Kosovë, rreth 600 mijë fëmijë të rrezikuar nga varfëria

**olsii** · 31-10-2012, 08:21 PM

Rreth 600 mijë banorë në Kosovë janë fëmijë, të cilët janë kategoria e rrezikuar dhe prekur më së shumti nga shkalla e lartë e varfërisë.

Ky fakt u bë i ditur sot në Konferencën “Roli i parlamenteve në promovimin dhe monitorimin e të drejtave të fëmijëve”, organizuar nga Zyra e UNICEF-it në Prishtinë dhe Kuvendi i Republikës së Kosovës.

E pranishme në këtë konferencë, Raportuesja speciale për Kosovën në Parlamentin Evropian, Urlike Lunacek, i vlerësoi fëmijët si minoriteti më i madh e i rrezikuar që nuk përfaqësohet në parlament. Ajo tha se fëmijët e Kosovës meritojnë të ardhme të sigurtë, kujdes të shtuar familjar e shoqëror dhe arsim shumë më cilësor.

Lunacek i bëri apel institucioneve të Kosovës, e në mënyrë të veçantë deputetëve, që të miratojnë ligje të mira për fëmijët dhe të konsultohen vazhdimisht me shoqatat që merren me të drejtat e tyre, në mënyrë që çdo veprim apo vendim i Qeverisë të ketë në konsideratë të drejtat dhe interesat e fëmijëve.
Në vëmëndje të parlamentarëve, Lunaçek solli pjesë të Traktatit të Lisbonës që zgjerojnë fuqinë e Parlamentit Evropian për sigurimin e të drejtave të fëmijëve, duke shtuar nevojën që Kosova të veprojë në kuadër të këtyre rregullave edhe pa qenë anëtare e BE-së, sepse në të ardhmen synon anëtarësimin në këtë bashkësi shtetesh.

Ndërsa kryetari i Komisionit Parlamentar për Integrime Evropiane, Lufti Haziri, foli për mundësitë dhe përparësitë e procesit të anëtarësimit në BE dhe fondet e IPA-së për të promovuar të drejtat e fëmijëve dhe reformat e përqendruara tek fëmijët.

Në sesionin e pasdites folen edhe Verena Knaus, këshilltare e lartë për politika, zyra e UNICEF-it në Bruksel si dhe Melvin Asin, zv/kryesues i Operacioneve, Zyra e BE-së në Kosovë.

Nënkryetarja e Komisionit Parlamentar për Arsim, Kulturë, Rini, Sport, Administratë Publike, Qeverisje Lokale dhe Media, Teuta Haxhiu. tha se “Kosova ka popullsinë më të re në Evropë dhe do të duhet të shpenzojë më shumë në arsim”.

(d.b/BalkanWeb)