Leon Cino: Historia ime me Xhemin? Vetëm një thashethem

[kuklla]

Leon Cino: Historia ime me Xhemin? Vetëm një thashethem

• Ilda Lumani

Balerini shqiptar, i famshëm në Itali, Leon Çino vitin e kaluar më shumë se për karrierën e tij, do të zinte vend në faqet e shtypit rozë me jetën e tij sentimentale. Një histori dashurie, ku përfshihej një nga bukuroshet e ekranit shqiptar, si Xhemi Shehu. Ashtu siç u ndërtua kjo marrëdhënie, ashtu edhe u rrëzua. Njësoj si një kala rëre, aty buzë detit të Dhërmiut, ku edhe nisën hovin zërat e parë. Por më pas e gjithë kjo u komentua nga të dy personazhet si diçka e sajuar. Këtë pohon edhe vetë protagonisti Çino, në këtë intervistë ekskluzive nga Italia për "Summer Pages". "Thashethemet e bëjnë njeriun të famshëm më shumë se ç'e bën puna", - shprehet ai, duke i lënë vend pikërisht punës dhe karrierës së tij. Karrierë që tashmë nuk rezulton vetëm si e një balerini. Pasi ai po përpiqet të futet në botën e kinematografisë. Ëndërr e vjetër e tij, e cila duket se po merr jetë. Provën e parë e ka kaluar. "Ne dhe Lenini" është filmi i regjisorit Saimir Kumbaro, ku Leoni interpreton krahas aktorëve më me emër shqiptarë. Këtë shtator të gjithë do të kemi mundësinë të shohim premierën e tij, ndërkohë që edhe në Itali po trokasin ofertat e para për në kinema.
Jeni një nga balerinët e dëshiruar nga shumë adoleshente italiane, si ju bën të ndiheni ky fakt?
Është diçka e dyfishtë, ato kënaqen me mua siç kënaqem unë prej tyre... Kjo është ta jetosh jetën artistike.
Mund të na rrëfeni diçka për eksperiencën tuaj në Itali dhe Amerikë?
Janë dy shtete me kulturë të ndryshme... Italianët janë nacionalistë më shumë se amerikanët. Nuk ke për të parë, tani për tani, një njeri në Itali të ketë 2 shokë italianë dhe të tjerët me shtetësi të tjera. Kurse në Amerikë është komplet e kundërta, madje kjo gjë e përfaqëson. Konkluzioni është se po u fute në jetën e këtyre vendeve, ndjehesh mirë si në Itali ashtu edhe në Shtetet e Bashkuara të Amerikës.
Hera e fundit "zyrtarisht" që keni qenë në Shqipëri ka qenë interpretimi juaj në filmin "Ne dhe Lenini", të regjisorit Saimir Kumbaro. Çfarë përshtypjesh ndani për këtë rol?
Është si dashuria, nuk e harron kurrë të parën. Ky është roli im i parë dhe normalisht është gjithçka e re, çdo gjë është e prekur për herë të parë... si një ëndërr.
Si e ndjen veten në rolin e një aktori, edhe pse roli juaj ishte mjaft i afërt me profesionin tuaj?
Profesioni im është balerin. Të jem aktor është një ndër ëndrrat e mia më të bukura... Më pëlqen shumë të jem aktor... shumë…
Ç'do të thotë për ju të interpretoje në krah të emrave më në zë të kinematografisë shqiptare?
Kënaqësi e pa provuar më parë dhe njëkohësisht, shndërrohesh në një sfungjer që të thithësh sa më shumë nga to...
Në shtator pritet të jetë premiera e filmit, do t'u shohim ju në të?
Do të kisha shumë dëshirë dhe ndoshta do të jem.
Mendoni të vazhdoni një karrierë në kinema dhe a keni pasur oferta të tjera pas këtij filmi?
Jam duke lexuar një pjesë të re për një film italian në këto momente.
Ju përshkruajnë si një djalë mjaft të lidhur me familjen? Është e vërtetë?
Po, është shumë e vërtetë. Duhemi shumë ndër nesh. Jam i bindur që çdo kush ndjen të njëjtën gjë.
Çfarë ka përfituar Leoni nga "Amici" dhe a ishte ky spektakli qe ju solli famën?
Famën në botën e teatrit e kisha... kurse të botës më të madhe, domethënë të televizionit jo... këtë më dhuroi "Amici".
Tashmë jeni një balerin mjaft i famshëm? Ç'do të thotë kjo për ju? Është kjo gjëja që keni ëndërruar sigurisht. Si ju bën të ndiheni?
Si çdo profesion: gazetari, të cilit i lexojnë shpesh artikujt; etj ... ashtu dhe unë, me kokë të ulur dhe shumë punë kam arritur t'i prek njerëzit. Është konkluzioni i një pune të vështirë... Kjo është e bukura e profesionit.
Realisht, sa të ka ndihmuar shkolla dhe leksionet e Akademisë së Dansit ne Tiranë (për aq kohë sa ishe), për të qenë ky që jeni sot?
Është pak a shumë si ndërtimi i një pallati; janë themelet, pa janë zbukurimet e tjera dhe klasi. Vlen pak a shumë për gjithçka si filozofi.
Pas pjesëmarrjes tek "Amici", ke pasur oferta nga televizione te tjera?
Po, sigurisht. "Amici" është shumë i famshëm, jo vetëm në Itali. Pas pjesëmarrjes dhe fitores në të, kam pasur mjaft oferta, sidomos në kanalet e tjera italiane.
Si i ke marrëdhëniet me kolegët e tjerë shqiptare në Itali?
Jemi një grup shumë i bukur... Shkojmë shumë mirë me njëri-tjetrin...
Leon, më përshkruaj një ditë tënden në Itali?
Një ndër të fundit është zgjimi në orën nëntë të mëngjesit. Çohem, shoku, puna, drekë, prapë punë, darkë, gjumë... Pak a shumë ditë si të gjithë punëtorët.
Ju jeni bërë edhe pre e thashethemeve, siç ka qenë rasti në lidhje me Xhemi Shehun. Aktualisht, si është jeta private e Leonit? A është ndonjë bukuroshe që të ka rrëmbyer zemrën?
Historia me Xhemin, si gjithë thashethemet në Shqipëri. Për çudi, thashethemet e bëjnë njeriun e famshëm më shumë se ç'e bën puna. Nejse, jo, s'ka akoma vajzë të ketë arritur deri tek zemra. Të paktën ende jo.
Keni rreth 12 vjet i larguar nga Shqipëria, kur jeni aty, kush u mungon më shumë nga Tirana?
Nuk i kam më shokët e fëmijërisë aty dhe malli më merr sidomos për 'tokën', më qan zemra, sidomos kur nuk shoh më vendin ku e gërvishta gjurin, ku vrapoja, kur luaja. Megjithatë, jeta vazhdon për atë që është dhe unë kam gjetur shokë të rinj që më bëjnë të jem i buzëqeshur.
Përveç baletit, cilat janë pasionet e tjera të Leonit?
Filmat, futbolli ... ka sa të duash ...
Aktualisht me çfarë po merreni?
Këto ditë jam me një turne nëpër Itali me shfaqjen "Io ballo".
A i keni parashikuar pushimet verore dhe a do të jetë Shqipëria pjesë e tyre?
Jam duke u menduar ende për pushimet. Kam shumë qejf të vizitoj ndonjë vend të pa parë, por nuk është e thënë që Shqipëria të mos jetë pjese e pushimeve