Dhuna kundër shtypit është e patolerueshme”

[kuklla]

14/03/2008 - 10:26
• Tedi Blushi

Ambasada e Shteteve të Bashkuara të Amerikës në Tiranë, ka reaguar dje ndaj dhunës së ushtruar ndaj gazetarit Besar Likmeta nga deputeti demokristian, Tom Doshi. Ambasadori John Withers, në një konferencë të posaçme për shtyp ka dënuar ashpër aktin, duke deklaruar se në një vend demokratik, dhuna është e patolerueshme. Diplomati amerikan i kërkoi autoriteteve të hetojnë seriozisht akuzat, dhe e quajti tronditëse këtë situatë ku përfshihen deputetë të Kuvendit. “Raporti i Departamentit Amerikan të Shtetit, - tha Withers, - dënon dhunën në një vend demokratik”. Më tej, ai shtoi se ka ndjekur nga afër raportimet rreth sulmit, të cilin ai e quajti një veprim burracak kundër gazetarit Likmeta nga deputeti Doshi dhe në praninë e ligjvënësit socialist, Arben Isaraj. “Këto raportime bëhen akoma dhe më tronditëse, për faktin se ata janë të dy anëtarë të parlamentit. Raporti i të drejtave të njeriut të qeverise amerikane, i publikuar vetëm dy ditë më parë, e bën plotësisht të qartë që dhuna dhe kërcënimet me dhunë kundër shtypit, janë të patolerueshme në një demokraci”, - theksoi gjatë fjalës së tij ambasadori amerikan. Gjithashtu, Withers përshëndeti deklaratën e kryeministrit Sali Berisha, i cili bën thirrje për një hetim të plotë të akuzave. “Për këtë pres të shoh shpejt rezultatet e këtij hetimi”, - deklaron Withers. Ndërkohë, ambasadori amerikan u ka bërë thirrje edhe përfaqësuesve të shoqërisë civile dhe veçanërisht kolegëve të gazetarit Likmeta, që të denoncojnë me guxim dhunime të tilla të lirisë së shprehjes.
Akti i dhunës
Gazetari Besar Likmeta, i cili punon për agjencinë e njohur rajonale, BIRN (Balkan Investigative Reporting Netëork), është rrahur brutalisht në datën 10 mars nga deputeti i PDK-së, Tom Doshi në ambientet e barit të “Hotel Sheraton”, rreth orës 10:45, në prani të klientëve dhe stafit të hotelit. Dëshmitar dhe njëherësh shoqërues i deputetit Doshi, ishte edhe deputeti i Partisë Socialiste, Arben Isaraj, i cili ndonëse nuk ka ushtruar dhunë direkte mbi gazetarin, është përfshirë në debatin paraprak me të, në krah të Doshit. Likmeta, i cili pësoi dëmtime në fytyrë nga dhuna e parlamentarit, ka shkruar në 20 shkurt të këtij viti mbi diplomat false të deputetëve shqiptarë, mes të cilëve ka qenë dhe demokristiani Doshi. Pasi kreu një investigim të pavarur mbi ngjarjen e rëndë, BIRN i ka dërguar Kryeministrit Sali Berisha, përfaqësuesve të huaj në Shqipëri dhe organizatave që mbrojnë të drejtat e njeriut, një letër, ku i njofton mbi ngjarjen dhe kërkon ndërhyrje të menjëhershme të tij. Duke kujtuar se ky nuk është precedenti i parë me karakter fizik i deputetit Doshi, edhe lëvizja “Mjaft” i ka bërë thirrje përfaqësuesve të medias, përfaqësive diplomatike dhe të gjithë aktorëve të shoqërisë civile, që të reagojnë mbi këtë ngjarje tepër të rëndë.

[kuklla]

Lëvizja “Mjaft” dhe disa përfaqësues të medias protestuan dje para Kuvendit të Shqipërisë, kundër dhunës që deputeti i PDK-së Tom Doshi ka ushtruar ndaj gazetarit Besar Likmeta, i agjencisë BIRN, pas një investigimi që ky i fundit kishte bërë në lidhje me diplomën e deputetit të PDK-së. “Brutaliteti i ushtruar këto ditë mbi gazetarin Besar Likmeta dëshmon se eksperiencat e dhunës që politika ushtron mbi median, nuk janë pjesë e historisë së para vitit 2000”, - u shpreh një përfaqësues i “Mjaft”-it, i cili në emër të kësaj lëvizjeje kërkoi nga Kuvendi jo vetëm që të dënojë këtë dhunë, por t’i heqë mandatin deputetit Doshi, nëse vërtetohet se diploma e tij është false. “Tom Doshi nuk duhet të jetë më deputet i këtij vendi, vota e tij nuk mund të përfaqësojë më vullnetin e votuesve shqiptarë”, - shtoi ai.

[kuklla]

Incidenti mes gazetarit Besar Likmeta dhe deputetit Tom Doshi, tashmë do të jetë objekt i punës së Prokurorisë së Përgjithshme. Burime zyrtare pranë kësaj të fundit, kanë deklaruar se në bazë të kallëzimit të depozituar nga gazetari Likmeta, prokuroria ka vendosur nisjen e procedimit penal për akuzën e “goditjes për shkak të detyrës”. Sipas të njëjtave burime, grupi i hetimit pritet të sekuestrojë kasetat e kamerave të sigurisë në hotel “Sheraton”, ku ka ndodhur edhe ngjarja, si dhe marrjen në pyetje të dëshmitarëve okularë. Ndërsa për sa i përket të akuzuarit Tom Doshi, ky i fundit në kushtet që gëzon imunitet si deputet i Kuvendit të Shqipërisë, mund të paraqitet vullnetarisht në prokurori. Ndërkohë që nëse prokurorët vërtetojnë plotësisht akuzën e ngritur, pritet t’i kërkojnë Kuvendit heqjen e imunitetit për deputetin Tom Doshi. ga.ja

[kuklla]

Përdorimi i dhunës ndaj gazetarit Besar Likmeta nga deputeti demokristian Tom Doshi, ka sjellë edhe reagimin e zyrtarëve më të lartë të shtetit. Zyra e Shtypit pranë Kryeministrisë bëri të ditur se shefi i qeverisë, Sali Berisha, duke dënuar këtë akt dhune u ka kërkuar autoriteteve përgjegjëse të ndërmarrin një hetim të thelluar dhe të plotë ndaj tij. “Kryeministri ka mësuar me shqetësim lajmin e përdorimit të dhunës ndaj gazetarit Besar Likmeta nga deputeti Tom Doshi, në prani të deputetit Arben Isaraj. Duke dënuar këtë akt dhune dhe çdo akt tjetër ndaj gazetarëve, Kryeministri i kërkon autoriteteve përgjegjëse të ndërmarrin një hetim të thelluar dhe të plotë ndaj këtij akti të papranueshëm”, citojmë të plotë njoftimin e zyrës së shtypit pranë shefit të ekzekutivit. Në lidhje me këtë akt të shëmtuar dhune reagoi dje mjaft ashpër edhe kryetarja e Kuvendit, Jozefina Topalli. Në deklaratën e saj për shtyp, kryeparlamentarja deklaron se është i papranueshëm çdo akt dhune, kudo dhe kurdo, aq më tepër akti i dhunës ndaj gazetarit. “Po aq e dënueshme dhe e papranueshme sa goditja ndaj gazetarit është edhe soditja në këtë akt të shëmtuar”, - vijon më tej Topalli.





K

[kuklla]

Deputeti Tom Doshi kërkoi ndjesë dje për incidentin me Besart Likmetën. Por Doshi sqaron se veprimi i tij erdhi i nxitur nga provokimet e Likmetës. Në një deklaratë të bërë pas kontaktit që “Gazeta Shqiptare” pati me deputetin Doshi, ai sqaron në një deklaratë publike se “Ditën e hënë, më 10 mars, rreth orës 20:30, kur pas seancës parlamentare po darkoja me deputetët Nard Ndoka, Jak Ndoka, Pashk Ujka, Ymer Tola dhe Paulin Sterkaj, mora një telefonatë ku m’u kërkua një takim në lidhje me një pretendim të këtij personi për problemin e një diplome. E njoftova se isha i zënë për momentin dhe e lamë të flisnim një ditë tjetër”. “Çuditërisht pas diçka më shumë se një orë, rreth orës 22:00 marr në celular një sms (të cilën e disponoj) ku përsëri m’u kërkua takim me ngulm nga po ky person. E telefonova, i çuditur se pse duhej të takoheshim kaq vonë, kur jo më pak se një orë e gjysmë përpara kishim vendosur të takoheshim një ditë tjetër. Gjithsesi duke parë këmbënguljen e zotërisë, vendosëm të takoheshim në “Sheraton” rreth orës 22:30", - thuhet në sqarimin e deputetit Doshi. Ai shprehet më tej se “e sugjerova unë vendtakimin në “Sheraton”, pasi kisha lënë një takim me deputetin Isaraj në këtë orë. Ishim ulur së bashku me zotin Isaraj në kafenenë e “Hotel Sheraton”, kur një person, i cili ishte duke pirë konjak në banakun e lokalit, erdhi në tavolinën tonë pas rreth 15 minutash. Në fakt, - thuhet në deklaratën e deputetit demokristian, - na bëri përshtypje sepse po pinte i vetëm në banak”. “U prezantua dhe e ftuam të ulet në tavolinën tonë. Që në momentin që u ul, fjalia e parë që tha ishte: “Unë jam ai që e kam nxjerrë në internet me emër”. Pyetja që i drejtova i çuditur ishte: “Çfarë kërkoni nga unë, pasi tashmë lajmi është publik dhe nuk kam ndonjë koment mbi të”. M’u përgjigj se “do të vazhdoj ta botoj përsëri, por mund të gjejmë dhe mënyrën se si të mos botohet”, - vazhdoi duke thënë se edhe ai donte të jetonte më mirë dhe të bënte karrierë”, - shprehet ish-deputeti i PS-së, Doshi. “E pyes se çfarë kuptonte me mënyra të tjera dhe m’u përgjigj se kërkonte nga unë 10.000 euro dhe premtoi se me t’ia paguar këtë shumë, nuk do merrej më me këtë problem. Në këto momente, i habitur i kërkova një dokument identifikimi. M’u përgjigj se nuk punonte për ndonjë organ mediash vizive a të shkruar në Shqipëri, por ishte redaktor i një faqeje informative në internet me qendër a në Bosnje a në Beograd, nuk më kujtohet mirë”, - vijon sqarimin e ngjarjes Doshi. “Në moment, - rrëfen ai, - i revoltuar dhe irrituar jashtë mase, i them se mua nuk më ka ndodhur kurrë të më vendosë njeri gjobë. Personi i prezantuar si redaktor, me një qetësi të habitshme më thotë që ‘ti je nga deputetët më të pasur, i ke arritur ato që ke dashur në jetë dhe unë kam pikësynimet e mia në jetë’. I nervozuar ngrihem nga tavolina për t’u larguar dhe ndërkohë, ky person duke nënqeshur më thotë: ‘Atëherë do vazhdoni të lexoni shkrimet e mia pa emër për ty’, - shpjegon deputeti Tom Doshi. “Në moment, - tha ai, - i ngritur siç isha, nuk munda ta kontrolloj veten nga pafytyrësia dhe provokimi i këtij personi dhe në gjaknxehtësi e sipër e godas me çantën e dokumenteve dhe celularit që mbaj me vete. Në lidhje me të gjithë të vërtetën që deklarova më lart, jo vetëm sqaroj opinionin publik, por dua të kërkoj dhe ndjesë për reagimin tim të nxituar të momentit”, - përfundon deklaratën e tij deputeti Tom Doshi, i cili në një intervistë për “Gazeta Shqiptare” kishte deklaruar disa minuta më parë si më poshtë:
Zoti Doshi, a mund të na sqaroni a keni pasur konfrontim me gazetarin Besar Likmeta dhe si ka ndodhur?
Nuk kam pasur asnjë konfrontim. Madje, unë këtë gazetar as nuk e njoh fare. Më habit fakti se si komentohet e gjithë kjo ngjarje.
Atëherë, ju i vlerësoni të kota reagimet gjatë këtyre dy ditëve në lidhje me këtë ngjarje?
Unë jam i habitur nga gjithëçfarë po thuhen. Nuk kam pasur asnjë përplasje me asnjë njeri. Nuk e njoh fare këtë gazetar për të cilin flitet.
Për këtë ngjarje ka reaguar edhe ambasadori amerikan në Shqipëri, i cili e ka dënuar si rast dhune. A keni një koment në lidhje me këtë reagim?
Pse, kush është ambasadori amerikan? Ai duhet të jetë në dijeni, të mësojë më parë a ka ndodhur apo jo dhe pastaj duhet të flasë. Ju lutem, flisni me juristin tim…
(flet juristi)..
Ju lutem, zoti Tom Doshi nuk ka për të bërë asnjë koment. Do të ketë një deklaratë në momentin që ai ta gjykojë të përshtatshme.