Bleona nën urdhrat e Ganiut

[Coca-Cola]

Edhe pse ende nuk janë të martuar, këngëtarja Bleona Qerreti ka thënë se është plotësisht nën urdhrat e njeriut më të cilin ajo bashkëjeton që disa vite, Gani Bardhës.
Këto komente ajo i ka bërë për suplementin “Bluetooth”, të Gazetës Shqiptare, ku ka shtuar se në Tiranë nuk është për pushime por është për mbrëmje të ndryshme muzikore nëpër kryeqytet. Ajo i ka quajtur pushimet e saja, ‘të zeza’.

Kurse në lidhje me Ganiun ajo ka thënë se ka më të marrëdhënie të shkëlqyeshme dhe se të dy ata po ndihen si VIP sidomos tani që kanë blerë një makinë të tipit “Porche 917”.

“Janë shumë, por s’e kam idenë sesi do i shtyjmë 40 vite martesë bashkë”
Ka vetëm pak ditë që ndodhet në Shqipëri për të qenë e pranishme në koncertet që zhvillohen në qytete të ndryshme të vendit duke ‘braktisur’ për fare pak kohë Amerikën , aty ku tashmë ka krijuar dhe jetën e saj. Ka një aktivitet mjaft të ngjeshur dhe do t’i organizojë punët në mënyrën më të mirë të mundshme.

‘Bluetooth’ e kapi rastësisht Bleonën në Tiranë teksa po nisej për një koncert në Durrës. Në këtë intervistë këngëtarja na rrëfen detajet më të fundit rreth lidhjes së saj katër vjeçare me Ganiun, sqaron njëherë e mirë të fshehtën rreth ceremonisë së dasmës si dhe projektet për të zgjeruar familjen
Bleona të shohim këto ditë në Tiranë. Ke ardhur me pushime?
Ç’pushime zeza! (Qesh). Jam me koncerte dhe jo për pushime. Gjithsesi e konsideroj pushim faktin që po rri disa ditë me mamin dhe babin, por kjo ndodh vetëm paraditeve pasi pasditet I kam të zëna me koncerte. Thuajse çdo ditë kam nga një koncert. Jam shumë e zënë dhe nuk di sesi po e përballoj gjithë këtë ngarkesë.

Si është jeta midis Amerikës dhe Shqipërisë?
Jeta midis Amerikës dhe Tiranës është 13 orë diferencë me avion si edhe 40 orë pa gjumë duke përmendur këtu edhe kohën që të zë përgatitja e valixheve. Unë e bëj këtë rrugë shumë shpesh dhe njerëzit më shohin më shumë nëpër sallat e biznesit në aeroporte sesa në rrugë apo në ambiente të tjera në Tiranë.

Si po shkon marrëdhënia me Ganiun?
Marrëdhënia jonë në çift mund të them me plot gojë që është e shkëlqyer. Në fakt ju gazetarët Ganiun e keni bërë personazh VIP. Në vend të më pyesni mua se si jam kur vij, menjëherë interesoheni për të dhe vëmendja përqendrohet tek ai. Ganiu është yll. Momentalisht po bën një makinë si dhe sapo ka blerë motorin e Porshe 917. Ky është projekti me të cilin po merret burri im i dashur. Shtëpia jonë nuk ka mobilie brenda por, ka vida, çelësa anglez e të tjera materiale si këto. Ky është pasioni i tim shoqi dhe në momentin që unë e dua duhet të respektoj edhe pasionin e tij ashtu sikurse edhe ai respekton pasionin tim për këngën dhe koncertet. Kështu që në momentin që unë toleroj sediljet e makinave që kam nëpër shtëpi atëherë duhet toleruar edhe dy mujorshi që unë vij në Shqipëri, në shtëpinë time dhe marr pjesë në koncerte. Në këto kushte keni një mirëkuptim të plotë për sa i përket punës time dhe të Ganiut. Unë këngën, ai ndërtimin e makinave.

Si do ta cilësonit lidhjen tuaj 4 vjeçare?
Në datën 18 Qershor ne kemi mbushur plot katër vite dashuri bashkë. Katër vjet lidhje me Ganiun. Deri tani jam shumë e kënaqur dhe njëkohësisht shumë e lumtur. Por nuk e kam fare idenë sesi do i shtyjmë deri në 40 vite martesë bashkë, kohëzgjatja e çifteve kjo. (Qesh)

Cili është më tolerant nga ju? Pas zënkave që ndodhin në çift, kush kërkon më shpesh falje?
Në momentin që gjërat shkojnë deri te zënkat nuk ia vlen më të kërkosh falje, puna është që nuk duhet të zihesh. Në momentin që zihesh është pak problem të kërkosh falje. Unë jam shumë krenare kurse djali është tmerrësisht kokëfortë. Kështu që askush nuk kërkon falje ndërsa ditën tjetër jemi sikur nuk ka ndodhur asgjë. Gjithsesi unë jam ajo që toleroj. Për surprizën e të gjithëve është tamam kështu siç po ju them dhe për këtë nuk ka më befasira. Të gjithë njerëzit mendojnë që është Bleona ajo që e kontrollon këtë marrëdhënie. Jo, nuk është aspak e vërtetë. Është Ganiu ai që është burri i shtëpisë dhe është Ganiu ai që po thellon çdo gjë dhe që ma bën tetë me dy.

Pra në këtë marrëdhënie dominon Ganiu?
Unë ju betohem që është Ganiu ai që bën ligjin në shtëpi dhe ritheksoj: është ai që ma bën 8 me 2. Po të doni besojeni po të doni jo. Por nga ana tjetër ai është një djalë shumë i mirë, i pjekur dhe i kupton gjërat. Është zemra e bukur e mamit të vet. Më ka marrë malli se kam dhjetë ditë pa e parë.

Ju tashmë keni prej disa kohësh certifikatën e martesës. Po e shumëpërfolura dasmë, kur do të ndodhë?
Certifikata e martesës nënkupton që je martuar me dikë. Gjithmonë them me vete, pse nuk merren njerëzit me ata që i kanë gratë në shtëpi pa certifikatë martese dhe thonë: kjo është gruaja ime, por merren me mua që jam me certifikatë martese por pa bërë dasmë. Pse nuk merren me këtë kategori? Në momentin që do të sqarohet problemi i këtyre të parëve atëherë do sqarohet edhe problemi im. Është shumë normale.

Pra po na lini të kuptojmë se nuk do të bëni dasmë?
Shikoni, Ganiu nuk njeh njeri në Shqipëri. Dasmën do ta bëjmë por duhet të prisni se kur kjo do të ndodhë. Po u bë, u bë, po s’u bë, s’u bë. Në fakt më nervozon pak kur më pyesin dhe vazhdojnë të më pyesin për dasmën.

Sa qejf i ka Bleona fëmijët?
Bleona i pëlqen fëmijët t’i përkëdhelë pesë minuta dhe të luajë dhjetë minuta. Pas këtyre dhjetë minutave, i pëlqen që dikush tjetër të merret me ta për sa i takon ndërrimit të pampersave, të ushqyerit apo mënyrës sesi fëmijët qajnë.

Sa do të dëshironit të kishit nga martesa juaj?
Fëmijët janë gjëja më e bukur në botë. Sigurisht që edhe unë dua të kem një fëmijë, ndoshta kjo do të ndodhë vitin tjetër, ndoshta pas dhjetë vjetësh. Këtë nuk e dimë akoma se sikur na ka dalë Hollivudi përpara dhe na prish planet. Varet nga filmat që do të bëj. Sa më shumë filma do të realizoj, aq më shumë fëmijë do të kem (kështu ndodh me aktorët pë rsa u takon fëmijëve). Por diçka dua t’u bëj të qartë të gjithëve. Fëmijët e mi do jenë shumë të famshëm.

Marrëdhëniet me gatimin?
Nuk di të gatuaj, dhe duke qenë se një gjë të tillë nuk di ta bëj i bie që të dy të jemi me dietë. Pra kështu le të mbetet pasi nuk shëndoshemi. Ne tashmë flasim me nivele karbohidratesh dhe proteinash, nuk themi se çfarë hëngrëm për drekë apo për darkë. Shyqyr që Ganiu më akuzon që sa herë marr mundimin të gatuaj dhe hamë diçka ai shëndoshet, kështu që unë as tentoj më të gatuaj. Jemi rehat të dy. Kështu edhe unë kam më shumë kohë të merrem me veten time.

Cilat janë materialet më të fundit muzikore që po përgatit?
Këngët e mia të reja titullohen ‘Hotness’ dhe ‘Magnetic’. Është përfunduar varianti në anglisht por ende ai në shqip pasi kam qenë shumë e zënë me koncertet. Në momentin që do përfundohet varianti në shqip atëherë do të bëhen edhe dy klipe që do të dalin në Shtator apo Tetor.

Si i ke përjetuar koncertet e fundit? Sa emocion të kanë falur ato?
Në koncerte po ndihem mrekullisht mirë. Pa marrë parasysh se ku do të jetoj apo çfarë peshe do kem në tregun amerikan unë gjithmonë do jem Bleona e lindur dhe e rritur në Tiranë. Ndihem shumë e mirëpritur. Më presin me padurim kur vij. Këtë e vlerësoj dhe e respektoj pa masë. Mendoj që kam bërë shumë dhe jam kthyer në një personazh të dashur për publikun. Pa u mburrur mund t’iu them që jam një person që nuk i pushon telefoni nga fansat. Duan të bëjnë foto me mua, më zbresin pafund nga makina. Asnjëherë nuk do të jem arrogante apo mendjemadhe me publikun, ndërsa për të tjerët, kush e meriton…patjetër që po.

Ku do t’i kaloni pushimet këtë vit?
Në fakt nuk e di se ku do i kalojmë, dhe nuk di në do kem kohë për pushime apo jo. Por mendoj se disa ditë do i bëj, por shumë pak. Jam shumë e zënë me koncertet, do të filloj edhe nga xhirimet e klipeve. Janë ditë shumë të ngjeshura. Nuk mendoj se do ketë pushime të gjata këtë vit edhe pse dua ta marr pak veten. Nuk kam zgjidhur ende punën e filmit për të cilin do të desha të flisja në një tjetër intervistë pa dashur të zbuloj asgjë. Nuk kam zgjidhur ende as punën e albumit në Anglisht.