Tavë peshku me hudhra

**Lirenti** · 21-11-2006, 11:14 PM

Peshku i pastruar dhe i larë pritet në copa, i hidhet kripë, piper. Lyhet me miell dhe skuqet në tigan me yndyrë të nxehtë, por duhet patur kujdes të mos kuqet shumë (sa të marri ngjyrë). Hiqet dhe vihet në një pjatë. Në yndyrën e tepruar në tigan hidhen hudhra të grira trashë shtohet miell i cili kaurdiset pak pastaj salcë domatesh. Të gjitha këto përzihen me njëra tjterën shuhen me uthull pastaj shtohet pak ujë, kripë, piper e gjethe dafine. Masa hidhet në tavë dhe vihen sipër copat e peshkut të skuqura lehtë si me sipër dhe piqet në furrë 15-20 minuta duke i hedhur pastaj majdanoz i grirë holle në procesin e fundit të pjekjes.

**Lirenti** · 21-11-2006, 11:15 PM

Peshk i zier

* Për zierje përdoren të gjithë llojet e peshqve me përjashtim të ngjalës, kublës etj., që kanë erë të rëndë. Peshku mund të zihet i tërë ose në copa.

Peshku i pastruar dhe i larë vendoset në tenxhere të cekët, i hidhet ujë, aq sa të mbulohet, shtohen qepë (mundësisht të pjekura mbi sobë), karota, majdanoz, kripë, piper e dafinë. Sa të marrë valë largohet nga zjarri i fortë dhe lihet në zjarr të javashëm për gjysmë ore, derisa të jetë gati. Peshku bëhet më i shijshëm dhe më i ushqyeshëm kur zihet me pak ujë në enë të mbuluar me kapak. Pasi të ketë zier, hiqet nga zjarri. Mund të jepet i nxehtë me zarzavate të ziera, sidomos me patate, ose i ftohtë, i shoqëruar me sallata të ndryshme. Në mënyrë të veçantë peshku i zier, i ftohur, shkon me sallatë perimesh, salcë majoneze (sallatë ruse) ose vetëm me majonezë.