Veshja e duhur per cdo rast.

[kuklla]

Gjithnjë e më shumë njerëzit po bëhen të ndërgjegjshëm që një imazh i kuruar mirë, transmeton tek të tjerët sukses dhe siguri. Jetojmë në një kohë ku industria e modës fiton shuma marramendëse në këmbim të një pamjeje, e cila jo pak herë është një armë fituese. Por nuk është e domosdoshme që të kesh miliona për t’u dukur e bukur dhe elegante. Disa rregulla bazë dhe pak fantazi janë elementët e duhur për të qenë gjithnjë e kuruar. Për të pasur një pamje perfekte, çdo njeri duhet të bëjë fillimisht një vlerësim real të vetes. Kjo do të thotë që ju duhet të dini pikat tuaja të forta, të cilat do t’i nxirrni në pah, dhe pikat e dobëta, ato që do të mundoheni t’i “trukoni”. Atelier “Mineka” sugjeron disa variante veshjesh për të përditshmen tuaj apo raste të veçanta. Por edhe disa këshilla të vlefshme, për t’u dukur gjithnjë shik dhe elegante, pa u zhveshur apo shpenzuar shumë. Kur nisni të blini veshjet për një sezon, duhet të bëni një listë me gjërat kryesore të stinës.
Në pranverë, veshjet që nuk duhet të mungojnë janë kostumet, këmishët dhe fundet. Kostumi është ai që do t’ju japë një pamje të sigurt dhe elegante në çfarëdo rasti. Është rikthyer në modë pamja retro, ndaj dhe kostumi që propozon atelier “Mineka” ka elementë vintage të ndërthurur me prerje moderne. Xhaketa me pala në supe dhe prerje në mes, është ajo që po preferohet më shumë. Ky model vë belin më shumë në dukje dhe krijon një siluetë perfekte. Ndërsa në ditët më të ngrohta, mund të kombinoni këmisha mëndafshi apo shifoni, me funde treçerekshe. Nuk ka asgjë më elegante se një material luksoz me një prerje të thjeshtë. Do t’ju bëjë të ndiheni komode, pa hequr dorë nga një pamje shik. Për një element modern, mund të krijoni kontraste me ngjyrat, siç është fundi lejla me këmishën ngjyrë pana, apo këmisha bezhë dhe fundi jeshil.
Keni një festë me kolegët e zyrës dhe nuk dini çfarë të vishni? Gjëja e parë që duhet të keni parasysh është që të mos e ekzagjeroni. Jeni me kolegët tuaj, ndaj edhe pse jeni jashtë ambienteve të zyrës, kërkohet një kod i caktuar. Atelier “Mineka” sugjeron këtë kostum me jelek dhe pantallona. Mund ta vishni paradite në zyrë, me një këmishë poshtë. Nëse hiqni këmishën dhe e vishni me sandalina, bëhet një kostum shumë elegant për një mbrëmje të veçantë. Jeleku, që deri vonë është konsideruar një element më shumë mashkullor, i jep pamjes tuaj shumë sensualitet. Ndërsa pantallonat e drejta ju zgjasin figurën.
Për një mbrëmje të veçantë, gjithnjë lërini vetes disa orë për t’u bërë gati. Veshjen duhet ta keni menduar që më parë, sepse në të kundërt do të bëheni lëmsh duke mos u ndier e sigurt. Për këtë ju sugjerohet ky fustan gurkali, i punuar me gurë Swarovski. Është i thjeshtë dhe shumë elegant. Me gjatësinë e tij poshtë gjurit, është shumë i përshtatshëm për një eveniment ku doni të dukeni moderne. Nëse keni ndonjë kilogram të tepërt, atëherë mund të shtoni edhe peliçen e vogël, që ju mbulon krahët dhe ju formon menjëherë një siluetë më elegante. Kombinojeni me një çantë të vogël dore dhe sandale ngjyrë floriri, dhe ju do të shkëlqeni.
Për një pritje apo festë shumë të zgjedhur, pamja juaj duhet të rrezatojë finesë dhe luks. Kjo nuk do të thotë se duhet të rëndoheni me fustane që ju bëjnë të dukeni si pema e Vitit të Ri. Mjafton një detaj në dukje i vogël, për të bërë diferencën, siç mund të jetë një hapje fine në kurriz apo aksesorë që nxjerrin në pah feminilitetin tuaj. Fustani i zi është ideal në një rast të tillë. Materiali i veçantë e bën shumë aristokratik, ndërsa prerja dhe gjatësia do t’ju tregojnë më të dobët dhe më të gjatë. Peliçeja e zezë që e shoqëron, është një element shumë elegant që plotëson pamjen tuaj.
Po për ditën më të veçantë në jetën e një vajze, atë të dasmës...? Ajo është dita ku sytë e të gjithëve janë të drejtuar tek ju, ndaj dhe duhet pasur shumë kujdes në zgjedhjen e fustanit dhe aksesorëve të tjerë. Pamja juaj duhet të jetë madhështore, por pa rrezikuar që të mbingarkoheni. Propozohet ky fustan mëndafshi i punuar me gurë Swarovski. Duke qenë elegant dhe shumë sensual, ai do t’ju bëjë një nuse me shumë klas. Për një koktej apo darkë me miqtë, mund të mos mbani vellon dhe të zgjidhni një fjongo të kuqe, e cila do ta bëjë pamjen tuaj më moderne.