Avioni fantazmë alarmon NATO-n dhe Shqipërinë

[kuklla]

05/03/2008 - 11:08
• Gerti Xhaja

Një mjet fluturues fantazmë alarmon NATO-n dhe autoritetet shqiptare. Sinjalizimi i ardhur në të gdhirë të ditës së djeshme Ministrisë së Mbrojtjes nga qendra e llakacionit të NATO-s, në Itali njoftonte për humbjen nga radarët në kufirin verior të Shqipërisë. Grupe shpëtimi dhe vëzhgimi janë ngritur me helikopterë të Ministrisë së Mbrojtjes dhe Ministrisë së Brendshme nga Tirana, por kthimi i tyre i ka çuditur të gjithë. Helikopterët kanë kërkuar në çdo cep të Alpeve të Shqipërisë, por nuk është gjetur asnjë gjurmë avioni apo helikopteri të rrëzuar. Zëvendësdrejtori i Përgjithshëm i Policisë, Rasim Borishi, i cili ishte vetë me grupet e kërkimit në helikopterin e MB-së; shefi i Shtabit të Përgjithshëm të Forcave të Armatosura, gjeneral-major Luan Hoxha dhe shefi i Emergjencave Civile Alfred Olli, e quajtën sinjalizim të rremë rrëzimin e mjetit fluturues. Kthimi duarbosh i skuadrave të kërkim-shpëtimit e ka shtuar misterin.
Mjeti fluturues kishte shmangur radarët, duke mbërritur në kufirin verior shqiptar dhe siç duket, kishte shmangur sërish radarët duke u zhdukur pa lënë asnjë nam dhe nishan. Forcat e KFOR-it në Kosovë, mohuan të kenë humbur ndonjë avion apo helikopter, kështu edhe forcat e NATO-s, Forcat e Armatosura të Shqipërisë apo ato të Malit të Zi. Në asnjë moment apo deklaratë, autoritetet shqiptare nuk kanë folur për mundësinë e një avioni spiun, që mund të vëzhgonte zhvillimet në kufirin shqiptar me Kosovën dhe Malin e Zi. Situata në Ballkan në dukje e qetë, është “nxehur” së tepërmi pas shpalljes së pavarësisë. Banorët e zonës kanë kontaktuar drejtpërsëdrejti me televizionin NEWS 24, i cili ndiqte minutë pas minute zhvillimet. Sipas tyre, është dëgjuar një shpërthim që vinte nga maja e Jezercës, në lartësinë mbi 2600 metra, e cila është pika e dytë më e lartë në Shqipëri, pas malit të Korabit. Burime të rezervuara të Komisariatit të Policisë së Tropojës, thanë për Gazetën se nga shpjegimet e banorëve, zhurma që ata e konsideronin shpërthim, rezulton mjaft e përafërt me zhurmat supersonik të avionëve kur kalojnë shpejtësinë e zërit. Gjithsesi, burimet zyrtare të informacionit kanë shmangur mundësinë e një avioni spiun, duke e konsideruar ngjarjen si një gabim në transmetimin e informacioneve, menaxhimin dhe përpunimin e tyre. Një gabim në dukje elementar, por që sipas këtyre burimeve, ngriti në këmbë të gjithë shtetin shqiptar dhe NATO-n, për mjetin fluturues misterioz.
Ndryshe nga të gjitha rastet e lëshimit të sinjaleve SOS, apo edhe në rastet e humbjes së mjeteve fluturuese nga radarët, në njoftimet apo informacionet përcjellëse ka një vend nisjeje, trajektoren e ndjekur dhe vendin e dyshuar ku mund të ketë humbur apo është rrëzuar. Në asnjë nga informacionet e servirura nuk rezulton vendi i nisjes së mjetit fluturues, që nga lokalizimet e radarëve të NATO-s rezulton të jetë avion i vogël, apo helikopter. Kontrollet nga ajri dhe krehja e zonës nuk konstatuan asnjë gjurmë përplasjeje, shpërthimi, apo mjeti fluturues.
Ngatërresa
Në orët e mbrëmjes, burime të pakonfirmuara pranë Ministrisë së Mbrojtjes, “fajësonin” përkthimin e keq të mesazhit të ardhur nga forcat e NATO-s, si shkak për të gjithë situatën e krijuar. Sipas të njëjtit burim, ka qenë një stërvitje e forcave të NATO-s, ku në kuadrin e ushtrimeve është lëshuar edhe mesazhi SOS, i cili është marrë seriozisht nga autoritetet e Forcave të Armatosura. Por, në deklaratat e KFOR-it dhe autoriteteve shqiptare, nuk bëhet e ditur zyrtarisht mundësia e një manovre të tillë.

[kuklla]

Me qindra forca të Policisë së Shtetit, Forcave të Armatosura, Ministrisë së Shëndetësisë dhe Pushtetit Lokal, u angazhuan në operacionet e kërkim-shpëtimit pas alarmit për aksidentin e një mjeti ajror në Alpet e Shqipërisë. Televizioni NEWS 24 transmetoi minutë pas minute zhvillimet dhe të rejat që vinin nga terreni. Alarmi në Shqipëri është dhënë nga Ministria e Mbrojtjes, e cila i ka kërkuar Kullës së Aviacionit në Rinas, nëse kishte informacione për ndonjë mjet fluturues që mund të kishte hyrë në Veriun e vendit, në orën 4:10-4:30 minuta, apo nëse kishte interceptuar ndonjë mesazh SOS. Ndonëse nuk ka pasur asnjë përgjigje pozitive nga kulla, informacioni që sipas burimeve pranë Ministrisë së Mbrojtjes, vinte nga qendra e radarëve të NATO-s, në Itali dhe kësisoj nuk është “diskutuar” vërtetësia e tij. Dy helikopterë të Ministrisë së Mbrojtjes, DO 105, janë ngritur në fluturim nga reparti i ushtrisë në Farkë të Tiranës, dhe janë drejtuar për në vendin ku mendohej të ishte rrëzuar mjeti fluturues. Sipas njërit prej pjesëtarëve të ekipit të kërkim-shpëtimit, sapo u janë afruar Alpeve, helikopterët janë ndeshur me mot të keq e me mjegull, duke rrezikuar madje edhe të rrëzoheshin. Në këto kushte, dy helikopterët e ushtrisë janë tërhequr dhe janë ulur në Theth, në pritje të një përmirësimi të motit. Ndërkohë, Ministria e Brendshme ka nisur një prej helikopterëve me të cilin lëvizin forcat RENEA. Helikopteri i RENEA-s ka ndjekur një rrugë tjetër, duke kaluar nëpërmjet Shkodrës, Dukagjinit, në Luginën e Shalës dhe duke iu afruar majës së Jezercës. Helikopteri i Ministrisë së Brendshme, duke përfituar edhe nga pilotët që e kishin për të disatën herë që kryenin këtë trajektore, ka mundur të kryejë krehjen e të gjithë zonës. Vrojtimi në mjaft vende rezultonte i vështirë, pasi në lartësinë mbi 1900 metra kishte mjegull. Helikopteri është futur në fshatin Valbonë, ku edhe është ulur. Personat që ndodheshin në bord kanë kontaktuar me banorët e fshatit. Këta të fundit kanë konfirmuar se në të gdhirë kishin dëgjuar një shpërthim, duke treguar në drejtim të vendit nga ishte dëgjuar zhurma shpërthyese, ku sipas tyre, në dëborë shquanin një “njollë” të zezë. Ekuipazhi i helikopterit të RENEA-s ka marrë në bord dy prej banorëve, për ta pasur më të lehtë për të arritur në vendin ku dyshohej se kishte rënë mjeti fluturues. Në fakt, pasi kanë kaluar në krahun tjetër të majës së Jezercës, vëzhguesit kanë konstatuar pikën e zezë mbi shpatin e mbuluar me dëborë të malit. Burime pranë ekipit të shpëtimit thanë se prej pamjes që ofrohej nga helikopteri, njolla e zezë ngjante si një rrëshqitje shkëmbi. Helikopteri nuk ka mundur t’i afrohej, pasi kishte rryma të forta ajri dhe rreziku ishte shumë i madh. Helikopteri është kthyer sërish në Valbonë, ku janë lënë dy banorët. Ndërkaq edhe dy helikopterët e Forcave të Armatosura janë ringritur nga Thethi dhe i janë bashkuar helikopterit të RENEA-s, duke patrulluar së bashku. Kanë zgjatur 3 orë kërkimet, derisa janë ndërprerë për shkak të përkeqësimit të kushteve të motit dhe shtimit të mjegullës e afrimit të muzgut. Helikopterët janë kthyer në Tiranë, pasi kishin kryer krehjen e zonave të Malit të Hekurave, Rrethit të Bardhë, tek Maja e Gjarprit, Gjarpri i Çeremit, kufirin me Malin e Zi, në fshatrat Çerem; është kontrolluar pjesa e fshatrave Rragam, Theth, Valbonë, masivi malor mbi Çereç Mulaj etj.
Helikopterët
e KFOR-it
Banorë të zonave malore ku janë kryer kërkimet, janë shprehur për Gazetën, se para mbërritjes së helikopterëve shqiptarë, kanë konstatuar edhe helikopterë të tjerë, që sipas tyre mund të ishin të KFOR-it. Ndërsa burimet pranë ekipeve të kërkim-shpëtimit të Ministrisë së Mbrojtjes dhe ato të Ministrisë së Brendshme, konfirmonin se nuk kishin parë helikopterë të tjerë patrullues, gjatë kohës që kanë qenë në fluturim mbi Alpe dhe malësitë e Tropojës.

[ReniX]

Shpresojme te kaloj vertet mire kjo situat, sepse sic eshte cituar dhe me larte, gjendja ne ate zone eshte shume e nxehte pas shpalljes se pavarsis.

Cfare smund te kete qene ajo zhurme..

[atit]

pas gjith asaj rremuje diq eshte duke u mshefur nga opinioni.
mos ndoshta kemi pasur vizitor nga ndonje vend tjeter ,dhe per ket arsye mbahet ne fshehtesi.
vizit te ndonje pjate fluturuese.
ne te kaluaren kan ndodhur raste te tilla ,dhe jan mbajtur ne fshehtesi.
shpresoj qe e gjitha te jet nje shaka e 1 prillit