“Top Channel”, licence kombetare

[Altin111]

E Marte, 22 Janar 2008

“Top Channel” merr licencen per transmetim kombetar nga Keshilli Kombetar i Radios dhe Televizionit. Ne gare per te marre licencen e katert per transmetim kombetar ishin televizionet “Vizion Plus” dhe “Top Channel”, por fitues doli ky i fundit. Pas perfundimit te mbledhjes, kryetarja e KKRT-se, Mesila Doda, u shpreh per mediat se “ky televizion, si operatori i ri kombetar, doli pas nje votimi kolegjial me 7 vota pro te anetareve te keshillit; doli pas nje gare, e cila ishte shume e forte midis dy operatoreve”. Sipas saj, kishte nje gare shume te forte, diferencat ndermjet dy operatoreve nuk jane te medha.

[kuklla]

ca do te thote kjo o altin

[ReniX]

ca do te thote kjo o altin

ja se cthuet ne gazeten shqip.
me pak fjale ne gjuhen e popullit merr ca lek nga shteti, e njef shteti si televizion. Kush ka nje shpjegim me te zgjeruar te urdheroje...

I jepet licenca kombëtare televizionit më të ndjekur

Televizioni "Top Channel" fitoi dje de jure atë që de fakto e kish fituar vetëm disa muaj pas hapjes, duke dhënë shenjat e para të një operatori që do ishte në stadet më të larta, si në treguesit teknologjikë, ashtu dhe në ata artistikë e gazetareskë. "Top Channel" dje u shpall me vendim të Këshillit Kombëtar të Radiove dhe Televizioneve si televizion kombëtar, duke iu dhënë licenca që e zyrtarizon me këtë status. Por askush nuk ka dyshimin që ky hap ishte konfirmim i një realiteti disavjeçar, ku "Top Channel" rezultonte sipas të gjitha sondazheve si televizioni me shikueshmëri më të madhe jo vetëm në Shqipëri, por në të gjithë hapësirën shqiptare të rajonit dhe më gjerë kudo nëpër botë, ku jetojnë e punojnë shqiptarë, të cilët falë teknologjive të avancuara, kanë mundësi të shohin kanale shqiptare. "Top Channel" është vetë promotorja e këtyre teknologjive, duke bërë të mundur mbajtjen gjallë të gjuhës amtare, por dhe të aktualitetit të Shqipërisë zyrtare te mijëra emigrantët e shpërndarë në botë. Sipas njoftimit për shtyp të KKRT-së, kryetarja e këtij institucioni, znj.Mesila Doda, u shpreh për mediat: "Dua t‘ju komunikoj vendimin më të fundit të Këshillit Kombëtar të Radios dhe Televizionit, që ka të bëjë me shpalljen e operatorit të ri kombëtar, i cili është ‘Top Channel‘. ‘Top Channel‘, si operatori i ri kombëtar, doli pas një votimi kolegjial me 7 vota pro të anëtarëve të këshillit; doli pas një gare, e cila ishte shumë e fortë midis dy operatorëve: ‘Top Channel‘ dhe ‘Vizion Plus‘. Diferencat ndërmjet dy operatorëve nuk janë të mëdha; janë të natyrës së dokumenteve, ku njëri operator kishte mangësi dokumentesh, tjetri kishte shmangie nga kriteret e KKRT-së e megjithatë dua t‘jua përsëris se ishte një garë e fortë!", u shpreh kështu kryetarja Doda, duke komentuar vendimin për dhënien e licencës televizionit "Top Channel". Më tej ajo shtoi: "Dua të them se ky është vetëm një hap i parë në liberalizimin e tregut mediatik. I takoi ‘Top Channel‘-it, që është një operator i fuqishëm, një operator shumë serioz, që të marrë këtë licencë kombëtare dhe t‘u afrojë shërbimet e tij qytetarëve të Shqipërisë".



Historia e një televizioni që revolucionarizoi kulturën e imazhit me fjalën e fundit të teknologjisë audiovizive, me programacionin e pasur, produksionet cilësore, si dhe me lajmet më profesionale në gjetje, investigim, formulim dhe lançim


"Top Channel", Shqipëria në një realitet evropian

(ose një histori prestigji)


Gjashtë vjet më parë, në ekranet e televizioneve tona u shfaq një sigël e stërmadhe, ku shkruhej "Top Channel". Ishte paralajmërim i një televizioni të ri që po lindte dhe që do të pasonte radion më moderne shqiptare, "Top Albania Radio". Kurioziteti ishte i disafishtë dhe kryesorja ishte që a do mundej dot ky televizion i ri të kishte në audiencën shqiptare po atë tërheqje që pati "Top Albania". Në sigël ishte shfaqur shenja e parë: një sinjal i kulluar, me një pastërti vizive, pa asnjë shenjë të porozitetit që shfaqnin në figurë televizionet e tjera. Ishte qershori i vitit 2001. Pas disa muajsh, "Top Channel" shpërfaqet i plotë te shikuesi, fillimisht me një edicion lajmesh model e më pas me filma dhe produksione që pak e nga pak do krijonin një imazh të pakonkurrueshëm tek audienca shqiptare. Kishte lindur "Top Channel". Historia mediatike shqiptare po merrte një tjetër rrjedhë. Kjo ndodhi në mesnatën e 19 dhjetorit 2001. Fytyra e re e ekranit shqiptar nisi të imponohet, duke sfiduar në radhë të parë realitetin e vjetruar, primitiv dhe të varfër mediatik. Teknologjia e avancuar do të ishin shinat ku do ecte "Top Channel". Shekulli i teknologjisë mediatike nisi pikërisht aty, me një mënyrë të re të të konceptuarit të televizionit, që u ofronte shqiptarëve një imazh të ri cilësor të paparë deri atëherë.

Nga pikëpamja e kulturës mediatike, "Top Channel" qëndroi larg pazareve politike, duke preferuar të bëjë një koalicion të fortë vetëm me shqiptarët, për ta bërë ekranin mbrojtës të interesave të tyre. Mënyra e trajtimit të lajmit, forca investiguese e gazetarëve; pasioni dhe këmbëngulja e tyre në formën e një përgjegjshmërie profesionale, bëri që në pak javë lajmet e "Top Channel", që ishin dhe kolona e parë vertebrore e televizionit, të ishin më të shikueshmet në të gjithë hapësirën shqiptare. Paralelisht, stafi teknik i televizionit shtriu sinjalin në të gjithë territorin e vendit, si pasojë e kërkesës gjithnjë e në rritje të audiencës për ta ndjekur "Top Channel", lajmet dhe programet e tij. Statusin e një televizioni kombëtar ky televizion i ri e fitoi në pak kohë, duke u bërë një pjesë e rëndësishme e historisë së Shqipërisë së re, asaj të dalë nga errësira komuniste, me ëndrrën për t`u bërë evropiane. Dhe një hap i rëndësishëm ishte hedhur drejt Evropës. Ishte "Top Channel", që paçka se një iniciativë private, u bë pronë e të gjithëve, duke qenë brenda dëshirës së të gjithëve. Teknologjia moderne që "Top Channel" solli në tregun mediatik shqiptar, nuk ishte një risi vetëm për formën se si paraqitej lajmi, programacioni apo publiciteti. Kjo teknologji u vu në shërbim të përmbajtjes së televizionit të ri, që shumë shpejt u përzgjodh nga shqiptarët si ekrani i tyre më i preferuar dhe më i dashur. Jo rastësisht kjo teknologji u vu në shërbim të zgjidhjes së problemeve të qytetarëve, të cilët përballeshin çdo ditë me korrupsionin. Emisioni "Fiks Fare" ishte shembulli i parë i kësaj fryme, siç dhe vijon të jetë. Ndërsa në edicionet e lajmeve, "Top Channel" ishte kudo pararojë e lajmit, duke shënuar rekorde si: tragjedia e 9 janarit me një komunikim direkt me klandestinët që më pas u viktimizuan; me pamje origjinale të tragjedisë në minierën e Selenicës; si dhe me praninë e një gazetari në një avion të rrëmbyer të linjës Tiranë-Stamboll, që transmetoi për disa orë direk situatën në avion. Këto kulme do të bënin që "Top Channel" të ishte burim dhe referencë për mediat më prestigjioze botërore.

Kaluan tre vjet dhe më 5 korrik të vitit 2004, "Top Channel" do të bënte një tjetër revolucion: aplikon transmetimin numerik, me anë të paketës "Digitalb", një teknologji e rrallë për kohën. Dhe falë kësaj pakete, "Digitalb"-it, "Top Channel" përhapi sinjalin jo vetëm në Shqipëri, por edhe Kosovë, Maqedoni e gjithë Evropën, deri në Shtetet e Bashkuara. Riti i avancave të gjuhës teknologjike me fjalën e fundit vijon së fundmi me aplikimin për herë të parë të shërbimit DVB - H, televizor në celular e me aplikimin e sistemit HD, të rrallë sot në botë. Që dje, "Top Channel" është televizion me licencë kombëtare. Ndonëse meriton përshëndetjen si vendim, ai mbetet gjithsesi i vonuar në raport me potencën e këtij televizioni. Ndaj, themi se licenca kombëtare i ishte dhënë prej kohësh. Sepse "Top Channel" është logo, emblemë dhe vizioni i së ardhmes së Shqipërisë dhe shqiptarëve.

nga gazeta shqip

[ingal]

Shyqyr mo