Mundësi punësimi në Itali

**EMAUS** · 22-04-2009, 07:43 PM

Mundësi punësimi në Itali për të rinjtë shqiptarë. “Infermierët shqiptarë, si mund të punësohen në Itali”. Kusht, diploma e njësuar nga Ministria e Shëndetësisë dhe ajo e Arsimit. Studentët shqiptarë, që tashmë janë diplomuar në degën e Infermierisë, u ofrohen mundësi të reja punësimi në Itali. Ministria e Punës, nëpërmjet përgjegjësit të Drejtorisë së Politikave Migratore, Durim Hatibi, bën të ditur se të gjithë ata studentë që kanë mbaruar shkollën e lartë në Shqipëri, në degën e Infermierisë, kanë mundësi që të punojnë në mënyrë legale në shtetin fqinjë, në Itali. “Për ta ushtruar këtë profesion në Itali, fillimisht duhet të plotësohen disa kritere më kryesore.

Për të përfituar një punësim të tillë është njohja e titullit përkatës të studimit nga ana e Ministrisë së Shëndetësisë dhe regjistrimi i tij në Librin e Profesionit”, ka bërë të ditur për gazetën Hatibi. Ndërsa, infermierëve që nuk u është njohur titulli i studimit nga Ministria e Shëndetësisë, nuk kanë të drejtë të përfitojnë nga oferta e shtetit italian për punësimin e tyre në këtë shtet. Punësimi i infermierëve profesionistë shqiptarë, që kërkojnë të punojnë në Itali, nuk rregullohet me kuotat vjetore, por si kategori që bën pjesë në të ashtuquajturat “jashtë kuotave”, si infermierë që punësohen pranë strukturave sanitare publike dhe private, që kanë një titull studimesh të njohur nga Ministria e Shëndetësisë.

Punësimi: Megjithatë, procedurat për njohjen e titullit duhet të aktivizohen nga punëdhënësi i interesuar për punësimin nga jashtë ose direkt prej të interesuarit, në rastin kur ka një leje-qëndrimi të rregullt në Itali. Kjo, në bazë të curriculum-it të studimeve, kanë bërë të ditur burimet pranë zyrave të Drejtorisë së Politikave Migratore në Ministrinë e Punës. Ata kanë theksuar më tej se nuk është e mjaftueshme vetëm diploma, që duhet të përkthehet e të legalizohet pranë përfaqësisë konsullore italiane në vendin e origjinës, por edhe programi i studimeve të çdo lënde, për çdo vit studimi. Në vijim të njohjes së titullit të studimit e hyrjes në Itali, me dhënien e leje-qëndrimit përkatës, kjo praktikë mbyllet me regjistrimin në Librin Profesional, me njohjen e gjuhës italiane e të dispozitave speciale për ushtrimin e profesionit në Itali. Ndërsa miratimi për punësim kërkohet pranë Sportelit Unik për Imigrimin, përmes plotësimit të modulit dhe dërgimit telematik nga ana e punëdhënësit.

Subjektet që mund të punësojnë janë: struktura sanitare (publike/private), agjenci të ofrimit të fuqisë punëtore apo shoqëri të formës së kooperativave. Drejtoria e Politikave Migratore sqaron se viza lëshohet përmes miratimit (“Nulla Osta”) për punë të lëshuar, sipas kërkesës së punëdhënësit. I huaji (në këtë rast shqiptari), brenda tetë ditëve nga hyrja në Itali duhet të paraqitet te Sporteli Unik, për të nënshkruar kontratën e qëndrimit, duke paraqitur edhe dokumentet e një strehimi të përshtatshëm, si dhe dokumentacionin që provon disponibilitetin e këtij strehimi. Për të ushtruar profesionin, infermieri i huaj duhet të kërkojë regjistrimin në kolegjin provincial të vendit të punës apo të banimit.

www.gazetalibertas.com