajnë të ngujuar prej 17 vitesh hijet e së shkuarës", - thekson kreu i PS-së Edi Rama. F. B

Një rrip toke është shkaku i nisjes së hakmarrjes ndërmjet dy familjeve. Në dhjetor 2006 Platini ka plagosur vrasësin

Si nisi konflikti mes fqinjëve Zefi e Filipi

SHKODËR- Familja e viktimave Age e Platin Filipi dhe ajo e autorit Arjan Zefi e kanë nisur konfliktin për motive të dobëta. Edhe pse ata ishin fqinjë me njëri- tjetrin, sherri i vjetër kishte bërë që të mos flisnin më prej vitesh. Të njohur të dy familjeve, banorë të fshatit Ças në komunën e Velipojës, tregojnë se konflikti mes tyre ka nisur për pronësinë e një rripi toke por më pas konflikti është mbyllur . Por megjithatë dy familjet nuk kanë shkuar përsëri mirë mes tyre dhe ka qenë bashkëshorti i Ages dhe babai i Platinit ai që është grindur me vëllanë e autorit të ngjarjes, rreth dy vjet më pare.

Kjo grindje ka pasur si objekt fjalë fyese që palët kanë drejtuar ndaj njëra- tjetrës. Madje këto fjalë nuk janë thënë as drejtpërdrejt por përmes personave të tjerë. Sipas bashkëfshatarëve të tyre, autori i vrasjes së djeshme, Arjan Zefi, ka shkuar tek shtëpia e familjes Filipi për tu sqaruar rreth konfliktit të kryefamiljarit me vëllanë e tij. Por fqinjët e tij, sapo e kanë parë e kanë qëlluar me armë gjahu duke e plagosur në sup. Ky krim është marrë përsipër fillimisht nga Age Filipi. Ajo ka deklaruar në polici se ishte autorja e plagosjes me çifte të Arjan Zefit. Por hetimet e mëtejshme të policisë treguan se personi që kishte qëlluar me armë gjahu mbi Arjan Zefin ishte Platin (Rafael) Filipi. Ngjarja ka ndodhur më 11 dhjetor të vitit 2006 dhe Platin Filipi është arrestuar nga policia.

Gjykata e ka dënuar atë me gjobë, për plagosje të lehtë, ndërsa armën e gjahut, çifte e ka pasur me leje. Fillimisht akuza ka qenë vrasje e mbetur në tentativë por më pas është ndryshuar në gjykatë. Pas kësaj Platini ka shkuar në Itali dhe është kthyer një javë më parë. Gjatë kësaj kohe, pothuajse e gjithë familja e tij kishte nisur që të mbrohej nga gjakësit. Ata udhëtonin të armatosur dhe vetëm pak ditë më parë, përmes ndërmjetësve, dy palët i kanë çuar fjalë njëra–tjetrës që do ta vazhdonin konfliktin me armë. Dhe duke ditur këtë fakt Arjan Zefi ka organizuar më së miri atentatin e djeshëm. Age Filipi kishte dy djem, njëri prej të cilëve u vra dje bashkë me të.

Në vendin e ngjarjes, të afërmit e viktimave nuk flasin asgjë, ndërsa prisnin kryerjen e veprimeve nga policia që më pas të merrnin kufomat e njerëzve të tyre. Vetëm lot dhe vajtimi që i bënte nga larg një e afërm e tyre, duke i thirrur më shumë Platinit 20- vjeçar që ishte vrarë bashkë me nënën e tij. Banorët e fshatit Ças por dhe të komunës Velipojë janë tronditur nga kjo e ngjarja që është e dyta që ndodh në komunën e tyre në harkun kohor të më pak se dy muajve.Më 19 nëntor , në një tjetër fshat të kësaj komune u vra 18- vjeçarja Antoneta Tanushi dhe u plagos Fatjon Luka .Viktima e djeshme Age Filipi punonte si mësuese prej shumë vitesh, në një fshat tjetër të kësaj komune në atë të Luarzit. Por ajo njihej së tepërmi dhe sepse ishte një ndër figurat e PS në këtë zonë dhe aktualisht kryetare e PS për këtë komunë, aktive në fushatat elektorale të së majtës.

VIKTIMAT

Age Zefi, 55 vjeçe, nëna e dy fëmijëve, me profesion mësuese ne fshatin Luarzë të komunës Velipojë në Shkodër. Ajo njihej në zonë edhe si një aktiviste e majtë dhe kryetarja e Partisë Socialiste për Velipojën

Platin (Rafael) Filipi 20 vjeç, djali i Ages kishte ardhur pak ditë më parë nga Italia për pushime. Një vit më parë ai kishte qëlluar me çifte mbi Arjan Zefin pas një konflikti për tokën. Për këtë ishte dënuar me gjobë

VRASËSI

Arjan Zefi, autori i vrasjes së djeshme prej dy vitesh ishte në konflikt me fqinjët e tij, familjen Filipi. Madje kur ai kishte shkuar për tu pajtuar ata e kishin pritur me pushkë duke e qëlluar dhe plagosur në sup. Që nga ajo kohë ai kishte planifikuar vrasjen