Vace Zela ka ditelindjen.

**kuklla** · 07-04-2008, 06:55 PM

Çdo përvejtor i festuar larg Shqipërisë i shton më shumë mallin. Ndërsa kujtesa e kthen në vitet e skenës, aty ku Vaçe Zela u bë emri i paharrueshëm i këngës shqiptare. Sot mbush 69 vjeçe. Një vit e ndan nga përvjetori i 70-të, që si shumë artistë do të donte ta priste mes miqsh e adhuruesish të saj. Këtë ditëlindje do ta kalojë në shtëpinë e saj në Zvicër, ku jeton me bashkëshortin dhe vajzën. Nuk do t’i mungojnë as atje urimet. Ashtu si çdo vit, përmes telefonit do t’i urojnë shërim e jetë të gjatë. Në çdo komunikim, emocioni ia mbyt fjalët. Ndërsa malli e bën që të shprehë fjalë urimi për publikun që ka lënë në Shqipëri. Është e sigurtë se ata do ta kujtojnë përmes këngëve që ka interpretuar në vite. Kjo është më se e vërtetë. Vaçe Zela kujtohet me nostalgji nga ata që e ndiqnin në festivale e e duartrokisnin. Ndërsa për të rinjtë është një idhull i këngës shqiptare. Sprova e talentit të tyre është interpretimi i një kënge të Vaçe Zelës. Dëshira e saj është e madhe, por gjendja shëndetësore e pengon që të kthehet në Shqipëri, e aq më tepër të ishte e pranishme në skenën shqiptare. Ndoshta sa për të përshëndetur të gjithë ata që e kanë ndjekur në rrugën e saj të suksesit. E lindur më 7 prill të vitit 1939, Vaçe Zela, një vajzë nga Lushnja do të bëhej ylli i këngës shqiptare. talenti i saj do të spikaste që e vogël, ku prezantohet në aktivitet e ndryshme që organizoheshin në qytetin e saj. Ndërsa më vonë, skena e festivalit të këngës, ku shënon rreth 30 pjesëmarrje, do ta njohte si këngëtaren më të sukseshme. Çmime të shumta do të vinin nga interpretimi në interpretim. Këngët “Çelu si mimoza”, “Djaloshi dhe shiu”, “E dua vendin tim”, “Ëndrra ime”, “Lemza”, “Nënave shqipëtare”, “O diell i ri”, “Sot mbusha 20 vjet”, “Të lumtur të dua” e shumë të tjera do të mbeten gjatë në kujtesë. Sot ato i dëgjojmë të risjella nga këngëtarë më të rinj shqiptarë. Në këto raste përvjetoresh, të kujtohet natyrshëm dhe vlerësimet që i kanë shkuar këngëtares për kontributin e saj. “Artiste e Merituar” në ’73-in, “Artiste e Popullit” në ‘77-ën, “Mjeshtre e madhe e punës”, “Qytetare nderi e Lushnjes”, po në qytetin e lindjes Kinoteatrit iu vu emri i saj dhe u ngrit një bust, presidenti Moisiu i akordoi “Nderi i Kombit”, u shpall “Qytetare Nderi e Qarkut të Fierit”. Çmime të tjera i vijnë edhe nga jashtë territorit të Shqipërisë. Vaçe Zela ka marrë Diskun e Artë nga Amerika për kontribut në shoqëri në vitin ’97, është zgjedhur gruaja e vitit ’97-98 në Kembrixh të Anglisë, “Mikrofoni i Artë” nga Ministria e Kulturës e Kosovës, “Çmimi i karrierës” e shumë të tjera. Ndërsa Institutit Biografik Amerikan e rreshton në botimin e tij ndër 500 njerëzit më me influencë. Viti 1991 do të shënonte ngjitjen e fundit në skenë për të, pikërisht në Zvicër në një koncert për shqiptarët që jetonin atje.