Dita e parë e shkollës, 400 mijë nxënës fillojnë mësimin

[aurel]

Viti i ri shkollor 2009-2010 nis sot për mbi 400 mijë nxënës të arsimit 9-vjeçar dhe të mesëm në Shqipëri. Vit, i cili sipas Ministrisë së Arsimit dhe Shkencës do të shoqërohet me disa risi.
Për herë të parë, do te funksionojnë 50 klasa të reja përgatitore për fëmijët 5-6 vjeçar, në shkollat e Ciklit të Ulët. Po ashtu nxënësit e klasës së VI, përveç gjuhës së huaj të parë të detyruar, do të kenë mundësi të mësojnë edhe një të dytë fakultative, ku mësimi do të zhvillohet mbi bazën e orëve ekstra-kurrikulare.
Edhe gjimnazi është përfshirë nga një risi këtë vit, i cili do te filloje me dokumente të reja shkollore si: planet e reja mësimore, korniza e re kurrikulare, programet dhe standardet lëndore si dhe udhëzuesit lëndorë.

Për vitin e ri shkollor 2009-2010, do të zbatohet për herë të parë struktura e re kurrikulare e gjimnazit me dy pjesë kryesore: kurrikula bërthamë dhe kurrikula me zgjedhje të detyruar, apo të lirë.

Kurrikula me zgjedhje, do të përfshijë lëndët: Matematikë e avancuar, Letërsi e avancuar, Informatikë e avancuar, Trashëgimi kulturore, Gjuhë e huaj.

Risia në reformën "ALTERTEKST" për 2009-2010 është përfshirja në procesin mësimor e teksteve të shtëpive të huaja botuese për lëndët: fizikë, kimi, biologji dhe shkencat e tokës.

Krahas gjuhës angleze nxënësit do të kenë tekste të shtëpive të huaja botuese për gjuhën frënge, italiane dhe gjermane.