Obama uroi Sejdiun në përvjetorin e pavarësisë

[selami2006]

Obama uroi Sejdiun në përvjetorin e pavarësisë


Presidenti i Shteteve të Bashkuara të Amerikës, Barack Obama i ka dërguar presidentit të Republikës së Kosovës, Fatmir Sejdiu, një letër urimi me rastin e 17 shkurtit, përvjetorit të parë të shpalljes së pavarësisë së Republikës së Kosovës.
Në këtë letër thuhet: “ Në emër të popullit amerikan, ju përgëzoj ju dhe qytetarët e Kosovës në përvjetorin e parë të deklaratës historike të pavarësisë së Kosovës më 17 shkurt”.

“Derisa populli i Kosovës punon drejt një ardhmërie të përbashkët, unë dua të theksoj që SHBA-të do të vazhdojnë të mbështesin një Kosovë multietnike, të pavarur dhe demokratike, në përpjekjet e saj që ta zërë vendin e merituar si anëtare e plotë e bashkësisë së shteteve”, përfundon letra e presidentit amerikan.

[selami2006]

Urim edhe nga Mbretëresha Elizabeta II, dhe sekretari Miliband


Me rastin e njëvjetorit të pavarësisë së Kosovës, Lartmadhëria e Saj Mbretëresha Elizabeta II i dërgoi letër presidentit të Republikës së Kosovës, Fatmir Sejdiu, me përshëndetjet a saj më të ngrohta si dhe dëshirat më të mira për mirëqenien dhe lumturinë e popullit të Kosovës gjatë vitit në vijim.
Me këtë rast edhe sekretari i Jashtëm britanik, David Miliband, përgëzon një vjetorin e pavarësisë.

Miliband thekson se një vit më parë një kapitull i ri i historisë u hapë me shpalljen e pavarësisë së Kosovës. Që atëherë, liderët kosovarë – sipas tij – vendosën institucionet demokratike, miratuan ligje të rëndësishme, tejkaluan shumë pengesa dhe në mënyrë konstruktive punuan me partnerët ndërkombëtar, duke përfshirë këtu edhe përkrahjen për vendosjen e misionit të Unionit Evropian për ligjin dhe rendin në mbarë Kosovën.

“Ata janë angazhuar në përmirësimin e jetës së të gjithë njerëzve të Kosovës duke krijuar dhe fuqizuar një Kushtetutë e cila përfshinë të drejtat e barabarta dhe mbrojtjen e minoriteteve”, thekson Miliband, duke përshkruar konsolidimin e Kosovës si aktor i pavarur ndërkombëtar, vazhdimin e qëdrueshëm të njohjeve të saj, hapjen e ambasadave etj.

“Në vitin që po vjen, shpresoj të shoh Kosovën duke vazhduar në rrugën e saj të tanishme, duke u larguar nga konflikti i kaluar drejt një të ardhme stabile, me prosperitet. E vlerësoj që ky përvjetor ngjallë ndjenja të ndryshme për disa në Kosovë dhe në regjion. Dëshiroj ta risiguroj qeverinë e Serbisë se ne e njohim interesimin legjitim të vazhdueshëm të tyre për mirëqenien e komunitetit serb të Kosovës, dhe e inkurajoj qeverinë e Kosovës për të dyfishuar përkushtimin e saj për të fituar besimin e të gjitha komuniteteve që jetojnë në Kosovë”.

“Kosova dhe fqinjët e saj në Ballkanin Perëndimor ndajnë një ambicie të përbashkët për një të ardhme evropiane. Mbretëria e Bashkuar është e përkushtuar për të punuar me të gjithë në rajon për ta arritur këtë qëllim”, thuhet në letrën e sekretarit Miliband.

[selami2006]

President i Konfederatës Zvicerane uron presidentin Sejdiu


Me rastin e përvjetorit të pavarësisë së Republikës së Kosovës, presidenti i Konfederatës Zvicerane, Hans-Rudolf Merz, ka uruar përmes një letre presidentin e Republikës së Kosovës, dr. Fatmir Sejdiu.
Ne letrën e z. Hans-Rudolf Merz thuhet: “Në emër të Këshillit Federal Zviceran, është kënaqësi për mua t’i përcjell Shkëlqesisë Suaj urimet tona më të përzemërta me rastin e përvjetorit të parë të pavarësisë së Republikës së Kosovës dhe t’ju shpreh dëshirat më të sinqerta për mirëqenien tuaj personale si dhe prosperitetin e vendit dhe të gjithë qytetarëve tuaj”.

“Jam i bindur se besimi dhe miqësia e mirëfilltë që ekziston në mes të dy vendeve tona do të thellohet edhe më tej në vitet që vijnë”, përfundon letra e presidentit Merz.