Gatimi i vezëve

[Lirenti]

Vezë të ziera
Vezët zihen në ujë të vluar me kripë, për 1 kokërr vezë duhet 1 gotë ujë, veza që të bëhet surbull (rrufkë) lihet 2-3 minuta të vlojë, që të zihet mesatarisht 4-5 minuta dhe e fortë 8-10 minuta. Ose kur duam vezë surbull, numërojmë që nga koha e vlimit deri në 150 pastaj e heqim dhe e vëmë në ujë të ftohtë.


Vezë të ziera pa lëvozhgë
Në tenxhere të vogël hidhet ujë dhe kur të marrë valë, shtohet kripë e uthull, e thyejmë vezën në pjatë, duke u kujdesur që të mos prishet e verdha. Kur uji është duke vluar hidhet veza dhe mblidhet anash e bardha me kujdes që të mbulohet e verdha. Zihet 3-4 minuta dhe hiqet me anë të një luge me vrima. Veza e zier në këtë mënyrë shërbehet me pure patate, pure spinaqi etj.

Vezë syze
Në një tigan të posaçëm ose tigane të vegjël me dy veshë hidhet gjalpi ose margarina e pasi të jetë shkrirë hidhen vezët me kujdes në mënyrë që e verdha të mos prishet. Lihet 3-4 minuta në zjarr derisa të mpikset e bardha, ndërsa e verdha të jetë e lëngshme. Kripa i hidhet sipas dëshirës.
Shënim: Si rregull, vezët duhet të thyhen më parë në pjatë dhe pastaj të hidhen në tigan, pasi ndodh që mund të dalin të prishura. Vezët bëhen të shijshme me gjalpë, kjo varet nga dëshira e shija e secilit, mund të bëhen edhe me vaj.

Vezë syze me qepë të njoma
Qepët e njoma të pastruara e lara priten 3-4 cm skuqen në zjarr të ngadalshëm mbuluar me kapak sa të zbuten, i hidhet kripë, kopër dhe në fund vezët.
Për 1 person:
vezë 1 ose 2 kokrra, qepë 2 copë mesatare, vaj 2 lugë gjelle, kripë, kopër.

Vezë me qepë e domate
Qepët e grira hollë kaurdisen sa të zverdhen e të zbuten, i hidhen domatet e qëruara nga cipa dhe vazhdohet kaurdisja, shtohet kripë, piper, majdanoz dhe vezët sipër. Skuqen sa të mpikset e bardha e vezës.
Për 1 person:
vezë 1 ose 2 kokrra, qepë 1 kokërr mesatare, vaj 2 lugë gjelle, domate 1 kokërr mesatare, kripë, piper, majdanoz.

Vezë me mish
Zgjidhet mish tul i butë pa damarë, rrihet me satër, pritet në rripa të hollë dhe lihet në një anë.
Në tigan hidhen qepë të grira hollë në formë gjysmë rrethi, skuqen në zjarr të ngadalshëm sa të zverdhen e të zbuten, hidhet mishi dhe vazhdohet kaurdisja mbuluar me kapak duke hedhur kripë, kopër dhe vezët syze. Skuqen sa të mpikset e bardha e vezës.
Për 1 person:
vezë 1 ose 2 kokrra, mish 1 thelë mesatare, qepë 1 kokërr të vogël, vaj 2 lugë gjelle, kripë, piper, kopër.


Omëletë e thjeshtë
Në pjatë rrihen vezët me pak kripë e qumësht dhe skuqen në tigan me yndyrë (gjalpë) të nxehtë. Hapet masa në fundin e tiganit, piqet dhe mblidhet në formë roleje, duke e vendosur në pjatë me palosje poshtë.
Për 1 person:
vezë 2 kokrra, qumësht 2 lugë gjelle, lyrë 2 lugë gjelle, ose gjalpë të freskët 1 lugë gjelle, pak kripë.

Omëletë me djathë
Rrihen vezët, i shtohet djathë i thërrmuar i bardhë ose kaçkavall i grirë në rende, kripë, qumësht, skuqet në yndyrë të nxehtë dhe mblidhet në formë roleje.
Për 1 person:
vezë 1 ose 2 kokrra, yndyrë 2 lugë gjelle, djathë i grirë 1 lugë gjelle, qumësht 2 lugë gjelle, pak kripë.


Vezë të ziera sallatë
Vezët zihen fort, futen në ujë të ftohtë që t'u qërohet kollaj lëvozhga, qërohen, priten në feta dhe vendosen bukur në pjatë. U hidhet sipër kripë, piper i zi i bluar, majdanoz i grirë hollë, vaj e uthull. Kjo sallatë bëhet më e shijshme në qoftë se në vend të vajit i vihet sipër salcë majoneze. Kjo sallatë zbukurohet dhe me feta domate.
Vezët mund të përgatiten dhe ndryshe. Zihen vezët surbull, ndahen përgjysëm me thikë nxirret me lugë veza e zier dhe hidhet në pjatë duke i shtuar kripë, piper, majdanoz.
Për 1 person:
vezë 1 ose 2, vaj 1 lugë gjelle, uthull 1 lugë gjelle, kripë, piper, majdanoz 2 fije.


Vezë të mbushura me sallatë ruse
Zihen vezët të forta, qërohen, ndahen përgjysmë duke i hequr të verdhën. Gjysmat e vezëve (të bardhat) mbushen me sallatë ruse të gatshme dhe sipër zbukurohen me të verdhat e vezëve të thërmuara, me majdanoz të grirë hollë dhe me copëza gogozhare.
Për 1 person:
sallatë ruse 1 lugë gjelle, majdanoz 1 fije, pak gogozhare.

Vezë të mbushura me salcë jeshile

Vezët zihen dhe ndahen përgjysmë duke i hequr të verdhën. E verdha e vezës thërrmohet, dhe vendoset në enë porcelani, duke i hedhur kripë, gjalpë të freskët, lëng majdanozi e lëng limoni. I përziejmë së bashku që të bëhen si pure, mund t'u hidhet dhe pak salcë majonezë. Me këtë masë mbushen vezët, zbukurohen sipër me gogozhare e majdanoz duke i vënë në pjatancë.
Shënim: Vezët mund të mbushen edhe me salcë beshamellë, e përpunuar me të verdhat e vezëve e kaçkavall, ose me të verdhat e vezëve të përpunuara me kastraveca turshi, me salcë majonezë etj.
Për 1 vezë:
gjalpë 1 lugë kafeje, lëng limoni 2 lugë kafeje, majdanoz 1 tufë.

Omëletë me domate
Domatet vihen në ujë të vluar 3-4 sekonda që t'u dalë më lehtë cipa dhe grihen në kubikë të vegjël. Në një enë me yndyrë hidhen domatet, kaurdisen, shtohet kripë, piper, majdanoz dhe lihen në një anë. Në tiganin me yndyrë hidhen vezët e rrahura me pak qumësht e kripë dhe skuqen në formë pete.
Mbi petë vendosen domatet e përgatitura, mblidhet omëleta në formë roleje dhe vihet në pjatë me palosjen poshtë.
Për 1 person:
vezë 1 ose 2 kokrra, domate 1 kokërr mesatare, qumësht 1 lugë gjelle, kripë, piper, majdanoz.



-----
Burim Wiki