Gjirokastër, një guidë dixhitale për hapësirën mbarëshqiptar

[ReniX]

Ditët e fundit Zyra e Administrimit dhe Koordinimit të Qytetit Muze të Gjirokastrës ka hedhur në qarkullim një guidë turistike dixhitale për qytetin e gurtë e cila synon të shpërndahet në hapwsirën mbarëshqiptare.

Nëpërmjet informacionit të hedhur në CD grupet e vizitorëve vendas dhe të huaj që mbrijnë në qytetin e gurtë mund të orientohen për të vizituar pikat turistike, apo për ta patur më te thjeshtë të gjejnë baret, restorantet apo hotelet që ofrojnë shërbimin e tyre në zona të ndryshme të qytetit. “Në kuadër të nismës “Nxitja e turizmit Kulturor të Gjirokastrës me Kosovën” , që Zyra jonë ndërmori pak ditë më parë, ka përfunduar hartimi i një guide të Gjirokastrës në CD”, thotë Rajmond Kola, drejtori i Zyrës së Administrimit dhe Koordinimit të Qytetit Muze.

Guida përfshin rreth 130 faqe elektronike me informacione të ndryshme për Gjirokastrën. Në të pasqyrohet harta turistike e qytetit, adresari i saktë i restorantëve, hoteleve si dhe elementë të tjerë të infrastrukturës në shërbim të grupeve të vizitorëve. Ky material është i ilustruar me fotografi. Sipas drejtorit Kola “guida do të shpërndahet në agjensitë turistike në Kosovë si dhe në grupet turistike nga Kosova,Maqedonia dhe Mali i Zi që do të jenë të pranishme në Gjirokastër gjatë këtij sezoni turistik”.
Ndërkohë pritet të përfundojë së shpejti një version i kësaj guide edhe në gjuhët angleze dhe italiane. “I gjithë ky informacion synon të krijojë një paketë të plotë informative për grupet e vizitorëve që mbërijnë në Gjirokastër”, thotë Kola
Ndërkohë Zyra Administrimit dhe Koordinimit të Qytetit Muze të Gjirokastrës krahas shpërndarjes në mënyrë dixhitale të kësaj guide synon gjetjen e partnerëve të interesuar në mënyrë që ky material informativ të pasqyrohet edhe në botimet e ndryshme në shërbim të grupeve turistike.

Blerim Kore gazeta Bisnesi