E bukur nga koka te këmbët

[labja]

Duke u kushtuar vëmendje të gjithave: edhe detajeve. Ja si mund të shmangi floket e yndyrshëm apo të thatë. Të keni duar dhe këmbë të bukura dhe thonj të dekoruar. Me ardhjen e verës hidhen tutje çorape e bluza të trasha, pantallona e funde të gjatë... me shumë dëshirë vishen rrobat e holla, dalin nga kutitë sandalet... Me pak fjalë vishemi gjithmonë e më pak dhe zbulojmë gjithmonë e më shumë trupin tonë. Por ndonjëherë, pamja nuk kënaq dëshirat e ndrydhura gjatë dimrit; prova me rrobat e banjës me mundim na përmbush kërkesat ndaj vetes dhe ndihemi kështu të pakënaqura. Sigurisht nuk mund të shpresojmë në një mrekulli...por për t’u përmirësuar ka akoma kohë. E rëndësishme është të kujtosh se, edhe pse larg nga ideja jonë për perfeksion, një trup i trajtuar është gjithmonë këndshëm për syrin. Pse mos të nisim nga ekstremitetet? Të përqendrohemi atëherë mbi flokët, këmbët dhe duart.


Flokët... korniza e fytyrës

Flokët e lyer me shije, të ndezur nga nuancat më trendy, me krehje të buta, të kapur, të gjatë apo të shkurtër... pak rëndësi ka. Mjafton të jenë në të njëjtën kohë të shëndetshëm dhe të ndritshëm, të trajtuar dhe të rregulluar bukur.

Të kesh flokë të bukur dhe të fortë varet vetëm dhe ekskluzivisht nga ne. Duke lënë mënjanë llojin e flokëve është e mundur t’i kesh të shëndetshëm dhe si rrjedhojë edhe të bukur, me disa këshilla të vogla, por të rëndësishme. Çfarë duhet të bësh dhe çfarë jo.

Larjet e shpeshta me produkte agresive janë përgjegjësit kryesorë të dëmtimit vazhdueshëm të flokëve. Zgjedhja e shampos është e rëndësishme. Është gjithashtu shumë i rëndësishëm përdorimi i produkteve të një cilësie të mirë dhe jo patjetër që shkumëzojnë. Për sa i përket tharjes, kini parasysh ta mbani tharësen në një largësi të tillë që temperatura mbi flokë mos të jetë shumë e lartë. Edhe në zgjedhjen e trajtimeve duhet të jeni të kujdesshme, dhe nëse këtë zgjedhje e lini në duart e ekspertëve, do mund të shmangni shkatërrimin e flokëve, që do të kërkonte më pas kura drastike. Produktet dekoloruese, rrezet e diellit e bojërat e çdo lloji, sado cilësore që mund të jenë, e dobësojnë flokun, prandaj është mirë mos të abuzosh. E njëjta gjë vlen edhe për shtrirjet dhe permanentet, mbi të gjitha në rast se i ushtroni mbi flokë të trajtuar më parë... E pra, më mirë është natyrale!!!

Në verë situata keqësohet në mënyrë të pashmangshme. Ekspozimi i zgjatur në rrezet e diellit, larjet e shpeshta në det ose pishinë nuk bëjnë gjë tjetër, veçse i dëmtojnë flokët. Ja pse bëhet e domosdoshme t’i mbrosh nga klori, kripërat dhe rrezet ultravjollcë. Në treg do gjeni një pafundësi produktesh, po në qoftë se nuk dini cilin të zgjidhni, këshillohuni me parukierin tuaj. Një mënyrë e mirë për të shmangur bezdinë që të shkakton tufa e flokëve në pisk të vapës është që t’i kapësh ato bisht. Por kujdes! Përdorni llastikë të përshtatshëm, të butë për të shmangur dobësimin dhe këputjen e flokëve.

Flokë të thatë

Flokët, ashtu si lëkura, janë pak a shumë pasqyra e shëndetit; ja përse, përveç shkaqeve të jashtme, duhet zbuluar nëse ka shkaqe të brendshme. Në rastin e flokëve të thatë dhe pa shkëlqim duhet të përcaktosh gjendjen e përgjithshme të hidratimit, të shohësh nëse edhe lëkura shfaqet e hidratuar keq. Në rast se ndodh të kemi një përputhje ose vuajmë nga një funksionim i keq i gjëndrave, thatësia e lëkurës dhe e flokëve tregon se diçka nuk funksionon si duhet. Në një rast të tillë ideale është të këshillohesh me një specialist për ta shmangur problemin nga rrënjët.



Në rast se flokët e thatë janë shkaktuar nga produktet kimike, faktorët atmosferikë dhe prej lënies pas dore, trajtimi i jashtëm ekziston dhe është i efektshëm.

Përdorni një shampoje ushqyese, një krem-balsam me përmbajtje keratine ose vitamina të grupit B dhe aplikoni një herë në javë pas shampos dhe para maskës së flokëve një sasi të bollshme vaji ulliri. Nuk do sjellë një mrekulli, por është një kurë natyrale dhe me rezultat. Masa e vajit duhet mbajtur gati një orë dhe pastaj të shpëlahet me ujë të bollshëm. Pastaj aplikoni balsamin, lëreni të veprojë për kohën e nevojshme dhe procedoni si zakonisht.

Flokë të yndyrshëm

Për flokët e yndyrshëm bëhet - dhe jo rrallë - gabimi më i zakonshëm... të eliminosh yndyrën me forma nga më agresivet. Të bindur që mënyra më e mirë është ajo më energjikja përdoren produkte acide, që në shumë raste s’bëjnë gjë tjetër veçse i përkeqësojnë gjërat. Ndodh në fakt që lëkura e kokës, e nxitur nga përbërësit kimikë, bëhet shumë e thatë dhe kështu hyhet në një rreth vicioz. Ideale është të matësh pH të flokëve dhe të përdorësh një shampo që e ekuilibron atë shkallë-shkallë. Mundësitë që natyra na ofron janë më të mirat në këtë rast... efekti shfaqet më ngadalë, por është pa dyshim më i qëndrueshëm. Mund të zgjidhni ndërmjet hithrës, rozmarinës dhe eukaliptit, por jo para se të këshilloheni me një specialist të produkteve bimore. Mbani nën kontroll ushqyerjen dhe kontrolloni funksionimin e mëlçisë.

Majat e dyfishta

Një nga efektet e padëshiruara të dëmtimit të flokëve është problemi klasik, aspak estetik, degëzimi në ekstremitet... të urryerat maja të dyfishta. Mënyra më e efektshme mbetet një prerje drastike që heq tre a katër centimetra. Jo gjithmonë jemi të gatshëm të sakrifikojmë gjatësinë e flokëve dhe në këtë rast problemi mund të shmanget duke përdorur vazhdimisht një produkt vajor të veçantë. Ka të llojeve të ndryshme, prej farash liri, prej silikoni, me proteina, por veprimi është i njëjtë, synojnë fijet e flokut...po efekti është i përkohshëm dhe për të shmangur problemin duhet t’u drejtohesh gërshërëve.

Si përfundim ... edhe flokët kanë nevojë për pushime të shëndetshme:

Në verë përfitoni të mos i thani me tharëse, shmangni bojërat dhe trajtime kimike, trajtojini me produkte ushqyese dhe rigjeneruese dhe në vjeshtë do jenë më të shëndetshëm dhe si pasojë më të bukur.

Manikyr e pedikyr

o gjithmonë i kushtojmë vëmendjen e duhur trajtimit të duarve dhe këmbëve...edhe pse duart e bukura janë një kartëvizitë e përkryer; për të mos folur për këmbët, që përveç aspektit estetik, në qoftë se trajtohen mirë evitojnë lodhjen dhe dhembjen. Por ecim me radhë...

Duar prej dive

Të buta, të lëmuara, me thonj të trajtuar dhe me formë harmonike, ose gati gërvishtës të lyer me ngjyra të fuqishme. Gjithçka është e mundur. Edhe ndryshimi i look-ut të duarve me gurë që ndriçojnë, tatuazhe dhe thonj fals është gjithashtu i mundur. Para së gjithash duhen lëmuar thonjtë për të pasur një gjatësi uniforme. Vetëm në raste ekstreme përdorni prerëse ose gërshërë, ndërsa zakonisht u jepni gjithmonë përparësi limave prej kartoni.

Pasi t’i keni lyer me krem duart, duke u përqendruar përreth thonjve, mbajini gishtat të zhytura në ujë për disa minuta; kur të jenë zbutur i thani ujin me një copë thithëse dhe kaloni një shkop druri portokalli rreth rrëzës së thonjve duke prerë vetëm lëkurat më të forta dhe më të dukshme.

Për sa i përket formës së thonjve, nuk ekzistojnë rregulla fikse. Aktualisht është në modë forma katrore, që i përshtatet më mirë modelit french voga...por në rast se dëshironi mund t’i jepni një formë më të rrumbullakosur. Në rastin e një manikyri french, pasi të kesh eliminuar të dalat, kalohet një laps i bardhë poshtë thonjve, për të theksuar kontrastin që është i nevojshëm të krijohet. Në qoftë se dëshironi një hark të bardhë, mund të krijoni një me një manikyr po të bardhë, vetëm në ekstremitet.

Në qoftë se dëshironi risi plotësisht verore, aplikoni gurët ose ndonjë tatuazh të vogël që ka efekt të madh. Në rastin e tatuazhit kini parasysh të aplikoni vetëm një shtresë transparente të ndjekur nga një manikyr natyral i kuq ose bezhë. Pasi t’i keni vendosur tatuazhet, lërini të thahen për pak dhe kaloni një tjetër manikyr të shkëlqyer dhe të tejdukshëm.

Në rast se pëlqeni gurët e çmuar artificialë, mund të zgjidhni nuancat e forta si e kuqja, vishnja, deri te e zeza. Një gur i vogël do t’u japë shumë dritë duarve tuaja.

Këmbë për t’u admiruar

Jetohet shpesh me bindjen e gabuar se për të pasur këmbë për t’u ekspozuar pa siklet duhet një pedikyr i veçantë i bërë vetëm nga njerëz kompetentë.

Në të vërtetë ndërhyrja e pedologut jo gjithmonë është e nevojshme, por bëhet e pashmangshme kur ka kallo, thonj të futur në mish... Për një pedikyr “normal” mund të shkohet te estetisti, ose në rast e të pëlqen bëj çdo gjë vetë në shtëpi. Përgatit ujin duke shkrirë kripëra ose shtuar esenca vajore të mentes. Pastaj fusni këmbët dhe qetësohuni, se pedikyri është dhe një çast relaksi. Pasi kalon koha e nevojshme që duhet për të zbutur lëkurën dhe thonjtë, thajini me një peshqir dhe limoni kallot. Kur këmbët të jenë të lëmuara dhe të buta, aplikoni një shtresë të bollshme kremi dhe limojmë thonjtë. Mos ndërhyni shumë në kënde, duke respektuar formën natyrale, që është pak katrore. Shtyni të dalat me një shkop prej druri portokalli dhe ja ku u bë. Nuk ju mbetet veçse të kaloni një manikyr me ngjyrën që ju pëlqen dhe të vishni sandalet më elegante që keni në dollap.

Për një mbrëmje të veçantë mund të shtoni edhe në thonjtë e këmbëve gurë ose tatuazhe, duke ndjekur të njëjtat udhëzime të dhëna për duart. Në rast se dëshironi, shtoni edhe një unazë ose dekorim dhe do keni atë element etnik, që është kaq shumë në modë.