Bie tavani i klasës, plagosen dy nxënës

[Altin111]

• Zhurma e suvasë që po rrëzohej ka shpëtuar nga tragjedia 29 nxënësit e klasës së tetë të shkollës “Teli Ndini” në Vlorë.

Një bllok i madh është shkëputur nga tavani, duke plagosur dy djem, ndërsa të tjerët u mbështetën pas murit për të mos u rrezikuar. Ervin Kapaj ka përfunduar në spital me plagë në kokë, por pas marrjes së mjekimit është pa rrezik për jetën.
Ankth e tmerr i cilësojnë ata momentet e para, pasi kishte nisur ora e katërt e mësimit dhe vetëm fati ka bërë që ata të jenë gjallë. Ata tregojnë se rreth 15 minuta pasi hynë në klasën e tyre, në katin e tretë të shkollës, ka ndodhur ngjarja e rëndë. Në ato çaste ka qenë qetësi, pasi nxënësit po kryenin disa detyra të lëna nga një mësuese e klasës tjetër, pasi mësuesja e tyre nuk kishte ardhur atë ditë. “Ishte fat që po rrinim në qetësi, pasi nëse do të ishte zhurmë në klasë nuk do arrinim të dëgjonim krismën që u dha para se suvaja të binte mbi ne”, tregon një nxënës. Copat e mëdha të rëna mbi banka e tregojnë mirë atë që ka ndodhur në klasën e 8 C. “Nxënësja që ishte ulur në bankën e parë hodhi sytë në tavan pasi dëgjoi plasaritjet e para. Menjëherë ajo e kuptoi se po ndodhte diçka e rëndë dhe thirri: Kujdes se ra tavani! Të gjithë pamë nga tavani dhe të tmerruar e duke ulëritur u larguam nga zona ku tavani po binte në formë blloku. U mbështetëm në mur, sepse nuk kishim kohë të dilnim jashtë”, rrëfejnë disa prej nxënësve. Sipas tij, një shok u lëndua nga copat e suvasë, ndërsa dhe disa banka u dëmtuan nga fuqia e tyre. “Nëse nuk do të kishim dëgjuar zhurmën përpara tavani do të zinte nën vete rreth 15 vetë që ndodheshin të ulur në banka”. Suvaja ka pasur trashësi nga 3 cm deri në 12 cm si dhe një peshë të madhe, duke parë dhe dëmet e shkaktuara te 3 banka dërrase. Lajmi është shpërndarë shumë shpejt, duke bërë që në shkollë të mbërrijnë brenda pak minutash prindërit e fëmijëve, pasi askush nuk kishte dijeni se çfarë kishte ndodhur brenda ambienteve të saj. Drejtoria e shkollës njoftoi Drejtorinë Arsimore të rrethit, të cilët kanë verifikuar situatën bashkë me forca të policisë. Ekspertët e arsimores nxorën konkluzion se suvaja e tavanit është rrëzuar në një sipërfaqe prej 6 metër katrorë. Sipas tyre, shkolla është ndërtuar në vitin 1960 dhe 6 vite më parë ajo është rikonstruktuar në masën prej 80% nga një firmë ndërtimi me financim të Ministrisë së Jashtme spanjolle. Përfaqësues të firmës kanë shkuar dje në shkollë, duke deklaruar se në këtë klasë kanë kryer punime vetëm për muret dhe pllakat, ndërsa tavani nuk është rikonstruktuar. Nga ana e tyre, ekspertë të Drejtorisë Arsimore pohuan se në rrëzimin e tavanit mund të kenë ndikuar dhe luhatjet e tërmetit të fundit. Klasa është mbyllur dje nga drejtoria e shkollës për të pritur ekspertët deri në përcaktimin e shkakut të rënies dhe nisjen e rikonstruksionit. Nxënësit e klasës së dëmtuar u shprehën dje se për një kohë të gjatë nuk do të jenë të përqendruar në mësim, pasi në mendje kanë vetëm thirrjet për ndihmë.