Shpërthen Igli Tare, hakërrim shqiptari ndaj Zarates

[Kliton]

Shpërthen Igli Tare, hakërrim shqiptari ndaj Zarates



Igli Tare ka treguar se ka “gjak shqiptari”, teksa i ka dalë në mbrojtje trajnerit të Lacios, Delio Rosi, ku vetë është drejtor teknik. Madje, i ka kërkuar fort llogari argjentiasit bardhekaltër, Zarate, për fjalët që ka thënë në momentin e zëvendësimit, në ndeshjen Lacio-Juventus 1-1, luajtur të dielën në mbrëmje në “Olimpico” të Romës. Tare-Zarate, sherr në takimin Lazio-Juventus. Kështu e titullonin incidentin në fjalë mediat italiane, ditën e hënë. Gjatë ndeshjes mbrëmshme të Serisë A, ku Lacio priste në shtëpinë e saj Juventusin, ka ndodhur një ngjarje e papëlqyeshme, ku protagonist ka qenë sulmuesi argjentinas, Mauro Zarate. Sikurse duket edhe në foto, Tare gati sa nuk i “ka futur duart në fyt” Zarates, gjatë momentit që ky i fundit ka shprehur hapur dhe me fjalë pakënaqësinë ndaj trajnerit të tij. Sulmuesi në fjalë nuk e ka aprovuar vendimin e Delio Rosit për ta zëvendësuar, çka u vu re edhe në fytyrën e tij. Në këtë moment ka shpërthyer Igli Tare, drejtori sportiv i Lacios, i cili i është hakërryer Zarates, madje duke i drejtuar gishtin në fytyrë. Lojtarit i është kërkuar të qetësohej dhe të shfaqte një qëndrim sa më profesionist, edhe nëse nuk i pëlqen ndonjë vendim i trajnerit. Nga ana e tij, Zarate është mbrojtur, duke thënë: “Pse duhet të zëvendësohem unë në cdo ndeshje, kur në fushë jap më të mirën.” Në lidhje më këtë incident ka reaguar edhe presidenti i Lacios, Lottito, i cili nuk ka mbajtur anën e asnjërës palë: “Gjëra që ndodhin, kamerat e frynë më shumë se duhej momentin e nxehtë mes Tares dhe Zarates. Unë e pëlqej si lojtar argjentinasin, por është trajneri, ai që vendos. Se kush ka të drejtë, do ta shohim në fund të sezonit. Renditja e Lacios do ta tregojë më mirë se askush.”