Veteranët e UÇK-së u shkruajnë veteranëve të ushtrisë serbe

[burimi_zh]

LETËR E HAPUR

Në procesin historik të përvojës filozofike dhe jetësore njerëzit janë bërë më human dhe më të arsyeshëm në veprime, por në rastet e luftërave në Ballkan, ushtria dhe policia serbe ka vepruar pa dinjitet njerëzor, pa humanizëm deri në shkallën e gjenocidit siç ndodhi me shqiptarët në Kosovë që nga viti 1991 deri në vitin 1999. Kjo ka ndodhur në vazhdimësi që nga viti 1912 kur ushtria serbe e kishte pushtuar Kosovën e deri në vitin 1999 kur e humbi luftën dhe u detyrua të largohej nga Kosova. Kur bëhen gabime të qëllimta pas kryerjes së akteve të tilla mizore është e udhës që të vetëdijesohen, të ndërgjegjësohen dhe në formën më të lehtë të kërkojnë falje publike për të gjitha ato që ia kanë shkaktuar popullit tjetër. Ky akt është i njohur tek popujt e civilizuar të Evropës siç është rasti me popullin gjerman për holokaustin e hebrenjve. Këtë akt duhet ta bëjë edhe populli serb për krimet ndaj popullit shqiptar. Kur një populli i merret liria me dhunë, ai angazhohet që ta rikthejë atë, duke luftuar me vullnetin më të madh. Lirinë e dëshiruan shqiptarët dhe luftuan për të deri në flijim, që brezat që vijnë të jetojnë dhe ta gëzojnë të tashmen dhe të ardhmen, por edhe të jetojnë në miqësi dhe paqe me të gjithë popujt fqinjë dhe të gjithë popujt e botës. Të nderuar kolegë, Organizata e Juaj ka përfshirë edhe obligimin themelor të çdo bashkëkombësi Tuaj duke u quajtur organizatë patriotike. Një orientim të tillë Organizata juaj, e parasheh edhe me Statut. Po ashtu, në Statutin tuaj parashihni edhe gatishmërinë e ruajtjes së kufijve të Serbisë "etnike", që sipas jush duhet të përfshihen pjesët e BeH, Kosova dhe një pjesë e Kroacisë – edhe pse ju e dini mirë që, p.sh. Kosova ka mbi 90% shqiptarë. Në këtë drejtim, keni formuar edhe degët që Ju i quani Lëvizje të Organizatës së Veteranëve të Luftës. Duket se shprehja "lëvizje" nënkupton se synimet dhe pretendimet Tuaja janë ato të ish mbretërisë serbe apo ish sistemit millosheviqian. Në kuadër të këtyre lëvizjeve, i keni formuar, dhe kohët e fundit me të madhe i keni aktivizuar, "Gardën vullnetare të "Car Llazarit", "Lëvizjen e bashkuar të popullit serb", "Shërbimin sekret në Kosovë e Metohi". Ju pretendoni realizimin e vendimit të Qeverisë së Serbisë, të vitit 1997, për ndarjen e tokave kishtare në Kosovë, të gjithë luftëtarëve që kanë luftuar dhe eventualisht do të luftojnë për "Kosovë e Metohi". Kështu që, nga kinse 24 hektarë të tokës si pronë e Kishës së Deçanit, atë e keni rritur në 700 hektarë, apo të kinse pasurisë së Nikolla Pashiqit, i cili në emër të shpërblimit nga ish mbretëria serbe, për hirë të aneksimit të tokave shqiptare në "Serbinë e Vjetër", ia ndatë 3000 hektarë tokë në Gazimestan, e në shumë vendeve të tjera ua shtuat pasurinë manastireve dhe kishave ku sipas projekteve të politikës serbe e nën mbikëqyrje të forcave ndërkombëtare po tentoni t'i populloni. Qeveria serbe me këtë vendim obligohet që të gjithë luftëtarëve në "Kosovë e Metohi" t`ua fali këto pasuri, sipas kontributit të tyre. Kolegë të nderuar, Siç e dini, kontributi i secilit luftëtar serb në Kosovë, ka qenë në kundërshtim të thellë me Konventën e Gjenevës të 12 gushtit 1949 si dhe me plotësimet e saj me kaptinat e reja I, II dhe III. Me këtë konventë, rreptësishtë ndalohet shkatërrimi në masë i pasurisë së një vendi, likuidimi i civilëve si dhe plaçkitja. Po ashtu, këtë luftë dhe metodat e milicisë e ushtrisë serbe në Kosovë në vitin 1998-1999, e ndalon dhe e gjykon si të kundërligjshme dhe johumanitare, Konventa ndërkombëtare e Gjenevës e 12 janarit 1951, e cila dënon terrorizmin shtetëror që ka për qëllim veprimet më shtazarake të shfarosjes së një populli, me mjete dhe metoda shtetërore të aplikimit të gjenocidit. Të nderuar kolegë, Jemi në dijeni për përgatitjet e Juaja, për të gjitha veprimet momentale të Lëvizjeve të veteranëve të luftës, siç është ajo e parashutistëve në Nish, e artilerisë në Krushevc, e Gardës vullnetare të "Car Llazarit" në Vranjë e Kurshumli, apo të Lëvizjes popullore në Beograd. E dimë se vetëm brenda disa muajve keni dërguar në Kosovë 3011 aktivistë dhe profesionistë ushtarak, për të krijuar situata të ndërlikuara, për të shkaktuar trazira dhe mundësisht edhe luftë frontale. Jemi të obliguar që për hirë të evitimit të luftës eventuale, t`ju lusim që popullit Tuaj së pari t'ia bëni të ditur se: Historia në Kosovë nuk fillon me mesjetën; Kosova me trojet tjera etnike shqiptare ka qenë gjithmonë e okupuar që nga Bizanti, Romakët, Bullgarët, Sllavët e jugut dhe Otomanët; Shqiptarët në tokat e tyre, gjithnjë kanë qenë popull etnik (shih: Joklin, Hannin, Millojeviqin, Gopçeviqin, Tucoviqin por edhe Kërstiqin), edhe pse politika serbe, bullgare e greke, kanë tentuar t'i kualifikojnë si ardhacakë nga shkretëtirat e Anadollit, përkundër faktit se e kanë ditur që populli shqiptar është pasardhës i ilirëve etnik në Ballkan; Gjuha, kultura, mentaliteti, doket dhe antropologjia e këtij populli, vetvetiu tregojnë se shqiptarët janë popull autokton në tokat e veta; Okupimet e Kosovës gjithnjë kanë rezultuar me luftëra çlirimtare vetëm nga ana e shqiptarëve e jo edhe nga serbët apo bullgarët e grekët; Kosova, që nga ilirët e deri më sot, gjithnjë ka qenë e banuar me shumicë të popullatës shqiptare, gjë që mund të vërtetohet edhe nga shkrimet antike greke, nga analet osmane-turke; të cilat konfirmohen edhe nga historiografia evropiane; Hulumtimet më të reja etimologjike vërtetojnë se toponimet me prejardhje sllave që hasen në tokat etnike shqiptare, janë të imponuara në kohën e okupimit të Perandorisë Bullgare, që zgjati 200 vjet, në shekujt XI dhe XII të epokës së re; Në fund të fundit, e tërë bota u bind se dashuria ndaj Atdheut, te shqiptarët, është kategoria morale më e lartë në botë (vetëflijimi familjar i tri gjeneratave, lufta duarthatë ndaj okupatorit i cili mbante vendin e katërt për nga armatimi në Evropë, kthimi masiv në mënyrë të vullnetshme i popullatës shqiptare në vendlindje (në Kosovë) në vitin 1999 pas deportimit të dhunshëm të rreth një milion shqiptarëve nga shteti serb). Këto janë disa raste të njohura mirë nga historiografia ballkanase dhe ajo botërore, të cilat na bëjnë të ju drejtohemi, se të gjitha lojërat që po luan organizata e Juaj, janë tërësisht në kundërshtim me ligjet ndërkombëtare, por edhe cenojnë paqen, sigurinë dhe stabilitetin në rajon. Të nderuar kolegë, Ne deklarojmë botërisht se duam paqe, stabilitet dhe siguri për të gjithë qytetarët e Kosovës pa dallim etnie, feje apo ideologjie, në pajtim me vlerat për bashkëjetesë, mirëkuptim dhe harmoni ndëretnike, ndërfetare dhe ndërnjerëzore. NE jemi kundër një shpërthimi të ri të luftës në Kosovë e trojet tjera etnike shqiptare që Ju po e përgatitni sipas interesave Tuaja false, arkaike dhe anakronike; jemi kundër një lufte të re sepse i kemi parë pasojat, shkatërrimet dhe dëmtimet në njerëz, në pronë, në industri dhe e kemi përjetuar cenimin e lirisë dhe jetës së njeriut, dhe pikërisht për këtë ne nuk duam përsëritjen e një historie makabre. Megjithatë, në rast të ndonjë agresioni në Atëdheun tonë, ne ua bëjmë të ditur, se nuk do të kursejmë asgjë për të mbrojtur familjet tona, pronat tona dhe Atdheun tonë. Do të jemi të gatshëm të mbrojmë popullin dhe trojet tona etnike. Një luftë e re në Ballkan, do të sjellë reaksion zingjiror në përmasa të një KRIZE NDËRKOMBËTARE me dimensione marramendëse. Duke shpresuar se ju do t'i kuptoni këto rrethana reale, ne duam të besojmë se organizata e Juaj, do ta kuptojë dhe besojmë se duhet ta keni të qartë se zhvillimi progresiv i historisë nuk lejon regresionin historik. Kjo do të kishte kuptimin e kthimit të serbëve në Ural, polakëve në Ukrainë, gjermanëve në Poloni me qendër në Gdanjsk, turqve në Mongoli, rusëve në Siberi dhe kthimin e shqiptarëve në trojet e vjetra ilire nga Dalmacia e deri në Korint! E kjo është krejt e pamundur dhe as që duam të merremi me shqyrtimin e historisë edhe pse prej saj do të na takonte e drejta historike. Përkundrazi presim që shteti juaj, sa më shpejt të njoh realitetin e ri të krijuar në Kosovë. Tash kërkohet që të jemi racional dhe ta ndërtojmë një të ardhme të sigurt e të qetë. Për të arritur këtë objektiv njerëzor dhe përparimtar, dëshira jonë është në pajtim me të gjitha virtytet e civilizimeve bashkëkohore, dhe ju do të mund të viheni përkrah arritjeve më të mëdha po që se do të angazhoheshit që t'i bindni serbët, qoftë në Serbi e veçanërisht në Kosovë, se tani është koha që ata të ambientohen në rrethanat e reja historike dhe ta japin kontributin e tyre për ndërtimin e paqes, mirëkuptimit, bashkëjetesës dhe mirëqenies së të gjithëve në Kosovë dhe rajon. Duke shpresuar në mirëkuptim dhe reflektim civilizues, Ju përshëndesim!