100 vjet INTER

**kuklla** · 10-03-2008, 09:40 AM

• Altin Latifi

Interi është rikthyer dhe e ka festuar me një fitore 100 vjetorin e krijimit, duke mposhtur 2-0 në “San Siro” Rexhinën. Pavarësisht se nuk ishte një skuadër e frikshme, ajo e djeshmja e hedhur në fushë nga Mançini tregoi shenja të mira edhe pse shpëtoi disa herë nga portieri Hulio Cesar. Zlatan Ibrahimoviç gjeti golin që në minutën e 14-të, pas një penallti të dyshimtë të akorduar nga arbitri. Në fakt, pengimi u duk jashtë zonës, por kjo nuk i ndaloi zikaltërit të festonin avantazhin. Rexhina pati katër raste të mira, por Hulio Cesar u tregua u pakalueshëm. Nikolas Burdizo realizoi edhe golin e dytë në minutën e 35-të, me një goditje tepër të saktë me kokë.
Dhurata e Milanit
Dita e djeshme ka qenë një festë e vërtetë në kampin zikaltër. Gjithçka nisi me një dhuratë që Milani u bëri “kushërinjve” me rastin e 100 vjetorit dhe që u dha fund polemikave të nisura dy ditë më parë, kur Morati e quajti Interin klubin më të ndershëm të Italisë dhe përfaqësuesin e denjë të qytetit. Galiani reagoi ashpër dhe dje klubi i Interit kërkoi falje me anë të një komunikate për shtyp. Zikaltërve u është dhuruar një pjatë me mbishkrimin “Bashkë për historinë, bashkë për qytetin”, me firmën e presidentit Berluskoni. “Incidenti tashmë është i mbyllur”, deklaroi administratori Adriano Galiani.
Festa
Natyrisht që çdokujt do t’i tërhiqte vëmendjen atmosfera e festës që ishte krijuar në “San Siro” përpara fillimit të këtij takimi. Stadiumi ka qenë tërësisht zikaltër, me dy pankarta gjigande që ishin vendosur në kthesën veriore, aty ku qëndrojnë ultrasët. Njëra prej tyre simbolizonte flamurin italian, ndërsa tjetra e bardhë me një kryq në mes, si fanela e re e Interit. Përpara ndeshjes, 825 fëmijë kanë sfiluar në fushë, duke përfaqësuar kështu të gjithë futbollistët që kanë luajtur me Interin që prej vitit 1908, yjet e djeshëm dhe të sotëm. Festa ka qenë një emocion i vërtetë dhe natyrisht që dekori i tifozëve e pati zbukuruar më shumë. Përpara takimit të djeshëm ndaj Rexhinës, lojtarët patën bërë thirrje për triumf ndaj Liverpulit të martën, që do të ishte edhe dhurata më e bukur për presidentin Morati dhe tifozët.