Egjiptiani që kuron sëmundjet e gjakut me shushunja

[kuklla]

• Dhimiter Rera

BERAT -Ka shëruar qindra pacientë nga rrethe të ndryshme të vendit tonë, madje dhe nga Kosova, Maqedonia dhe Greqia. Shumë emigrantë që vuajnë nga sëmundja e reumatizmës, tromboza dhe infektimi i gjëndrave të trupit, i janë drejtuar për ndihmë mjekut popullor, Ramazan Hysi nga qyteti i Beratit. Trupvogël, por i bindur tek mjekimi që e ka zanafillën e tij nga antikiteti, 64-vjeçari vazhdon të kurojë një sërë sëmundjesh nëpërmjet përdorimit natyral të shushunjave. Përveçse ndihmës që u jep pacientëve të tij, Hysi, i cili i përket komunitetit egjiptian në Berat, siguron dhe të ardhurat për familjen e tij. Me këtë profesion që e ushtron prej vitesh, mjeku popullor ka mundur të rrisë 10 fëmijët e tij. Për çdo ditë, ai del në qendër të qytetit duke shitur speciet kuruese, të cilat pasi i ka kapur në kënetë, i ka trajtuar me ujë të ëmbël dhe sheqer në shtëpinë e tij. Ramazan Hysi pret me orë të tëra blerës, por dhe pacientë që i drejtohen për ndihmë. Mjeku i njohur, dje është shprehur për "Gazeta Shqiptare", se tashmë është e vështirë të gjesh shushunja. Kjo për shkak të tharjes së kënetave, përdorimit të pesticideve të ndryshme në bujqësi, por edhe të ndotjes së ujërave. Sipas tij, zhdukja e këtyre specieve që janë të domosdoshme për kurimin e disa sëmundjeve të gjakut, do të jetë një fatalitet si për ekosistemin ashtu dhe për njerëzit.
SHUSHUNJAT
Enzimat e shumta që përmbajnë shushunjat (Hirudo medicinalis në gjuhën mjekësore) ndihmojnë në shërimin e shumë sëmundjeve që kanë lidhje me gjakun. Mjeku popullor, Ramazan Hysi tregon se nëpërmjet këtyre specieve kurohen sëmundje të ndryshme si: trombozat, reumatizmat, dhimbjet e pjesshme të trupit, suadhet dhe gjëndrat e ndryshme në trup që papritur infektohen apo shfaqen tek njerëzit. "Pacientët kanë qenë me probleme të ndryshme, çka ka bërë që unë si kurues, nëpërmjet shushunjës të përballem me sëmundje apo probleme ku mjekësia shkencore nuk ka mundur të japë rezultat", - thotë 64-vjeçari. Ndërkaq, ai tregon një ndër rastet kur i ka shpëtuar jetën një pacienti. "Para disa kohësh, më erdhi një pacient që kishte këputur gishtin e madh të këmbës. Ai kishte shkuar tek kirurgu dhe e kishte ngjitur, por pas ndërhyrjes, gishti nuk po funksiononte normalisht dhe kishte rrezik që të kalbej si pasojë e mosqarkullimit normal të gjakut. Unë përdora shushunjat, të cilat bënë që gjaku i bllokuar të qarkullonte", - pohon Hysi. Ndërsa sqaron se për mjekime të tilla ka shkuar dhe në Kosovë e Maqedoni dhe së fundmi në Greqi.
MJEKU POPULLOR
Kur shkon për të mjekuar pacientët, vishet me bluzën e bardhë të mjekut. Pastron me ujë të oksigjenuar pjesën e trupit që do të mjekohet, dhe më pas vë në "punë" shushunjat për thithjen e gjakut të papastër. Sipas mjekut popullor, Ramazan Hysi, në një vend prej 6 centimetrash vendos tri-katër shushunja. Specia menjëherë nis të kafshojë dhe injekton një lëng "Hirudina", i cili sipas studimeve shkencore, fillimisht bën hollimin e gjakut dhe më pas kalimin nga vendi i infektuar, në trupin e species. Duke mos lejuar grumbullimin e gjakut të infektuar tek plaga apo pjesa e sëmurë, shushunja luan rolin e një pompe thithëse. Sipas Hysit, thithja vazhdon derisa shushunja të shkëputet vetë prej plagës. Kjo gjë përsëritet disa herë (sipas infeksionit), por në ditë të ndryshme. 64-vjeçari shpjegon se shushunjat ngordhin pas çdo mjekimi, si pasojë e infeksionit që marrin nga plaga të cilën kurojnë. Ai merr 300 lekë për një shushunjë, me të cilat siguron të ardhurat për familjen e tij të madhe.

[kuklla]

Udhëton për rreth 50 kilometra për të shkuar në kënetën e Thanës. Në këtë kënetë, Ramazan Hysi siguron shushunjat që përdor për shërimin e pacientëve të shumtë, të cilët tashmë i përkasin një hapësire të madhe gjeografike. Ai thotë se sezoni i shushunjave nis në muajin shkurt dhe përfundon në gusht. Sipas Hysit, kjo është dhe periudha kur ato përdoren për mjekimin e sëmundjeve të ndryshme. I veshur me çizme gjahu dhe dorashka, ai hyn në ujërat e kënetës dhe pasi i turbullon, pret që shushunjat të dalin në sipërfaqe, duke i kapur një e nga një ato që i nevojiten. "Mundohem t'i kap shushunjat pa i lënduar dhe menjëherë i fus ato në një enë me ujë të pastër, të marrë po në kënetë. Nuk lakmoj të kap sa më shumë, por aq sa më duhen për pacientët", - tregon 64-vjeçari. Ndërsa sqaron se, sapo mbërrin në shtëpi, i trajton speciet çudibërëse me ujë të pastër, pa përqindje klori. Për rreth një javë u ndërron ujin, ku hedh dhe një sasi sheqeri, me qëllim që shushunjat të përshtaten me ambientin e ri. Pas këtij trajtimi, këto specie janë të gatshme për t'u përdorur tek pacientët për mjekim.

[daku323]

Qe shushunjat thithin helmet nga gjaku dhe bejne mire per shume semundje te kesaj natyre e dine te gjithe!

Mendoj se zgjuarsia e ketij tipit eshte ne faktin qe ka bindur te tjeret qe vetem ky eshte i zoti i kesaj pune!

Mendoj qe ta provoj dhe une! Nese do jete me leverdi, do hap nje klinike madheshtore me ermrin Daku323 & CO !!!!!

Tek "CO" hyn dhe ti kuklla! Mendoj se do bejme pare te modhe me shushunjat!