Facebook e Twitter në shënjestër të hakerëve

[Kliton]

Faqet e popullarizuara të internetit për rrjetëzim Twitter e Facebook janë gjetur mbrëmë në shënjestër të sulmeve të hakerëve, dhe për këtë shkak shfrytëzimi i tyre ka qenë i vështirësuar.

Sulmet kanë pasuar një muaj pasi që faqja e Shtëpisë së Bardhë ka qenë shënjestër e një sulmi të ngjashëm, për të cilën gjë miliona përdorues nuk kanë mundur t’i qasen faqeve të administratës së Shteteve të Bashkuara të Amerikës.

Këto incidente kanë treguar dobësinë e rrjeteve për shoqërim në internet, të cilët përdoren si mjet për thyer censurën dhe autoritarizmin.

Twitter, në të cilin lihen porosi të shkurtra tekstuale deri në 140 karaktere, është bërë mjeti kryesor i komunikimit në Iran gjatë kohës së protestave dhe aksioneve kundër demonstruesve pas zgjedhjeve presidenciale.

Përdoruesit e rrjetit Facebook, të cilët janë 250 milionë në mbarë botën, janë përballur me vonesa të mëdha në vendosjen e të dhënave në llogaritë e tyre, derisa në Twitter nuk ka qenë e mundur qasja për disa orë rresht.

Zyrtarët e këtyre faqeve tani për tani nuk duan të spekulojnë për motivin e sulmeve të këtilla.